तालिवान विद्रोही समर्थन जुटाउँदै- विश्व - कान्तिपुर समाचार
कान्तिपुर वेबसाईट
AdvertisementAdvertisement

तालिवान विद्रोही समर्थन जुटाउँदै

एपी

इस्लामाबाद — अफगान विद्रोही समूह तालिवानले विभिन्न मुलुकसंग वार्ताका लागि समर्थन जुटाउने प्रयासलाई तीव्रता दिएको छ । त्यसैक्रममा उसले एक उच्चस्तरीय प्रतिनिधिमण्डल पाकिस्तानको राजधानी इस्लामाबाद पठाउने घोषणा गरेको छ । रुस, चीन, पाकिस्तान र इरानको भ्रमण गर्ने यसअघिकै घोषणाबमोजिम प्रमण्डललाई पाकिस्तान पठाउन लागिएको हो ।

महिनाअघि अमेरिकासँगको वार्ता एकाएक भंग भएपछि तालिवान समूहले अफगानिस्तानमा भीषण हमला गर्नुका साथै विभिन्न देशसँग वार्ताका लागि समर्थन जुटाउने कार्यलाई निरन्तरता दिएको छ ।


तालिवान प्रवक्ता सुहेल साहिनका अनुसार तालिवानका सह–संस्थापक तथा कतारको दोहास्थित राजनीतिक कार्यालयका प्रमुख मुल्लाह अब्दुल घानी बरादरले ११ सदस्यीय प्रतिनिधिमण्डलको नेतृत्व गर्ने छन् । प्रतिनिधिमण्डलले इस्लामाबादमा पाकिस्तानी उच्च अधिकारीसाग वार्ता गर्ने कार्यक्रम छ ।


पाकिस्तानी सञ्चारमाध्यमले अमेरिकी राष्ट्रपति डोनाल्ड ट्रम्पका अफगान विशेषदूत जाल्मे खलिलजाद पाकिस्तानी अधिकारीसँग वार्ताका लागि इस्लामाबादमा रहेको खबर सार्वजनिक गरेसँगै तालिवान समूह पनि पाकिस्तान भ्रमणमा आएको छ । पाकिस्तानको विदेश मन्त्रालय वा पाकिस्तानस्थित अमेरिकी राजदूतावासले तालिवानको भ्रमण र खलिलजादका विषयमा केही टिप्पणी गरेका छैनन् । पाकिस्तानले अमेरिकासँग कुनै किसिमको सहमति गर्नुअघि काबुलसँग वार्ता गर्न तालिवानलाई मनाउने प्रयत्न जारी राखेको छ । अमेरिकी राष्ट्रपति ट्रम्पले अफगानिस्तानको काबुलमा तालिवानले गराएको कार बम विस्फोटमा एक अमेरिकी सैनिकको मृत्यु भएसँगै तालिवानसँगको शान्तिवार्ता समाप्त भएको भन्दै वार्ता नगर्ने घोषणा गरेका थिए ।


तालिवानीले वार्ताको टेबुलमा फाइदा उठाउन खोजेको आरोप लगाउँदै उनले यसको अमेरिकाले बदला लिने संकेतसमेत दिएका थिए । वार्ता रद्द भएको घोषणापछि राष्ट्रपति ट्रम्पले अफगानिस्तानबाट तत्काल ५ हजार सैनिक कटौती गर्ने प्रस्ताव पनि अन्योलमा परेको थियो । हाल अफगानिस्तानमा १३ देखि १४ हजार अमेरिकी सैनिक तैनाथ छन् । झन्डै १८ वर्ष अफगानिस्तानमा रहेको अमेरिकी सेनाले हाल अफगानी सेनालाई तालिम, परामर्श र हवाई सेवा प्रदान गरिआएको छ । अल कायदाले सन् २००१ सेप्टेम्बर ११ मा अमेरिकामा आतंकवादी हमला गरेलगत्तै अमेरिकाले अफगानिस्तानमा आक्रमण गरी सेना पठाएको थियो । अफगानिस्तानमा तत्कालीन तालिवानी सरकारले अल कायदालाई आश्रय दिएको अमेरिकी आरोप छ ।


ट्रम्प प्रशासनले हाल अफगानिस्तानमा अमेरिकी सैनिक संलग्नता अन्त्य गर्न चाहेको छ । यसै सिलसिलामा सन् २०१८ देखि तालिवानसँग अमेरिकी विशेषदूत जाल्मे खलिलजादको नेतृत्वमा वार्ता जारी छ ।


अमेरिका र तालिवानबीच हुने भनिएको सम्झौतामा अफगानिस्तानबाट अमेरिकी सेना चरणबद्ध रूपमा फिर्ता हुने, अफगानिस्तानलाई जिहादीको सुरक्षित आश्रयस्थल बन्न नदिइने, अफगानिस्तान सरकारसँग वार्ता गर्ने तथा अन्तत: युद्धविराम गर्ने बुादा रहेको बताइएको थियो ।


तालिवान समूहका मुख्य मध्यस्थकर्ताले संयुक्तराज्य अमेरिकासँग ‘वार्ताको ढोका’ अझै खुला रहेको बताएर वार्ताको सम्भावना जीवितै रहेको संकेत दिएका छन् ।

प्रकाशित : आश्विन १६, २०७६ ०९:४६
प्रतिक्रिया
पठाउनुहोस्

क्यान्सरको औषधि अभाव

फातिमा बानु

काठमाडौँ — क्यान्सर रोगमा चलाइने अत्यावश्यक औषधि ‘फाइबएफयू’ देशभर अभाव देखिएको छ । बिरामीका आफन्त अहिले सीमावर्ती भारतीय बजारसम्म पुगेर औषधि किन्न बाध्य छन् । भारतलगायत तेस्रो मुलुकबाट ल्याइँदै गरेको औषधि पछिल्ला दिन आएको छैन । 

बिरामीले थप दु:ख नपाउन् भनेर अहिले वैकल्पिक औषधि चलाइरहेको वीर अस्पतालका क्यान्सर विभाग प्रमुख डा. विवेक आचार्यले बताए । ‘सीस्प्लाटिनजस्ता वैकल्पिक औषधि छन् तर यी महँगा र कम प्रभावकारी छन्,’ उनले भने । दैनिक २ देखि ३ पटक चाहिने भएकाले गरिब बिरामीले वैकल्पिक औषधिको खर्च धान्न नसक्ने उनले बताए ।

क्यान्सर रोग उपचारमा अत्यावश्यक औषधि ‘इटोपोसाइड’ र ‘भिन्क्रिस्टिइन’ पनि बजारमा छैनन् । डा. आचार्यका अनुसार यी औषधि बजारमा उपलब्ध अन्य औषधिको तुलनामा सस्तो र बढी प्रभावकारी हुन्छन् । क्यान्सरका औषधि यसअघि पनि अभाव हुने गरेको थियो । वीर अस्पतालले स्टकमा राखिएको औषधि बिरामीलाई नि:शुल्क दिँदै आएको थियो । मृगेन्द्र–सम्झना चिकित्सा गुठी, डा.ताराबहादुर खत्री ट्रस्टले उपलब्ध गराउने वार्षिक एक लाखसम्मको औषधिले पनि अभाव टार्न सहयोग गर्थ्यो । बजारमा औषधि नपाउँदा बाहिर जँचाइरहेका बिरामीसमेत वीरमा जान्थे । अहिले वीरकै बिरामीलाई औषधि पुगेको छैन ।

स्टकमा राखिएका सबै औषधि खपत भइसकेको डा.आचार्यले बताए । ‘अस्पतालले आन्तरिक रूपमा औषधि जुटाउन सक्ने प्रयास गरिसक्यो । इन्जेक्सनबाट दिनुपर्ने औषधि नपाएपछि खाने औषधि दिइरहेका छौं, जुन महँगो छ र लामो समय खानुपर्छ,’ उनले भने ।

पछिल्ला दिन प्रेस्क्रिप्सन लेखेर बिरामीका आफन्तलाई आफैं औषधि व्यवस्थापन गर्न भनिएको नेपाल क्यान्सर हस्पिटलका निर्देशक तथा क्यान्सर रोग विशेषज्ञ डा.सुदीप श्रेष्ठले बताए । ‘औषधि किन्न भारत पुगेका बिरामी एजेन्टको लहलहैमा लागेर उपचारसमेत उतै गर्छन् । नेपालको औषधि र उपचार गुणस्तरीय छैन भन्दै बिरामी उतै होल्ड गर्छन्, ठग्छन्,’ उनले भने, ‘भारत पुगेपछि १० गुणा बढी खर्चमा उपचार गरेर नेपाल फर्केका धेरै केस छन् ।’
अत्यावश्यक औषधि अभाव हुन नदिन सरकारले स्टक राखेर भए पनि व्यवस्थापन गर्नुपर्ने श्रेष्ठको भनाइ छ ।

विश्वमा क्यान्सर रोग उपचारका लागि नयाँ र धेरै प्रभावकारी औषधि आविष्कार भइसके पनि झन्झटिलो दर्ता प्रक्रियाका कारण ती सहजै नेपाल भित्रिँदैनन् । त्यस्ता औषधि ल्याउन औषधि व्यवस्था विभागले विशेष सिफारिस (पटके) को बाटो अपनाउने गरेको छ । सम्बद्ध चिकित्सकको सिफारिसमा एक पटकका लागि मात्रै भनेर विभागले नेपाल भित्र्याउँछ । महँगो र कम खपत हुने भन्दै आयातकर्ता यस्ता औषधिको कारोबारै गर्न मान्दैनन् । बजार अभाव भइरहने धेरै अत्यावश्यक औषधिमध्ये क्यान्सरका बढी छन् ।

गत वर्ष विभागले क्यान्सरका मात्रै १० थरी औषधि पटकेमा ल्याएको थियो । क्यान्सर र हेपाटाइटिसका औषधि बढी पटके सिफारिसमा आउने गरेका छन् ।

झन्डै तीन महिनाअघि विभागले सरकारी र निजी अस्पताल, चिकित्सक, मेडिकल कलेज र नर्सिङ होमलाई लक्षित गरी अभाव भएका जीवनरक्षक औषधिको सूची मागेको थियो । तर अहिलेसम्म पनि अभाव देखिएका औषधिको व्यवस्थापन गरेको छैन । आन्तरिक समस्या र झमेलाका कारण औषधि अभाव सुल्झाउन नसकिएको विभागका प्रवक्ता सन्तोष केसीले बताए । ‘बजारमा अभाव भनिएका क्यान्सरका औषधिको मूल्य बढ्ने भएकाले अहिले आयात गर्न नसकिएको हो । औषधि आयातकर्ता र चिकित्सकसँग छलफल गरेर सक्दो चाँडो समस्या सुल्झाउँछौं,’ उनले भने ।

प्रकाशित : आश्विन १६, २०७६ ०९:४५
पूरा पढ्नुहोस्
प्रतिक्रिया
पठाउनुहोस्
×