राष्ट्रिय दिवस मनाउँदै चीन, अहिलेसम्मकै ठूलो सैन्य परेड

लक्ष्मी लम्साल

बेइजिङ — जन गणतन्त्र चीन स्थापनाको ७०औं वार्षिकोत्सव अक्टोबर १ तारिख मंगलबार बेइजिङस्थित थ्यानआनमन चोकमा आयोजना गरिएको छ। चिनियाँ कम्युनिष्ट पार्टी केन्द्रीय समितिका महासचिव एवं केन्द्रीय सैन्य आयोगका अध्यक्ष, राष्ट्रपति सी चिनफिङले समारोहलाई सम्बोधन गरे। तत्पश्चात् सैनिक परेड प्रस्तुत गरिएको थियो।

बितेका ७० वर्षदेखि चिनियाँ जनताले सँगसँगै मिलेर अथक प्रयास गरी विशाल उपलब्धिहरु प्राप्त गरेको भन्दै सीले कुनै पनि शक्तिले चीनको स्थान तथा चिनियाँ जनता र चिनियाँ राष्ट्रको अघि बढ्दै गरेको पाइलालाई रोक्न नसक्ने बताए।

सीले चिनियाँ जातिको स्वतन्त्रता र जनताको मुक्तिका साथै मुलुकको समृद्धि र जनताको सुखका लागि अमूल्य योगदान गरेका क्रान्तिकारी पूर्खा र शहीदहरूको सम्झना गर्दै चीनको विकासमा समर्थन गर्ने विभिन्न मुलुकहरूलाई पनि धन्यवाद दिए।

समाजवादी चीन विश्वको पूर्वी भागमा उभिएको र कुनै पनि शक्तिले चीनको स्थानलाई हल्लाउन नसक्ने भन्दै सीले कुनै पनि शक्तिले चिनियाँ जनता र चिनियाँ जातिले अगाडि सारेको पाइलालाई बिथोल्न नसक्ने अठोट गरे। जन गणतन्त्र चीनको स्थापनापछि चीनको दुखद् अवस्थालाई सुखमा परिणत गर्दै पुनः उत्थानको बाटोमा हिंडिरहेको उनले बताए। उनले भने, ‘७० वर्षयता चीनका विभिन्न जातिका जनताले आफ्नो मनलाई एकीकृत गरेर विश्वका लागि आकर्षक उपलब्धि हासिल गर्न सकिएको हो।’

चिनियाँ कम्युनिष्ट पार्टीको नेतृत्वलाई सबैले पच्छ्याउनुपर्ने भन्दै सीले जनतालाई मुख्य मानेर चिनियाँ विशेषतायुक्त समाजवादी बाटोमा अघि बढ्न कम्युनिष्ट पार्टीको आधारभूत विचारधारा, आधारभूत बाटो, आधारभूत रणनीतिको पालनासँगै निरन्तर रुपमा जनताले सुखमय जीवनको अपेक्षालाई पूरा गर्ने, नयाँ ऐतिहासिक उपलब्धि हासिल गर्नेतर्फ अग्रसर हुनुपर्ने बताए।

चीनले शान्तिपूर्ण एकीकरण, एक देश दुई व्यवस्थामा बमोजिम हङकङ तथा मकाउको स्थायित्व, समृद्ध र स्थिरतामा जोड दिएर थाइवान जल डमरुका दुई किनाराबीचको शान्तिपूर्ण विकासलाई अघि बढाउनुपर्ने कुरामा पनि सीले जोड दिए। सीले चीन निरन्तर शान्तिपूर्ण विकासको बाटोमा अघि बढ्ने र आपसी हित तथा साझा विजयसँगै खुला रणनीतिमा रहने साथै विश्वका विभिन्न मुलुकसँग मिलेर मानव हितमा निरन्तर लागिरहने दृढता पनि गरे।

हिजो मानव जातिको इतिहासमा चिनियाँहरू लेखिएको भन्दै सीले आज अरबौं जनताको हातमा सिर्जना रहेकाले चीनको भविष्य उज्यालो हुने बताए। एकीकृत भएर जन गणतन्त्र चीनको विकासलाई सुदृढ पार्ने, 'दुई वटा सय वर्ष'को लक्ष्य तथा चिनियाँ राष्ट्रको पुन :उत्थानको चिनियाँ सपनालाई पूरा गर्न अथक प्रयास गर्न पनि सीले आह्वान गरे।

भव्य सैन्य परेड

चीनले मंगलबार अहिलेसम्मकै भव्य सैनिक प्रदर्शनी गरेको छ। राष्ट्रिय शक्ति प्रदर्शनको रूपमा चीनले वर्षेनी सैन्य परेड देखाउने गरेपनि यो सैनिक परेड अहिलेसम्मकै सबैभन्दा ठूलो भएको चिनियाँ सञ्चारमाध्यमहरूले लेखेका छन्। यसलाई चिनियाँ जन सेनाको समग्र शक्तिमाथिको परीक्षणका रूपमा पनि हेरिएको छ। बेइजिङको छाङ आन सडकमा पंक्तिवद्ध भएका सेनाहरूले राष्ट्रपति सी अभिवादन गरेपछि सैन्य परेड शुरू भएको थियो। चीनले बनाएको लालझण्डा मार्काको गाडीमा बसेर छाङआन सडकमा चिनियाँ सेनाले वर्गाकार शैली बनाएका सेनाको अभिवादन ग्रहण गरेका थिए।

सैनिक परेडमा १५ हजार सैनिकहरुले भाग लिएका थिए भने १६० वटा भन्दा बढी विभिन्न किसिमका विमानहरु र ५८० वटा भन्दा बढी सैनिक उपकरणहरुको प्रदर्शनी गरियो।

चीनले ७०औं वार्षिकोत्सवबाट चिनियाँ विकासको नयाँ युगमा प्रवेशको सन्देश दिएको छ। विश्वमा चीनको प्रभावकारिता यसअघि पहिले यति गहन ठानिएको थिएन। चीनप्रतिको विश्वको ध्यानाकर्षण यसपटक झन गहिरो बन्दै गएको छ।

प्रकाशित : आश्विन १४, २०७६ १३:४९
ADVERTISEMENT
प्रतिक्रिया
पठाउनुहोस्
ADVERTISEMENT

ल्हासास्थित महावाणिज्य दूतावासको भवन तयार

लक्ष्मी लम्साल

बेइजिङ — चीनको तिब्बत स्वशासित क्षेत्रस्थित ल्हासामा रहेको नेपाली महावाणिज्य दूतावासको नयाँ भवन एक वर्षमा निर्माण सम्पन्न भएको छ।

गत वर्ष सेप्टेम्बर ७ तारिखमा ल्हासामा भएको चौथो अन्तर्राष्ट्रिय चीन तिब्बत पर्यटन तथा सांस्कृतिक एक्स्पोमा सहभागी हुन आएका सभामुख कृष्णबहादुर महराले भवन निर्माणको शिलान्यास गरेका थिए। शुक्रबार एउटा कार्यक्रम गरी तिब्बतले भवन निर्माणको कार्य पूरा भएको जनाएको हो ।

परिसरभित्र भिसा भवन, आवासीय भवन, व्यापारिक भवन, पानी तान्ने भवन, ग्यारेज लगायत ६ वटा एकतलेदेखि तीनतलेसम्मका भवनहरू रहेका छन्। भवन निर्माणको अवधिभर वाणिज्य दूतावासको कार्यालय होटलमा राखेर सञ्चालन गरिएको छ। भवनभित्रका केही फर्निचरहरू जोड्न बाँकी रहेकाले करीब एक महिनाभित्रै दूतावासको कार्यालय नयाँ भवनमा सर्ने महावाणिज्यदूत गोविन्दबहादुर कार्कीले बताए।

यसअघि सन् १९७८ मा बनेको ४० वर्ष पुरानो एकतले टायलको घर जीर्ण भएपछि केन्द्र सरकारको अनुमतिमा तिब्बतले नै नयाँ भवनहरू निर्माण गरिदिएको हो। निर्मित संरचनाहरू नेपाली डिजाइनका छन् ।

चीन आफैंले करीब ४०/४५ करोड रुपैयाँ लागत खर्च व्यहोरेपनि डिजाइन र नेपालीपन झल्काउनमा नेपालको हात रहेको कार्कीले बताए । भवनको हालको स्वरुपमा रंग, गजुर र मौलिकता झल्काउनका लागि सहयोग गरेको बताउँदै कार्कीले थपे, ‘नेपालको परराष्ट्र मन्त्रालयको भवन विभागका इन्जिनयरहरूले नेपालीपन झल्किने गरी नक्सा बनाउन योगदान गरेका छन्।’

सन् २०१७ मा ल्हासाका उपमेयर चाओ थाओ र कार्कीले महावाणिज्य दूतावासको पुनःनिर्माण तथा भवन निर्माणसम्बन्धी परियोजनामा हस्ताक्षर गरेपछि पुराना भवनहरू निर्माणको प्रक्रियाले गति लिएको थियो। छिट्टै भवन हस्तान्तरण समारोह गरेपछि भवनमा प्रवेश गर्ने साइत जुराइने कार्कीले सुनाए ।

निर्माण समापन समारोहमा बोल्दै तिब्बतकी विदेश मामिला कार्यालयकी निर्देशक पाइ मान याङचोङले चीन र नेपाल नदी र पहाड तथा दाँत र ओठ जोडिएजस्तै असल छिमेकी भएको बताइन् । उनले भनिन्, ‘नेपाल र चीन असल छिमेकी, असल साझेदार, असल साथी हुन् । ’

चीन र नेपालबीच दौत्य सम्बन्ध स्थापना भएको ६४ वर्षमा दुवै देशबीचको सम्बन्ध स्वस्थ तथा स्थिर रूपमा विकसित भएको उनको भनाइ थियो। मैत्रीपूर्ण आदान प्रदान तथा आपसी विश्वासको स्तरपनि निकै बलियो बनेको बताउँदै उनले थपिन्, ‘आर्थिक तथा व्यापारिक वातावरण अझै उन्नत भएको छ, मानवीय आदानप्रदान विस्तृत हुँदै गएको छ।’

महावाणिज्यदूत कार्कीले नयाँ चीन स्थापनाको ७०औं वार्षिकोत्सवमा चीन सरकार, चिनियाँ कम्युनिष्ट पार्टी तथा तिब्बत सरकारलाई सामाजिक तथा आर्थिक विकासमा प्राप्त उपलब्धीप्रति बधाइ दिए । ‘ल्हासाको महावाणिज्य दूतावासको नयाँ भवन निर्माण परियोजना निकै महत्वपूर्ण काम थियो, कार्कीले भने’, ‘नयाँ संरचना तथा उपकरणको प्रयोगले महावाणिज्य दूतावासको काममा चुस्तता आउनेछ।’

महावाणिज्यदूत कार्कीले तिब्बतमा निर्मित नवनिर्मित भवन हस्तारण भएपछि नेपाल सरकार र नेपालीले चीनले दिएको उपहारको रूपमा यसलाई आत्मीयताका साथ सम्झिरहने बताए।

प्रकाशित : आश्विन १३, २०७६ १७:०५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT