बेलायतमा पढाइपछि 'वर्किङ भिसा’

नवीन पोखरेल

लन्डन — बेलायतमा अध्ययन सकेका अन्तर्राष्ट्रिय विद्यार्थीले दुई वर्षसम्म वर्किङ भिसा पाउने भएका छन् । सरकारले शैक्षिक सत्र २०२०/२१ देखि यस्तो नियम लागू गर्ने घोषणा गरेको छ । 

बेलायतको फिल्टनस्थित एसजीएस कलेजका विद्यार्थीसँग साजिद जाबिदलगायत राजनीतिज्ञ ।तस्बिर : रोयटर्स

सन् २०१२ मा तत्कालीन गृहमन्त्री टेरेजा मेको पालामा हटाइएको ‘पोस्ट स्टडी वर्क भिसा’ व्यवस्था पुनः ल्याउन लागिएको होम अफिसको अध्यागमनसम्बन्धी पछिल्लो श्वेतपत्रमा उल्लेख छ । अहिले स्नातक वा स्नातकोत्तर अध्ययन सकेपछि ४ महिना मात्र काम गर्न छुट छ ।

प्रधानमन्त्री बोरिस जोन्सनले घोषणा गरेको नयाँ रणनीतिको मूल उद्देश्य अन्तर्राष्ट्रिय विद्यार्थीलाई बेलायती विश्वविद्यालयमा आकर्षित गर्नु छ । युरोपियन कानुनअनुसार बेलायती र ईयू विद्यार्थीलाई वर्षको ९ हजार २५० पाउन्ड ट्युसन फी तोकिएको छ तर अन्तर्राष्ट्रिय विद्यार्थीलाई ‘लिमिट’ छैन् ।

यसको मतलब अन्तर्राष्ट्रिय विद्यार्थीलाई बेलायती विश्वविद्यालयले आफ्नै ढंगले शुल्क लिन सक्ने छन् । ‘अन्तर्राष्ट्रिय विद्यार्थीलाई पढाइपछि काम गर्ने अधिकार दिइनु स्वागतयोग्य कुरा हो,’ बेलायतमा पीएचडी गरिरहेका विद्यार्थी अभियन्ता गणेश खड्का भन्छन्, ‘तर नेपालबाट कन्सलटेन्सीहरूले यसको दुरुपयोग गर्न सक्नेतर्फ पनि विद्यार्थी चनाखो हुन जरुरी छ ।’

बेलायतले करिब एक दशकअघि नियम खुकुलो बनाउँदा यसको व्यापक दुरुपयोग भएपछि अध्यागमन नियममा कडाइ गरिएको थियो । अन्तर्राष्ट्रिय विद्यार्थीले बेलायतलाई वर्षको प्रत्यक्ष/अप्रत्यक्ष करिब २० बिलियन पाउन्ड योगदान गरिरहेका बताइन्छ । हाल बेलायती विश्वविद्यालयमा ४ लाख ६० हजार अन्तर्राष्ट्रिय विद्यार्थी अध्ययनरत छन् ।

रेस्टुरेन्टको 'वर्क परमिट’ खुकुलो
बेलायत सरकारले काम गर्नका लागि आफ्नो देश आउने कामदारका लागि अध्यागमन नियम खुकुलो पारेको छ । अध्यागमन नियममा कडाइ, ब्रेक्जिट अन्योल र दक्ष सेफ अभावले संकट बेहोरिरहेका बेलायतस्थित रेस्टुरेन्ट व्यवसायीले यसबाट राहत पाउने देखिएको छ ।

बेलायतमा रेस्टुरेन्ट व्यवसाय सञ्चालन गर्ने नेपालीहरूको संख्या उल्लेख्य छ । ‘टेक अवे’ अफर गर्ने फाइन डाइन रेस्टुरेन्टले समेत अब ‘टियर टु’ अन्तर्गत बाहिरी मुलुकबाट दक्ष सेफ झिकाउन पाउने नियम सरकारले सार्वजनिक गरेपछि व्यवसायीलाई राहत मिल्ने भएको हो ।

यसअघि सेफ जागिर ‘सर्टेज अकुपेसन’ लिस्टभित्र परे पनि ‘टेक अवे’ उपलब्ध गराउने रेस्टुरेन्ट सञ्चालकलाई तेस्रो मुलुकबाट सेफ झिकाउन रोक लगाइएको थियो । यस अतिरिक्त यूकेबाटै भिसा बढाउन आवेदन दिँदा पनि अस्वीकृत हुँदै आएको थियो ।
कठोर अध्यागमन नियमका कारण बाहिरबाट सेफ झिकाउन सम्भव नभएपछि ब्रिटेनको करी उद्योग (रेस्टुरेन्ट व्यवसाय) संकटबाट गुज्रिरहेका थिए ।

टियर टु (वर्क परमिट) भिजा र स्पोन्सरसिप लाइसेन्सको काम गर्दै आएको भिजा क्वेस्टका निर्देशक एवं कानुनी सल्लाहकार विष्णु खरेल सरकारको नयाँ नियमले रेस्टुरेन्ट व्यवसायीलाई राहत हुने बताउँछन् ।

तर, उनले ३० हजार पाउन्ड वार्षिक तलब थ्रेसहोल्ड, अंग्रेजी परीक्षा उत्तीर्ण, ५ वर्ष काम गरेको अनुभव र कोटा सिस्टम भने कायमै रहेको जनाए । ‘टेक अवे सर्भिस भएको रेस्टुरेन्टबाट भिसा थप्न पठाउँदा शतप्रतिशत अस्वीकार हुने गरेको थियो,’ विगत दस वर्षदेखि यही क्षेत्रमा संलग्न खरेलले भने, ‘यसको सिकार नेपाली कामदार र रेस्टुरेन्ट सञ्चालकहरू पनि भएका थिए ।’

बाहिरबाट सेफ झिकाउन सम्बन्धित रेस्टुरेन्टले ‘रेस्ट्रिक्टेड सर्टिफिकेट अफ स्पोन्सरसिप’ का लागि आवेदन दिनुपर्छ । होम अफिसले लाइसेन्ससहित निश्चित कोटा दिएपछि नेपाल वा अन्य मुलुकबाट सेफ झिकाउन सकिन्छ ।

बेलायतकी गृहमन्त्री प्रीति पटेलले ब्रिटिस करी हाउसलाई जोगाउन नयाँ नियम ल्याइएको जनाएकी छन् । ब्रेक्जिटपछि आउने पोइन्ट्समा आधारित अध्यागमन प्रणाली अगाडि रेस्टुरेन्टहरूलाई उच्च दक्ष सेफ ल्याउन सहज हुने गरी नियम परिवर्तन गर्न लागिएको गृहमन्त्री पटेलले बताएको ‘द सन’ पत्रिकाले उल्लेख गरेको छ ।

बेलायत उत्कृष्ट खानाका लागि विश्वमै परिचित रहेको र नयाँ परिवर्तनले झन् यसको साख बढ्ने उनले बताएकी छन् । दक्ष सेफ अभाव, बढ्दो भाडा र अन्य खर्चका कारण बेलायतमा साताको दुइटा करी हाउस बन्द भइरहेको अनुसन्धानले जनाएको छ । रेस्टुरेन्ट व्यवसायीले मन्त्रीहरूलाई वर्षौंदेखि नियम खुकुलो बनाइदिन आग्रह गर्दै आएका थिए । सत्तारूढ कन्जरभेटिभ पार्टी सरकारमा आएपछि आप्रवासी नियन्त्रण गर्ने भन्दै अध्यागमन नियममा कडाइ गरिएको थियो ।

नेप्लिज क्याटरिङ एसोसिएसन यूके अध्यक्ष विजय थापा अध्यागमन नियम खुकुलो बनाइदिन आफूहरूले संस्थागत तथा व्यक्तिगत रूपमा धेरै अनुरोध गरेको स्मरण गरे । ‘ठूला कम्पनीले त सक्लान् तर फेमिली रन बिजनेसले वर्षको ३० हजार पाउन्ड तिरेर सेफ ल्याउन अझै पनि गाह्रो छ,’ थापाले भने ।

कामदार अभाव र अन्य ‘कम्प्लायन्स’ का कारण कैयौं नेपाली रेस्टुरेन्ट बन्द भइरहेको पनि उनले जानकारी दिए । बेलायतमा नेपालीका करिब ३ सय रेस्टुरेन्ट भएका अनुमान छ ।

प्रकाशित : भाद्र २७, २०७६ ०८:२९
प्रतिक्रिया
पठाउनुहोस्

आत्महत्या घटाउन 'आर यु ओके ?’

नारायण खड्का

अस्ट्रेलिया — अंग्रेजी भाषाको वाक्य ‘आर यु ओके ?’ अर्थात् तपाईं ठीक हुनुहुन्छ ? सुन्दा जति सामान्य लाग्छ, यसको भित्री अर्थ उति नै गहन छ । यही वाक्यको महत्त्वलाई अस्ट्रेलियाले विश्वव्यापी रूपमा जीवनबाट हरेस खाएकाहरूलाई जीवन जिउन प्रेरित गर्ने उद्देश्यका साथ फैलाउने अभियान सुरु गरेको छ । 

अस्ट्रेलियामा आत्महत्याको संख्या बर्सेनि बढिरहेको छ । उपलब्ध तथ्यांकअनुसार सन् २०१७ मा ३ हजार १ सय बढीले आत्महत्या गरेका छन् । आजभन्दा १० वर्षअघि सामान्य कुराकानीले जीवनमा परिवर्तन ल्याउन सक्छ भन्ने उद्देश्यले यो अभियान सुरु गरिएको थियो । अभियानअन्तर्गत आफ्ना साथीभाइ, आफन्त, काम गर्ने सहकर्मीहरूका साथै सबैलाई ‘आर यु ओके ?’

अर्थात् तपाईंलाई ठीक छ भनेर सोध्न प्रेरित गर्ने गरिएको छ । ‘एउटा सानो कुराकानी वा सामाजिक सम्बन्धले पनि मानिसको जीवनमा ठूलो सकारात्मक परिवर्तन ल्याउन सक्छ र यसको महत्त्व त्यसैले पनि धेरै छ ।’ यस अभियानका सुरुवातकर्तामध्येका गाभिन कोअनले भनेका छन् । उनले विगत १० वर्षमा यो अभियानले धेरैको जीवनमा परिवर्तन ल्याउन सकेको बताउँदै यसलाई अन्तर्राष्ट्रिय रूपमा लैजाने पहल सुरु गरिएको बताए ।

पछिल्लो समयमा नेपाली समुदायमा समेत मानसिक रोग बढ्दै गएको छ । यसका साथै आत्महत्याका घटनासमेत भइरहेका छन् । मानसिक रोगको क्षेत्रमा काम गर्ने नेपाली विशेषज्ञहरूका अनुसार कम्तीमा ५ जनामा एकलाई मानसिक रोगको समस्या देखिएको छ ।

यो अभियान हामीले नेपाली समुदायमा फैलाउन सकिएको खण्डमा समेत मानसिक रोग र यसबाट पीडित भएका नेपाली सर्वसाधारणका बारेमा जानकारी पाउन सकिने यसै क्षेत्रमा सामाजिक कार्यकर्ताका रूपमा काम गरिरहेकाहरूको भनाइ छ । ‘यो तीन शब्द सुन्दा जति सामान्य र सरल लाग्छ, यसलाई व्यवहारमा उतारेर आफ्ना साथीभाईको समस्या बुझ्न सक्ने हो भने यो अत्यन्तै प्रभावकारी हुन्छ ।’

यहाँस्थित सामाजिक संस्था रिलेसनसिप अस्ट्रेलियामा रहेर नेपाली समुदायका क्षेत्रमा काम गरिसकेका नवीन पन्त सुनाउँछन् । अहिले एनआरएनको उपाध्यक्ष बनेका उनी एनआरएनले आफ्नो महिला फोरमअन्तर्गत यसलाई अझ प्रभावकारी रूपमा अघि बढाउने दाबी गर्छन् । अस्ट्रेलियामा सेप्टेम्बर १२ तारिखमा यसलाई ‘आर यु ओके ?’ दिनका रूपमा मनाइने गरिन्छ । यहाँका सरकारीका साथै निजी कार्यस्थलहरूमा समेत यस अभियानका बारेमा खुलेर कुराकानी गर्न प्रेरित गरिन्छ । ‘यो कुराकानीको सुरुवात गरेर मानिसको जीवनमा परिवर्तन ल्याउन गरिएको सानो पहल हो ।’

संस्थाले हालै जारी गरेको वार्षिक प्रतिवेदनमा भनेको छ । यो अभियानअन्तर्गत सहयोगपाउनका लागि प्रेरित गर्ने, स्थानीयहरूमा आत्महत्या– लगायतका विषयमा जनचेतना जगाउनेलगायतका छन् ।

प्रकाशित : भाद्र २७, २०७६ ०८:२७
पूरा पढ्नुहोस्
प्रतिक्रिया
पठाउनुहोस्