कश्मीरबारे सर्वोच्चले सुनुवाइ गर्ने 

(एजेन्सी)

नयाँदिल्ली — भारतको सर्वोच्च अदालतले जम्मु–कश्मीर राज्यको विशेषाधिकार खोस्ने केन्द्र सरकारको निर्णयविरुद्ध परेका निवेदनको सुनुवाइ गर्ने जनाएको छ । 

नरेन्द्र मोदी नेतृत्वको सरकारले गत अगस्ट ५ मा जम्मु–कश्मीरको विशेषाधिकार खोस्ने निर्णय गरेको थियो । उक्त कदमपछि कश्मीर अझै समान्य बन्न सकेको छैन भने पाकिस्तानसँगको सम्बन्धसमेत थप बिग्रेको छ ।

भारत प्रशासित कश्मीरको विशेष संवैधानिक मान्यता खोस्ने निर्णयविरुद्ध हालसम्म १४ मुद्दा परिसकेका छन् । सर्वोच्चले ती मुद्दाको सुनुवाइ अक्टोबर पहिलो साताबाट सुरु गरिने जनाएको छ । सर्वोच्चका ५ न्यायाधीशको संवैधानिक इजलासले ती निवेदनबारे सुनुवाइ गर्ने भारतीय सञ्चारमाध्यमले जनाएका छन् ।

अदालतले कश्मीरमा टेलिफोन तथा इन्टरनेट बन्द गरिएको तथा सञ्चारमाध्यममाथि प्रतिबन्ध लगाइएको विरोध गर्नेलाई चित्तबुझदो जवाफ दिनसमेत सरकारका नाममा आदेश जारी गरेको छ ।
सरकारको उक्त निर्णयपछि सर्वसाधारण तथा कतिपय नेतालाई जम्मु–कश्मीरको भ्रमण गर्नसमेत रोक लगाइएको छ । अदालतले उक्त कदम तत्काल रोक्नसमेत सरकारलाई आदेश दिएको छ ।
भारतीय जनता पार्टीले नेतृत्वको सरकारले कश्मीरमा हिंसा फैलन नदिन तथा शान्ति सुरक्षा कायम राख्न त्यस्ता बन्देज लगाउनुपरेको दाबी गर्दै आएको छ ।

भारतीय संविधानको धारा ३७० को खारेजीसँगै कश्मीरमा सुरु भएको विरोध प्रदर्शन रोक्न ठूलो संख्यामा सुरक्षाकर्मी परिचालन गरिएको छ । हिंसात्मक घटनामा हालसम्म कति मानिस हताहत भए वा घाइते छन् भन्ने स्पष्ट छैन । स्थानीय राजनीतिज्ञ, अभियानकर्मी, व्यापारीलगायत हजारौं अझैसम्म पनि थुनामा छन् ।

प्रकाशित : भाद्र १२, २०७६ २२:०२
ADVERTISEMENT
प्रतिक्रिया
पठाउनुहोस्
ADVERTISEMENT

चन्द समूहका कार्यकर्ताले गरे आत्मसर्मपण

कान्तिपुर संवाददाता

बागलुङ — नेत्रविक्रम चन्द समूहको सदस्यमा रहेर विध्वंसात्मक कार्यमा संलग्न भएको आरोपमा समातिएका एक युवाले जिल्ला प्रशासनमा आत्मसर्मपण गरेका छन् । 

ढोरपाटन नगरपालिका १ का हरिबहादुर कुँवरले बिहीबार आत्मसमर्पण गरेर स्वतन्त्र व्यवसाय गर्ने बताए । एनसेलको टावर आक्रमणपछि चन्द समूहमा संलग्न भएको आशंकामा उनलाई प्रहरीले तीन साताअघि पक्राउ गरेको थियो ।

‘विध्वंसको राजनीति नगर्ने, प्रचलित कानुन मान्ने र स्वतन्त्र व्यवसाय गरेर बस्ने लिखित प्रतिबद्धता जनाएपछि उनलाई रिहा गरिएको छ,’ प्रमुख जिल्ला अधिकारी लुकबहादुर क्षेत्रीले भने, ‘शान्तिसुरक्षा कायम राख्ने काममा पनि साथ दिन्छु भनेका छन् ।’ उनी बुर्तिबाङ बजारमा व्यवसाय गर्दै आएका छन् । राष्ट्रिय जनमोर्चाको राजनीतिमा लागेका कुँवर नेकपा माओवादी, वैद्य समूह हुँदै चन्द समूहमा लागेका थिए ।

प्रकाशित : भाद्र १२, २०७६ २१:४५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT