आप्रवासी नीति कडा पार्दै अस्ट्रेलिया

नारायण खड्का

अस्ट्रेलिया — अस्ट्रेलियाले आफ्नो आन्तरिक सुरक्षालाई मजबुत बनाउने उद्देश्यले आप्रवासी नीति कडा पार्ने तयारी गरेको छ । आप्रवासी नियममा पछिल्लो समय कडाइ गर्दै आएको सरकारले विदेशी नागरिकले आफ्नो देशमा कुनै अपराध गरेको खण्डमा उनीहरूको देशमा फिर्ता पठाउने नियममा परिमार्जन गर्न लागेको हो । 

आप्रवासीका लागि सुरक्षित देशका रूपमा चिनिँदै आएको अस्ट्रेलियाले आफ्नो आन्तरिक सुरक्षा र व्यवस्थालाई मध्यनजर गर्दै आप्रवासी नियम परिवर्तन गरी कडाइ गर्न लागिएको हो । परिवर्तित नियमअनुसार कुनै पनि अपराधमा एक वर्ष जेल सजाय भोगेका व्यक्तिलाई देशनिकाला गर्दै आएको अस्ट्रेलियाली सरकारले अबदेखि कुनै जेल सजाय नभोगेका विदेशी नागरिकलाई समेत उनीहरुको देश फिर्ता पठाउन सक्ने भएको छ । कुनै पनि सजायमा दुई वर्षसम्म सजाय तोकिएको खण्डमा उनीहरुलाई अस्ट्रेलिया सरकारले अबदेखि उनीहरुकै देशमा फिर्ता पठाउने भएको हो । यससम्बन्धी नयाँ नियमबारे अध्यागममन्त्री डेभिड कोलम्यानले सार्वजनिक गरेका छन् ।

‘वास्तवमा यो आप्रवासीहरूप्रति कठोर रूपमा प्रस्तुत हुनेभन्दा पनि आफ्नो देशको भाइचारा र सुरक्षालाई ध्यान दिएर ल्याउन लागिएको नियम हो,’ अध्यागमन विषयका विज्ञ सञ्जीव पाण्डेले कान्तिपुरसँग भने । उनको भनाइमा पछिल्लो समय अस्ट्रेलिया देशको आन्तरिक सुरक्षा र सद्भावमा केन्द्रित भएका कारणसमेत नयाँ नियम ल्याइरहेको हो । कुनै पनि देशले आफ्नो देशका नागरिक तथा व्यवस्थाको सुदृढीकरणका लागि ल्याउने नयाँ नियमहरुलाई अन्यथा मान्न नहुने उनको भनाइ छ ।

स्थानीय सञ्चारमाध्यमका अनुसार ६ वर्षको अन्तरालमा अस्ट्रेलियाले ४ हजार ७ सय विदेशी नागरिकलाई उनीहरुकै देशमा फिर्ता पठाइसकेको छ । जसमा नेपालीहरूको संख्या समेत उल्लेख्य रूपमा रहेको जानकारहरूको भनाइ छ । अस्ट्रेलियाली कानुनमा विद्यावारिधि गरेका डा. शमशेरसिंह थापा अस्ट्रेलियाली समाज र नागरिकलाई कुनै खतरा हुने अवस्था आएमा विदेशीलाई उनीहरुकै देश फिर्ता पठाउने उद्देश्यका साथ नयाँ नियम ल्याइएको बताउँछन् ।

‘अस्ट्रेलिया सरकारले केही समयदेखि आफ्नो देश र नागरिकलाई सुरक्षा दिने उद्देश्यका साथ नियमहरू परिवर्तन गरिरहेको छ,’ उनले कान्तिपुरसँग भने, ‘देशको शान्ति सुरक्षामा खलल पुर्‍याउने कुनै कार्य गरेको थाहा पाए सरकारले जोसुकैलाई पनि फिर्ता पठाउन सक्छ । ’

अस्ट्रेलियाले पछिल्लो समय विदेशका दक्ष कामदारलाई भित्र्याउने तथा यहाँका आपराधिक गतिविधिमा संलग्न भएकालाई फिर्ता पठाउने नीति लिँदै आएको छ । चारित्रिक जाँचमा उत्तीर्ण नहुनेलाई फिर्ता पठाउने उद्देश्यका साथ परिवर्तन गर्न लागिएको नयाँ नियमले दशौं हजार विदेशीलाई समस्यामा पार्ने भन्दै सरकारको नयाँ नियमको विरोधसमेत गरिएको छ ।

अस्ट्रेलियाका अध्यागमनमन्त्री कोलम्यानले यसले गैरनागरिकलाई यहाँको समाज कुनै पनि अपराधमा दोषी ठहरिएकाहरुका लागि सहनशील नभएको सन्देश दिने बताएका छन् । अस्ट्रेलियामा बसोबास गर्न पाउनु विशिष्ट अधिकार भएको उनको भनाइ छ । उनले अस्ट्रेलियामा रहेर यहाँको कानुन तोड्न खोज्ने र सामाजिक संवेदनामा खलल पुर्‍याउनेले उनीहरुको विशेषाधिकार गुमाउने जनाए ।

प्रकाशित : श्रावण २७, २०७६ २०:५५
प्रतिक्रिया
पठाउनुहोस्

स्थानीय योजनामा भारतीय कामदार

आनन्द गौतम

ताप्लेजुङ — फुङलिङ नगरपालिका– २ नागेश्वरीका छत्र लिम्बू विदेशमा छन् । रोजगारीकै लागि मलेसिया पुगेका उनी त्यहाँ निर्माण क्षेत्रमा काम गर्छन् । तीन वर्षअघि विदेसिएका उनले पठाएको रकमबाट घरखर्च चलेको परिवारका सदस्य बताउँछन् । 

यही गाउँका लोकनाथ गुरागाइँ पनि विदेशमै छन् । उच्च शिक्षा पढदापढदै बिदेसिएका उनी प्रत्येक दुई वर्षमा आउँछन् र जान्छन् । कतारको प्रचण्ड गर्मीमा काम गर्न कठिन भए पनि साथीभाइसँग बिदेसिनु बाध्यता भएको भनी सुनाउँछन् । छत्र र लोकनाथ मात्रै नभएर यो गाउँका धेरै युवा विदेशमा छन् । कतिपय बाध्यताले होलान्, कतिपय भने लहैलहैमा पनि बिदेसिएका हुन् ।

हिजोआज गाउँदेखि नगरसम्म विकास निर्माण भइरहेका छन् । कतै सडकको काम भएको छ त कतै पुल बनिरहेका छन् । तमोर नदीको दोभानदेखि दगुर्नेसम्म तीनवटा ठूला मोटरेबल पुल निर्माणाधीन रहेका छन् । यी प्रत्येक पुल कम्तीमा १० करोड रुपैयाँका हुन् । सानिमा हाइड्रो इनर्जीले पनि खोक्लिङको थुम्वामा पुल बनाइरहेको छ । गाउँका युवा रोजगारीका लागि बिदेसिएका छन् तर यहाँकै निर्माण व्यवसायी कामदार नपाएको दुःखेसो पोख्छन् । उनीहरूले आफूले पाएको ठेक्का पूरा गर्न भारतीय मजदुरको भर पर्नुपरेको सुनाउँछन् । बन्दैगरेका पुलमा काम गर्ने गाउँका युवा नभएर भारतीय मजदुर मात्रै भेटिन्छन् ।
निर्माण व्यवसायी महासंघका उपाध्यक्ष दिपेन पोमुको भारतीय मजदुर लगाउनु बाध्यता भएको दाबी छ । ‘एक त गाउँमा काम गर्ने मान्छे नै छैन,’ पोमुले भने, ‘भएकाहरू पनि ध्यान दिएर समयभर काम गर्नै मान्दैनन् ।’ अहिलेका राजनीतिमा निर्माण व्यवसायीको संलग्नता रहेकाले गाउँका युवालाई काम दिएर भोट बढाउने सम्भावना नरहेको उनले बताए ।

काबेली ए हाइड्रो पावरका प्रबन्धक इन्जिनियर वीरेन्द्र श्रेष्ठ तीन कारणले विदेशबाट कामदार ल्याउनु परेको बताउँछन् । एक, भारतबाट ल्याएका कामदार दक्ष हुन्छन्, हात छिटो चलाउँछन् र कामले गति पाउँछ । दुई, उनीहरू बिहानदेखि बेलुकासम्म काम गर्छन् । तीन, दिनहुँजसो पैसा खोज्नु र दिनुपर्ने बाध्यता हुँदैन आउने बेलामा पेस्की र जाने बेलामा एकमुष्ट पैसा दिए पुग्छ । नेपाली कामदारको भने निरन्तरता नहुने, दिनहुँ पैसा दिनुपर्ने र घरायसी समस्या देखाएर पेस्की माग्ने र काममा कम दक्षता रहेको उनले सुनाए । नेपालीको तुलनामा भारतीय कामदार सस्तो पनि भएको निर्माण व्यवसायी बताउँछन् ।

पुलको फलाम जोड्नमा त शतप्रतिशत जस्तो भारतीय मजदुर कार्यरत छन् । ढलानलगायतको काम नेपालीले गरे पनि राम्रो दक्षता नभएको र बिग्रिए दोहोरो झन्झट बेहोर्नुपर्ने भएको व्यवसायीको तर्क छ । काममा दक्षता राखे र इमान्दारिता प्रदर्शन गर्न सके नेपाली नागरिकले पनि धेरै हदसम्म रोजगारी पाउने व्यवसायी उदय आङवोहाङ बताउँछन् ।

उनका अनुसार निर्माण क्षेत्रमा काम गर्नेले विदेशमा जत्तिकै श्रम पनि पाउँछन् । ‘यहींका भए ल्याउने लैजाने झन्झट हुँदैन र केही बढी नै पैसा पनि दिन सकिन्छ,’ उदयले भने, ‘तर दक्षता नभए आफैं फस्न सक्ने भएकाले त्यसमा चाहिँ सम्झौता हुँदैन ।’

प्रकाशित : श्रावण २७, २०७६ २०:४३
पूरा पढ्नुहोस्
प्रतिक्रिया
पठाउनुहोस्