हङकङ प्रदर्शन : अमेरिका र चीनबीच वाक्युद्ध

हङकङ विमानस्थलमा उत्रे प्रदर्शनकारी 
एजेन्सी

हङकङ — हङकङमा हालै भएका सरकारविरोधी प्रदर्शन चर्कदै जाँदा अमेरिका र चीनबीच वाक्युद्ध सुरु भएको छ । हङकङस्थित अमेरिकी कूटनीतिज्ञले प्रदर्शनकारीसँग कुराकानी गरेको तस्बिर चिनियाँ सरकारी सञ्चारमाध्यमले बिहीबार सार्वजनिक गरेपछि अमेरिकाले ‘हिंस्रक शासक’ को संज्ञा दिएको थियो । उक्त आरोप खारेज गर्दै चीनले अमेरिकालाई ‘गुन्डागर्दी’ तर्क गरेको जनाएको छ । 

लोकतन्त्रका पक्षधर प्रदर्शनकारीले हङकङ विमानस्थलमा शुक्रबार गरेको विरोध  । तस्बिर : एपी

हङकङ सरकारले ल्याएको विवादास्पद सुपुर्दगी विधेयकको विरोधमा सुरु भएको प्रदर्शन पछिल्ला दिनमा लोकतन्त्रका विभिन्न मुद्दामा केन्द्रित छ । पछिल्ला प्रदर्शनहरूमा विवादास्पद सुपुर्दगी विधेयक फिर्ता, कार्यकारी प्रमुख क्यारी लामको राजीनामा तथा प्रहरी दमनको स्वतन्त्र छानबिन माग गरिएको छ ।

यसै क्रममा प्रदर्शनकारीले शुक्रबारदेखि हङकङ विमानस्थलमा ३ दिने विरोध सुरु गरेका छन् । उनीहरूले आफ्ना मागप्रति अन्तर्राष्ट्रिय समर्थन जुटाउन भन्दै विमानस्थलमा विरोध गरेका हुन् । विरोधमा हजारौं सहभागी छन् । एएफपीका अनुसार प्रदर्शनकारीले ‘तानाशाही शासन र प्रहरी दमनबाट हङकङलाई बचाऊ’ भन्दै नारा लगाइरहेका छन् । गतसाताको आमहडतालका कारण २ सयभन्दा बढी हवाई उडान रद्द भएका थिए ।

बिहीबार चीनले अमेरिकालाई आफ्ना कूटनीतिज्ञ हङकङको विरोध प्रदर्शनको नेतृत्वसँग सम्पर्कमा रहेको भन्दै विवरण मागेको थियो । बेइजिङ समर्थित ता कुङ पावो अखबारले अमेरिकी कूटनीतिज्ञ जुली एडेहले एक होटलमा विद्यार्थी नेतासँग भेटवार्ता गरेको तस्बिर ‘विदेशी शक्तिको हस्तक्षेप’ शीर्षकमा छापेको थियो ।

हङकङमा राजनीतिक संकट बढाउन अमेरिकाले साँठगाँठ गरेको चीनको आरोप छ । अमेरिकाले उक्त आरोप अस्वीकार गर्दै ‘आफ्नो देशका कूटनीतिज्ञले सरकारीदेखि व्यावसायिक तथा अन्य विभिन्न व्यक्तिहरूसँग भेटघाट गर्ने गरेका’ जनाएको छ । अमेरिकी विदेश मन्त्रालयका प्रवक्ता मोर्गन डिन आर्टागसले पत्रकारहरूसँग भनेकी छन्, ‘मलाई लाग्छ यो औपचारिक विरोध होइन, यो हिंस्रक राज्यले जे गर्छ त्यही हो ।’

उनले चीनले जिम्मेवार राष्ट्रले जस्तो व्यवहार नगरेको समेत आरोप लगाइन् । गतसाता गरिएको बृहत् विरोधपछि चीनले प्रदर्शनकारीलाई ‘आगोसँग खेल्ने प्रयासले आफैंलाई जलाउने’ चेतावनी दिएको थियो । हङकङस्थित चिनियाँ प्रमुख कार्यालयका प्रवक्ताले प्रदर्शनकारीलाई ‘केन्द्रीय सरकारको संयमलाई कम नआँक्क’ भनेका थिए ।

विश्वकै शान्तमध्येको सहर हङकङमा गरिएका विरोधका क्रममा प्रदर्शनकारी र प्रहरीबीच हिंसात्मक घटना हुने गरेका छन् । पछिल्ला सातामा प्रदर्शनकारी, प्रहरी र आपराधिक समूहसँग निकट ठानिएका मुखुन्डोधारीबीच हिंसात्मक झडपहरू हुन थालेका हुन् ।
विगतका प्रदर्शनमा केही सहभागी चिनियाँ सरकारी कार्यालयतर्फ अघि बढेपछि प्रहरीले हस्तक्षेप गरेको थियो । कार्यालय रहेको भवनको ढोकामाथिको चिनियाँ प्रतीकमा प्रदर्शनकारीले तोडफोड प्रयास गरेपछि चिनियाँ अधिकारीले उक्त कदम ‘सह्य नहुने’ चेतावनी दिएका थिए ।

अपराध तथा बलात्कार आरोपीलाई मुख्यभूमि चीनमा सुपुर्दगी गर्ने प्रावधानसहितको विधेयक ल्याएपछि हङकङमा प्रदर्शन चर्केको हो । चिनियाँ न्याय प्रणालीले हङकङका जनता पीडित हुने प्रदर्शनकारीको दाबी छ । विधेयकले हङकङको स्वतन्त्रतालाई अवमूल्यन गर्ने र राजनीतिक कार्यकर्ता निसानामा पर्ने भदै विशाल प्रदर्शन गरिँदै आएको छ ।

सन् १९९७ मा स्वतन्त्र हुनुअघि बेलायतको उपनिवेश हङकङलाई चीनले आफ्नो ‘विशेष प्रशासकीय क्षेत्र’ बताउने गर्छ । बेलायतबाट स्वतन्त्र भएयता हङकङलाई ‘एक देश, दुई व्यवस्था’ अन्तर्गत चीनले शासन गर्दै आएको छ ।

प्रकाशित : श्रावण २५, २०७६ ०८:१८
प्रतिक्रिया
पठाउनुहोस्

केरलामा बाढीको कहर

सुरेशराज न्यौपाने

नयाँदिल्ली — दक्षिण भारतीय राज्य केरलामा दुई दिनयताको भीषण वर्षापछिको बाढीले बितण्डा मच्चाएको छ । बाढीका कारण २८ जनाको ज्यान जानुका साथै ५० जनाभन्दा बढी सम्पर्कविहीन छन् । साथै हजारौं विस्थापित भएका छन् । 

भारतको केरलास्थित पराभुरबाट आफ्ना सरसमानसहित सुरक्षित स्थानतर्फ जाँदै गरेका स्थानीय । तस्बिर :  रोयटर्स

शुक्रबारसम्ममा विस्थापितका लागि भनेर करिब ६ सय उद्धार क्याम्पहरू स्थापना गरिएका छन् । जहाँ करिब ५० हजारभन्दा बढी बाढीपीडितलाई राखिएको छ ।

विगत चार दिनदेखि भएको भारी वर्षाका कारण पेरियार र मुवटुपुरा नदीको सतह अत्यधिक बढ्न जाँदा केरलाका उत्तरी जिल्लाहरू कन्नुर, वायनाड, मालप्पुरम, कासरागोड लगायत आधा दर्जन जिल्ला बढी प्रभावित छन् । विशेषगरी बाढीले वायनाड जिल्लामा बढी क्षति भएको छ । त्यस जिल्लामा मात्र बाढीका कारण कम्तीमा ६ जनाको ज्यान गएको स्थानीय प्रशासनले जनाएको छ । त्यसैगरी, वायनाडमै कम्तीमा पनि २० घर पहिरोमा परेको बताइएको छ । वायनाड भारतीय राष्ट्रिय कंग्रेसका नेता राहुल गान्धीको चुनावी क्षेत्र हो ।

बाढी र पहिरोका कारण जनजीवन अस्तव्यस्त भएपछि केरला सरकारले शुक्रबार सार्वजनिक बिदासमेतदिएको थियो ।जल तथा मौसम पूर्वानुमान विभागले आगामी चार दिन अत्यधिक वर्षा हुने अनुमान गरेको छ । साथै वायनाडलगायतका सातवटा उत्तरी जिल्लाका मानिसलाई सुरक्षित स्थानमा जानसमेत सचेत गराएको छ । ‘चार दिन लगातार पानी परेको थियो । तर, शुक्रबार मध्याहृनदेखि त वर्षा झन् बढेको छ, जनजीवन पूरै अस्तव्यस्त छ,’ कासरागोठ जिल्लाका एक स्थानीय शिक्षक मधुसूदनले कान्तिपुरलाई बताए ।

स्थानीय सञ्चारमाध्यमका अनुसार मालापपुरम जिल्लाको कवलप्परामा बिहीबार रातिदेखि ५० भन्दा बढी सर्म्पकविहीन छन् । बाढीका कारण रनवेसमेत डुबेका कारण केरलाको कोचिन अन्तर्राष्ट्रिय विमानस्थल आइतबारसम्मका लागि बन्दगरिएको छ ।

बाढीपहिरोकै कारण परिस्थिति असहज भएको भन्दै केरलाको अलापुरामा बर्सेनि हुँदै आएको चर्चित नेहरू डुंगा प्रतियोगता पनि हाललाई स्थगन गरिएको छ । यस वर्ष उक्त प्रतियोगिताका लागि भारतका चर्चित क्रिकेटर सचिन तेन्दुल्कर प्रमुख अतिथिका रूपमा निम्त्याइएको थियो ।

बाढीका कारण रेललगायतका सार्वजनिक यातायात अवरुद्ध भएका छन् । विभिन्न रुटका एक दर्जनभन्दा बढी रेल सेवा स्थगित गरिएको छ । केरलाले गतवर्ष पनि बाढीपहिरोका कारण ठूलो क्षति व्यहोरेको थियो । गतवर्ष बाढीपहिरोले ५ सयभन्दा बढीको ज्यान गएको थियो भने सयौं बेपत्ता भएका थिए ।

गत वर्षको बाढी पछिल्लो सय वर्षकै सबैभन्दा विध्वंशकारी बाढी मानिएको थियो । बाढीका कारण करिब ८ लाखभन्दा बढी मानिस विस्थापित भएका थिए ।

त्यसैगरी, अत्यधिक वर्षापछिको बाढीका कारण महाराष्ट्र र अर्को दक्षिण भारतीय राज्य कर्नाटकमा पनि ठूलो जनधनको क्षति भएको छ । शुक्रबारसम्म कर्नाटकमा बाढीले बगाएर ९ जनाको मृत्यु भएको छ भने ४४ हजारभन्दा बढी विस्थापित भएको स्थानीय सञ्चारमाध्यमले जनाएका छन् ।

कर्नाटकका तटीय क्षेत्रका जिल्ला बाढीले बढी प्रभावित भएका छन् । ऐतिहासिक हिन्दु र जैनमन्दिर रहेको प्रसिद्ध विश्व सम्पदा स्थल पत्तादकाल पनि जलमग्न भएको छ ।

प्रकाशित : श्रावण २५, २०७६ ०८:१६
पूरा पढ्नुहोस्
प्रतिक्रिया
पठाउनुहोस्