पार्टी विचारधारा सिकाउन सफ्टवेयर

उत्तर कोरियाली सरकारी अखबार रोडोङ सिनमुनका अनुसार ‘चोङ्सेओ १.०’ नाम दिइएको सफ्टवेयरमा राष्ट्रनिर्माता किम इल–सुङ र उनका छोरा किम जोङ–इलका लेखहरू समावेश छन् ।

अखबारका अनुसार इन्साइक्लोपेडियाजस्तै विद्युतीय पुस्तकमा विगतका महान् कार्य, उल्लेखनीय घटना तथा वर्तमान सर्वोच्च नेता किम जोङ–उनसँग सम्बन्धित विषयवस्तु समावेश छन् । त्यसका साथै सफ्टवेयर निर्माताहरूले विभिन्न विशेषतासहितको ‘चोङ्सेओ २.०’ समेत निर्माण गरिरहेको अखबारले जनाएको छ ।

उक्त सफ्टवेयर विन्डोज तथा उत्तर कोरियाको लिनक्समा आधारित ‘रेड स्टार’ अपरेटिङ सिस्टममा चल्ने जनाइएको छ । अखबारका अनुसार सफ्टवेयर देशव्यापी रूपमा प्रयोगमा ल्याउने सरकारको तयारी छ ।

हाल सरकारी अखबार रोडोङ सिनमुनले पार्टी विचारधारा सिकाउने संस्थापक नेता किम इल–सुङका विभिन्न लेख प्रकाशन गर्दै आएको छ । अखबारले किमको मृत्युको वार्षिकीका अवसरमा प्रकाशन गरेको सम्पादकीयमा ‘संस्थापक नेता किमबाट शिक्षा लिन निकै मिहिनेत गर्नुपर्ने’ उल्लेख गरेको थियो ।

उत्तर कोरिया सरकारको यो कदमलाई आफ्ना नागरिकमाथि हुने विदेशी प्रभाव रोक्ने प्रयासका रूपमा हेरिएको छ । पछिल्लो समय सूचना प्रविधिको प्रयोगले विदेशी समाचार तथा मनोरञ्जनमा उत्तर कोरियालीको पहुँच बढ्दै गएको छ ।

करिब २ करोड ५५ लाख जनसंख्या रहेको उत्तर कोरियामा ६० लाख मोबाइल फोन प्रयोगकर्ता छन् । उत्तर कोरियाले आफ्नै देशमा निर्माण गरेको स्मार्टफोन ‘प्योङयाङ–२४२५’ मा वाईफाई, वायरलेस चार्जिङ सुविधाका साथै ‘फेस रिकग्निसन’ मार्फत फोन अनलक सुविधासमेत छ ।