इरानी ड्रोन खसालेको ट्रम्पको दाबी, सुरक्षित फर्केको इरानको भनाइ

एजेन्सी

वासिङटन — अमेरिकी राष्ट्रपति डोनाल्ड ट्रम्पले आफ्नो देशको जलसेनाले शुक्रबार एक इरानी ड्रोन खसालेको दाबी गरेका छन् । उनका अनुसार इरानी ड्रोन समुद्री मार्ग ‘स्ट्रेट अफ होर्मुज’ मा खसालिएको हो ।

इरानी ड्रोन अमेरिकी पानीजहाजभन्दा झन्डै एक किलोमिटरको दूरीमा देखिएपछि खसालिएको ट्रम्पको भनाइ छ । उनले ‘यूएसएस बक्सर’ ले आफ्नो आत्मरक्षाका लागि ड्रोनमाथि आक्रमण गर्न बाध्य भएको बताए ।

‘इरानले अमेरिकालाई उत्तेजित बनाउने प्रयत्न गरिरहेको छ,’ राष्ट्रपति कार्यालय हृवाइटहाउसमा शुक्रबार बोल्दै ट्रम्पले भनेका छन्, ‘अमेरिकाले आफ्ना अधिकारी, सामग्री र स्वार्थ रक्षाका लागि जस्तोसुकै कदम चाल्न सक्छ ।’

इरानले अमेरिकी दाबी अस्वीकार गर्दै मानवरहित विमान (ड्रोन) सकुशल फर्केको जनाएको छ । इरानी उपविदेशमन्त्री अब्बास आरागचीले ड्रोन खसालेको दाबी अस्विकार गरे ।

इरानी सशस्त्र बलका प्रवक्ता ब्रिगेडियर जनरल अबोलफज्ल सिकार्चीले ‘इरानको कुनै पनि ड्रोन अमेरिकी पानीजहाजसँग आमनेसामाने नभएको’ बताए । उलने भनेका छन्, ‘इरानका सबै ड्रोन सुरक्षित रूपमा फर्किसकेका छन् ।’

इरानले गत जुनमा अमेरिकी ड्रोनलाई गोली हानी खसालेको थियो । आफ्नो हवाई क्षेत्रमा प्रवेश गरेको भन्दै इरानले अमेरिकी ड्रोनलाई ‘स्ट्रेट अफ होर्मुज’ मा खसालेको थियो । अमेरिकाले भने उक्त ड्रोन आक्रमणका बेला इरानी हवाई क्षेत्रमा नभई अन्तर्राष्ट्रिय जलक्षेत्रमाथि रहेको बताउने गरेको छ ।

अमेरिकाले सन् २०१५ मा इरानसँग भएको बहुपक्षीय परमाणु सम्झौताबाट अलग भएको घोषणा गरेको थियो । अमेरिकी राष्ट्रपति ट्रम्पले उक्त घोषणासँगै ‘तेहरानमाथि कडा आर्थिक प्रतिबन्ध’ लगाइसकेका छन् । त्यसयता दुई देशबीच जारी तनाव इरानले अमेरिकी ड्रोन खसालेपछि थप चर्केको हो ।

अमेरिका र इरानबीच तनाव जारी रहेकै बेला बेलायती सेनाका पानीजहाजले आफ्नो देशका तेल ट्यांकरहरूको सुरक्षाका लागि गस्ती थालेका छन् । बेलायती आग्रहमा जिब्राल्टरको तटपारि आफ्नो देशको ट्यांकरलाई नियन्त्रणमा लिइएको प्रतिशोध लिने इरानी चेतावनीपछि बेलायत शसंकित भएको हो ।

गतसाता इरानले खाडीमा तेल तस्करी गरेको भन्दै एक विदेशी तेल ट्यांकर नियन्त्रणमा लिएको थियो । गत मे र जुन महिनामा इरानले दुई पटक ओमानको खाडीमा तेल ट्यांकहरूमाथि आक्रमण गरेको अमेरिकाको आरोप छ । तर तेहरानले अमेरिकी आरोपको खण्डन गर्दै आएको छ ।

प्रकाशित : श्रावण ३, २०७६ २०:४१
प्रतिक्रिया
पठाउनुहोस्

नेकपामा जिम्मेवारी बाँडफाँट : संगठनमा वामदेव, विदेश विभागमा नेपाल

कान्तिपुर संवाददाता

काठमाडौँ — नेकपाको संगठन परिचालनमा महत्त्वपूर्ण मानिने शक्तिशाली संगठन विभागको जिम्मेवारी वामदेव गौतमले पाउने भएका छ्न् । अध्यक्ष तथा प्रधानमन्त्री केपी शर्मा ओलीसँग असन्तुष्ट रहेका गौतमले यसपटक रोजेकै विभाग पाउन लागेका हुन् ।

विगतमा आफूसँग गरिएका प्रतिबद्धता पालना नगरेको भन्दै गौतम ओलीसँग रुष्ट थिए ।

बालुवाटारमा बिहीबार राति बसेको नेकपाका पूर्वएमाले पक्षका नेताको बैठकले गौतमलाई संगठन विभागको नेतृत्व दिने सहमति गरेको हो । विभागको नेतृत्वसम्बन्धी सहमति आइतबार बस्ने सचिवालय बैठकमा पेस हुनेछ । ओलीले गौतमलाई पुनः आफ्नै समूहमा ल्याउन रोजेकै विभाग दिन लागेका हुन् ।

केही दिनअघि ओलीले गौतमलाई बोलाएर लामो छलफल गरेका थिए । छलफलमा ओलीले मिलेर जाने प्रस्ताव राखेका थिए । गौतमले भने सक्रिय भूमिका दिन आग्रह गरेका थिए । यसअघि ओलीले संगठन विभागमा रामबहादुर थापालाई लैजाने तयारी गरेका थिए । पूर्वएमालेको सन्तुलन नबिगार्नका लागि गौतमलाई नेतृत्व दिने निर्णयमा ओली पुगेका हुन् ।

विदेश विभागको जिम्मेवारी वरिष्ठ नेता माधवकुमार नेपाललाई दिने सहमति भएको छ । नेपालले यो विभागको नेतृत्व पहिले पनि सम्हालिसकेका छन् ।

अर्का वरिष्ठ नेता झलनाथ खनाललाई नीति तथा अनुसन्धान विभागको जिम्मेवारी दिन लागिएको छ । पूर्वएमालेको भागमा परेको स्कुल विभागको जिम्मेवारी ईश्वर पोखरेलाई दिने समझदारी भएको छ । पूर्वमाओवादी पक्षले भने पोखरेलको नामलाई रुचाएको छैन । उसले यो विभागको नेतृत्व आफैंले पाउनुपर्ने बताउँदै आएको छ ।


प्रकाशित : श्रावण ३, २०७६ २०:२१
पूरा पढ्नुहोस्
प्रतिक्रिया
पठाउनुहोस्