अस्ट्रेलियामा विदेशी विद्यार्थीमाथि शोषण

नारायण खडका

(अस्ट्रेलिया) — अस्ट्रेलियामा विदेशी विद्यार्थीलाई घरधनीहरुले शोषण गर्ने गरेको रिपोर्ट सार्वजनिक भएको छ । यहाँ रहेको ‘युनिभर्सिटी अफ न्यु साउथ वेल्स (यूएनएसडब्लू)’ ले हालै सार्वजनिक गरेको रिपोर्ट ‘नो प्लेस लाइक होम’ मा सिड्नीमा रहेका कैयौं अन्तर्राष्ट्रिय विद्यार्थी शोषणको मारमा परेको उल्लेख छ । 

उक्त विश्वविद्यालयको मानवअधिकार क्लिनिकले गरेको अनुसन्धानमा ठूलो संख्यामा अन्तर्राष्ट्रिय विद्यार्थीहरुलाई सस्तो, कानुनी र सुरक्षित बसोबास नभएको उल्लेख गरिएको छ । रिपोर्टमा विद्यार्थीमाथि उत्पीडन हुने गरेको, भीडभाडयुक्त घरमा राखिएको र अचानक घरबाट निकालिएको लगायतका विभिन्न समस्याहरु देखाइएको छ । मुख्य गरी अन्तर्राष्ट्रिय विद्यार्थीहरु एक्लै हुने गरेको र उनीहरु कानुनी अधिकारबारे जानकार नभएकाले समेत पीडित हुने गरेको पाइएको छ ।


विश्वविद्यालयले अक्टोबर २०१७ देखि अप्रिल २०१८ सम्मको अवधिमा यहाँ रहेका विभिन्न विश्वविद्यालयहरुमा अध्ययन गरिरहेका विद्यार्थीहरुका बीच अध्ययन गरिएको थियो ।

अध्ययनमा सिड्नीमा अध्ययनरत विद्यार्थीहरुको मुख्य गरेर बसोबाससम्बन्धी समस्यामाथि अध्ययन केन्द्रित थियो । रिपोर्टमा विद्यार्थीहरुले बसोबास गर्ने क्रममा भोग्नुपरेको गम्भीर समस्याहरुको अध्ययन गरिएको थियो ।


यूएनएसडब्लूकी प्राध्यापक तथा क्लिनिकल सुपरभाइजर मारिया नवाजले विद्यार्थीहरु कानुनी रूपमा सुरक्षित नभएको बताएकी छन् । रिपोर्टका अनुसार कैयौं विद्यार्थीले थाहै नभएका घरधनीहरुलाई अग्रिम भुक्तानी दिनुपरेको, केही घरधनीहरुलाई आवश्यकताभन्दा धेरै बोन्ड तिर्नुपर्ने (घर लिनुअघि धरौटीका रूपमा दिनुपर्ने रकम), अचानक घरभाडा बढाउनेलगायतका समस्या देखिएका छन् ।


अस्ट्रेलियामा सुरुमा अध्ययन गर्न आउने विदेशी विद्यार्थीहरुलाई मुख्य समस्या बसोबास र रोजगारको हुने गरेको छ । रिपोर्ट सार्वजनिक गरेको संस्थाकी निर्देशक बासिना फारबेनबल्मले सिड्नीको घरको उच्च भाडा र सीमित विद्यार्थीहरुका लागि उपलब्ध बसोबासको सुविधाका कारण उनीहरु समस्यामा परेको बताएकी छन् ।


‘जीवनका लागि बास आधारभूत भए पनि अन्तर्राष्ट्रिय विद्यार्थीहरु आफ्नो महत्त्वपूर्ण समय बस्नका लागि घर खोज्नमै समय बिताएको पाइन्छ ,’ रिर्पोटमा उल्लेख छ । अस्ट्रेलियाको सरकारी तथ्यांक अनुसार अहिले करिब ७ लाख अन्तर्राष्ट्रिय विद्यार्थीहरुले यहाँका विभिन्न विश्वविद्यालयमा अध्ययनरत छन् ।



प्रकाशित : असार २४, २०७६ २१:२२
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

अस्ट्रेलियाको ट्राफिक नियममा कडाई

गाडी चलाउँदा मोबाइल प्रयोग गरे हजार डलर जरिवाना
नारायण खडका

अस्ट्रेलिया — अस्ट्रेलियामा सवारी साधन चलाइरहेको अवस्थामा मोबाइल फोनको प्रयोग गरे हजार अस्ट्रेलियन डलर (करिब ८० हजार रुपैया) जरिवाना हुने भएको छ । अधिकारीका अनुसार यो निमय क्वीन्सल्याण्ड राज्यमा केही महिनापछि लागु हुने छ । यसलाई विश्वकै कडामध्येको एक ट्राफिक नियम मानिएको छ । 

स्थानीय सञ्चारमाध्यमले अधिकारीलाई उद्धृत गर्दै क्वीन्सल्याण्डमा सवारी साधन चलाउँदा मोबाइलको प्रयोगकै कारण भएका दुर्घटनामा २ महिनाको अवधिमा ४० जनाको मृत्यु भएपछि यो नियम ल्याइएको हो । राज्यका यातायातमन्त्री मार्क बेलीले नयाँ नियम आवश्यकता अनुसार ल्याइएको बताउँदै यथाशिघ्र लागू गरिने बताए ।

उनले कडा जरिवाना र दोस्रोपटक सोही आरोपमा समातिए लाइसेन्स खारेज हुने नियम समेत प्रस्ताव गरेका छन् । उनको प्रस्तावलाई राज्यकी प्रिमियर एनास्टेसिया पालासेले समेत समर्थन गरेकी छिन् । उनले धेरै ब्यक्तिले सवारी साधान चलाइरहेको बेला मोबाईलमा ध्यान दिने गरेकाले दुर्घटना बढिरहेको जनाइन् ।

अस्ट्रेलियाका सबै राज्य तथा टेरिटोरीमा सवारी चलाएको बेला मोबाइलको प्रयोग गर्नेलाई कडा जरिवाना भएपनि यो नयाँ नियम अहिले लागु भइरहेको भन्दा करिब अढाई गुणा ज्यादा हो । यस नियम विपरित कार्य गरेको पाइएमा अंक प्रणालीमा चल्ने अस्ट्रेलियाको लाइसेन्सको अंक समेत गुम्ने गरेको छ । जम्मा १२ अंक मात्र हुने यहाँको
लाइसेन्समा सवारी साधन चलाउँदा मोबाइल चलाएको भेटिए ४ अंकसम्म जरिवाना हुने गरेको छ ।

आर्थिक र अंक दुबै जरिवाना हुने यहाँको नियम अनुसार बिभिन्न राज्यहरुमा फरक फरक प्रावधान राखिएको छ । नर्दन टेरिटोरीमा सबैभन्दा कम २ सय ५० डलर र सबैभन्दा बढी दक्षिण अस्ट्रेलियामा ५ सय ३४ डलर जरिवाना तोकिएको छ । तर क्युन्सल्याण राज्यमा अहिले लागु गरिएको ४ सय डलर जरिवानालाई राज्य सरकारले एकैचोटी बढाएर १ हजार डलर बनाएको हो । यसका साथै यही आरोपमा दोस्रोपटक समेत समातिए लाइसेन्स खारेज गरिने भएको छ ।

अस्ट्रेलियामा सडक दुर्घटनामा मृत्यु हुनेहरुको संख्या समेत धेरै रहेको छ । अस्ट्रेलियाको यातायात मन्त्रालयको तथ्यांक अनुसार गएको मे महिनामा मात्र १ सय ११ जनाले सवारी दुर्घटनामा ज्यान गुमाएका छन् जुन पछिल्लो ५ बर्षको अनुपातभन्दा झण्डै १० प्रतिशतले बढी हो । यसैगरि पछिल्लो एक बर्षमा मात्र अस्ट्रेलियामा १ हजार २ सय ४ जनाले सवारी दुर्घटनामा ज्यान गुमाएको सरकारी तथ्यांक छ ।

यहाँका प्रहरी तथा अन्य सरकारी निकायहरुले सवारी सुरक्षा सम्बन्धि बिभिन्न जानकारीहरुका साथै चेतावनी दिने गरेका भएपनि सवारी दुर्घटना हुने क्रम बढिरहेकाले अधिकारीहरु कडा नियम लगाउन बाध्य हुनुपरेको जनाइएको छ । ‘सवारी चलाउँदा मोबाइल गाडीको बन्द लकरमा राख्न हामी सबैलाई अनुरोध गछौं ।’ अधिकारीहरुले भनेका छन् ।

प्रकाशित : असार १५, २०७६ १९:५८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×