इरानले युरेनियम उत्पादन बढायो

एजेन्सी

तेहरान — इरानले तीन चार वर्षअघिको परमाणु सम्झौताको अर्को एक प्रावधान तोडेको बताएको छ । राजधानी तेहरानमा आइतबार आयोजित पत्रकार सम्मेलनमा सहायक विदेशमन्त्री अब्बास अराक्चीले इरानले सन् २०१५ को सम्झौताअनुसारको युरेनियमको थप प्रशोधको सीमा तोडेको बताए । 

अराक्चीले युरोपेली देशले सम्झौताअनुसारको प्रतिबद्धता पूरा नगरेको समेत आरोप लगाए । अमेरिकाले सन् २०१८ मा इरानसहित युरोपेली देश सम्मिलित सम्झौताबाट एकपक्षीय रूपमा अलग भएको घोषणा गरेको थियो । त्यसयता अमेरिकाले इरानमाथि आर्थिक प्रतिबन्ध लगाउँदै आएको छ ।

इरानले सम्झौतामा उल्लेख भएअनुसार आफूसँग राख्ने अनुमति पाएको इनरिच्ड युरेनियमको भण्डारण बढाएको बताएको एक साता नहुँदै यस्तो घोषणा गरेको हो । त्यस्तो युरेनियम आणविक भट्टीमा इन्धन तथा परमाणु हतियारमा पनि प्रयोग हुन्छ ।

इरानले आफूले परमाणु हतियार निर्माण गर्ने मनसाय नरहेको बताउने गरेको छ । सहायक विदेशमन्त्री अराक्चीले भनेका छन्, ‘इरान न सम्झौताबाट पछि हट्छ न रद्द गर्छ ।’ तर उनले युरोपेली संघ (ईयू) का विदेश नीति प्रमुखलाई एक पत्र लेख्दैसन् २०१५ मो सम्झौताका सीमाहरूमा इरान अब अडिग नरहने स्पष्टपारेका छन् ।

यसअघि इरानले आफूलाई अमेरिकी प्रतिबन्धबाट बचाउन चीन, फ्रान्स, जर्मनी, रूस तथा बेलायतलाई आग्रह गरेको थियो तर त्यसका लागि दिइएको समयसीमा सकिएलगत्तै आइतबार इरानले पत्रकार सम्मेलन गर्दै सम्झौताका प्रावधान पूर्ण रूपमा पालना नगर्ने प्रस्ट पारेको हो ।

सहायक विदेशमन्त्री अराक्चीले पत्रकार सम्मेलनमा ‘३.६७ प्रतिशतभन्दा बढी घनत्वमा युरेनियमको थप प्रशोधन कार्य सुरु भएको’ बताए । इरानले हरेक दुई महिना अवधिमा २०१५ को सम्झौतामा उसले गरेका प्रतिबद्धताबाट क्रमशः एक/एक गर्दै पछि हट्ने जनाएको छ तर उसले आफूविरुद्धका प्रतिबन्ध हटाइए कूटनीतिक बाटो खुला रहने समेत जनाएको छ ।

बीबीसीका अनुसार इजरायलका ऊर्जामन्त्रीले इरानी कदमको आलोचना गरेका छन् । फ्रान्सका राष्ट्रपति एमानुएल माक्रोंले पेरिस सम्झौता अलपत्र परे के हुन्छ भन्दै इरानी राष्ट्रपति हसन रूहानीसँग चासो व्यक्त गरेको जनाइएको छ ।

प्रकाशित : असार २३, २०७६ ०९:२२
प्रतिक्रिया
पठाउनुहोस्
ADVERTISEMENT

बेचिएका चेलीको मुक्ति चाहना

कान्तिपुर संवाददाता

काठमाडौँ — सुनसान र मधुर प्रकाशमा लखतरान भएर लडिरहेका एक दर्जनभन्दा बढी महिला । सबैको मुहारमा निराशा र थकान । मञ्चको अग्रभागमा आएर एक युवक आक्रोश पोख्छन्, ‘हामी सधैं अरूको अपेक्षाअनुसार चल्नुपर्छ । बाबुआमाको अपेक्षा ममाथि छ, अनि मेरो सपना कहाँ छ ? म कसका लागि हो ?’ 

विकराल समस्या बन्दै गइरहेको महिला बेचबिखन र बेचिएका महिलाले भोगिरहेको यथार्थ समस्यामा अभ्यस्त हुँदै पुरुष पात्रसमेत कसरी रुमलिरहेको छ, नाटक ‘द फ्लाइट’ को यो पहिलो दृश्यले नै प्रश्न चिहन खडा गर्छ । कमलपोखरीस्थित रूसी सांस्कृतिक केन्द्रमा सोलिस पर्फमेन्स आर्ट्स र वान वर्ल्ड थियटरको प्रस्तुतिमा शुक्रबारदेखि तीन दिन मञ्चन गरेको नाटकमा शब्दबिनै नृत्य र शरीरको हाउभाउमार्फत बेचिएर नारकीय जीवन जिउन बाध्य महिलाले भोगेको यौनहिंसाप्रस्तुत गरिएको थियो ।

महिला पशुझैं निरीह भएरआफ्नो शरीर लुटिएको टुलुटुलु हेरिरहेका हुन्छन् । अरूकै लागि उनीहरू सजिएर राम्री बन्नुपर्छ र आफ्नो संसार भुल्नुपर्छ । उनीहरूको चिच्याहट र पीडा कसैले सुन्दैनन् । ग्राहकलाई प्रतिवाद गर्न खोज्दा–खोज्दै शारीरिक यातनाले ज्यान भुईंमा ढल्दासमेत यौन आतंकबाट उनीहरू उन्मुक्त हुन पाउँदैनन् ।

नृत्यमार्फत यस्ता कारुणिक दृश्य प्रस्तुत हुँदै जाँदा दर्शक भावुक बनेका थिए । बीच–बीचमा महिला पात्रले बोलेका संवादले दर्शकलाई नाटकको कथा बुझन सघाउ पुर्‍याएको थियो । ‘म आराम गर्न चाहन्छु । कुनै बाधा अडचनबिनाको संसारमा म आफैंलाई माया गरेर जीवनका लागि बाँच्न चाहन्छु । म शान्त हुन खोज्दा अनेक बाधा आउँछन् र मलाई अस्तव्यस्त बनाई घोचिरहन्छन्,’ नाटकको संवादले आङ सिरिङ्ग बनाउँथ्यो ।

‘महिला सशक्तीकरणका लागि आवाज नै नाटकको मूल मर्म हो,’ निर्देशक एवं फ्रान्सेली रंगकर्मी अलिज विआनिकले भनिन् । उनका अनुसार पुरुषका लागि महिला हिंसा रोकथामका लागि चेतना दिनु नाटकको अर्को उद्देश्य हो ।

पात्रको वेशभूषा, प्रकाश संयोजन र नृत्यका अनेक प्रस्तुतिले नाटकलाई उत्कृष्ट बनाएको थियो । दुई दर्जनभन्दा बढी कलाकारलाई मञ्चमा एकैचोटि देखाउन गरिएको व्यवस्थापन तारिफयोग्य लाग्थ्यो । नाटकमा पशुपति राई, निशिला शाक्य, उषा किरण, सृष्टि महर्जन, निक्की श्रेष्ठ, अनु दाहाल, सियोङ सङ, क्लोई न्युम्यान, सुनील तामाङ, सलमान गुरुङ, सरोज श्रेष्ठ, विक्रम श्रेष्ठ, सुशील भण्डारीलगायत कलाकारको अभिनय रहेको थियो ।

प्रकाशित : असार २३, २०७६ ०९:१९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT