बेलायतमा अपराधको स्तर भयावह 

नवीन पोखरेल

लन्डन — दक्षिण पश्चिम लन्डनको ब्याटरसीमा गतसाता दिउँसै एक ४० वर्षीय पुरुषमाथि चक्कु प्रहार गरियो । स्कटल्यान्ड यार्डका अनुसार आक्रमणपछि अस्पताल लागिएका उनलाई चिकित्सकले बचाउन सकेनन् । पाँच दिनको अवधिमा लन्डनमा छुरा प्रहारबाट मारिने उनी छैटौं व्यक्ति हुन् ।

गत शनिबार लन्डनवासीले अर्को एउटा हृदयविदारक घट्ना देखे । दक्षिण लन्डनमा ८ महिनाकी एक सुत्केरी महिलालाई चक्कु हानेर मारियो । प्यारा मेडिक्सले दिवंगत २६ वर्षीया केली म्यारी फेभरेलको पेटबाट निकालेको शिशुको पनि बुधबार मृत्यु भयो ।

रेगी म्युजिसियन ५४ वर्षीय इयान टेलर पनि शनिबार नै चक्कु आक्रमणको सिकार भए । ब्रिक्सटन कोल्ड हार्वर लेनमा उनी मारिएका हुन् । त्यसैगरी, वाटफोर्ड फुटबल क्लब नजिक छुरा प्रहारबाटै गम्भीर घाइते ३ जनाको उपचार भइरहेको छ । घाइतेमध्ये एक महिला छिन् ।

लन्डनमा हत्याको एकपछि अर्को शृंखला बढिरहँदा सुरक्षा संवेदनशीलतामाथि प्रश्न उठेको छ । कतिपय राजनीतिज्ञ र सुरक्षा प्रमुखले सरकारको आलोचना गरेका छन् । लन्डन मेट्रोपोलिटन प्रहरी प्रमुख क्रेसिडा डिकले बेलायतमा अपराधको स्तर निकै भयावह रहेको भन्दै चिन्ता व्यक्त गरेकी छिन् ।

डेलीमेल समाचारपत्रका अनुसार बेलायतभरिकै प्रहरी बलले आपराधिक घटनामध्ये आधाको अनुसन्धान गर्न पनि संघर्ष गरिरहेको बताइन् । उनले देशको फौजदारी न्याय प्रणालीबारे पनि चिन्ता व्यक्त गरिन् । प्रहरी बलले कुन आपराधिक घटनालाई महत्त्व दिने भनेर निर्णय गर्ने गरेको उनले जनाइन् ।

बेलायत सरकारले सार्वजनिक गरेको तथ्यांकले इंग्ल्यान्ड र वेल्समा गम्भीर अपराधहरूको छानबिन गर्ने प्रहरीको संख्या ८/९ वर्षको अवधिमा २८ प्रतिशतले घटेको देखाउँदै गर्दा लन्डन प्रहरी प्रमुखको उक्त प्रतिक्रिया सार्वजनिक भएको हो ।

सरकारी आँकडाअनुसार सन् २०१९ मा ६७ जनाको हत्या भइसकेको छ । गत वर्ष इंग्ल्यान्ड र वेल्समा मरिनेको संख्या ७० वर्षको इतिहासमा बढी थियो । गतवर्ष इंग्ल्यान्ड र वेल्समा २ सय ८५ जनाको हत्या गरिएको थियो ।
लन्डन मेयर सादिक खानका प्रवक्ताले मेयरको उच्च प्राथमिकता हिंसात्मक अपराधसँग जुध्ने रहेको दाबी गर्छन् । मेट पुलिस र ‘भाइलेन्ट क्राइम टास्क फोर्स’ का ३ सय अधिकारी अपराध नियन्त्रणका लागि खटाइएको उनले सञ्चारकर्मीसँग भनेका छन् । यद्यपि, आवश्यकताअनुसार प्रहरीको संख्यामा कमी रहेकाले अपराध बढेको जनाइएको छ ।

कन्जरभेटिभ दल सरकारमा आएपछि सन् २०१० यता कम्तीमा २२ हजार प्रहरीको दरबन्दी कटौती गरिसकिएको छ । गृहमन्त्री साजिद जाविदले पनि प्रहरीको संख्या अपुग रहेको स्विकारेका छन् ।

बेलायतको नेपाली समुदाय भने चक्कु प्रहारमा संलग्न वा पीडित भएका खबर हालसम्म नआएका लन्डनस्थित नेपाली दूतावासका उपनियोग प्रमुख शरदराज आरणले बताए । अन्य अपराधमा संलग्न ७ नेपाली भने हाल बेलायती जेलमा छन् ।

प्रकाशित : असार २१, २०७६ २०:५५
ADVERTISEMENT
प्रतिक्रिया
पठाउनुहोस्
ADVERTISEMENT

बैंकको सेयरमा लगानीकर्ता झुम्मिए 

कान्तिपुर संवाददाता

काठमाडौँ — मर्जर तथा एक्विजिसनको हल्ला बढेसँगै बैंकिङ समूहको सेयरमा लगानीकर्ताको आकर्षण बढेको छ । गत साता राष्ट्र बैंकले बैंकलाई मर्जर तथा एक्विजिसनको प्रतिबद्धता मागेपछि बजार तातेको छ । उक्त निर्देशनपछि केही बैंकहरुले मर्जरको सहमति गरिसकेका छन् भने केहीले छलफल तीव्र पारेका छन् ।

मर्जरपछि बैंकहरु ठूलो बन्ने अनुमानका आधारमा लगानीकर्ताले वाणिज्य बैंकको सेयरमा लगानी बढाएका हुन् । यो साताको कुल सेयर कारोबारमा बैकिङ समूहको हिस्सा करिब ५४ प्रतिशत पुग्नुले यो पुष्टी हुन्छ ।

यो साता बजारमा कुल २ अर्ब ६६ करोड रुपैयाँ बराबरको सेयर कारोबार भयो । गत साताको तुलनामा कारोबार रकम करिब ६ प्रतिशतले बढेको हो । जसमध्ये बैंकिङ समूहको मात्र १ अर्ब ४३ करोड रुपैयाँ बराबरको सेयर कारोबार भएको छ । यो कुल साप्ताहिक सेयर कारोबारको करिब ५४ प्रतिशत हो ।

अघिल्ला साताहरुमा बैकिङ समूहको सेयरमा लगानीकर्ताको आकर्षण कम देखिएको थियो । यही कारण ती साताहरुमा साप्ताहिक सेयर कारोबारमा बैकिङ समूहको हिस्सा करिब ४० प्रतिशत हाराहारीमा रहेको थियो ।
यो साता भने परिस्थिति बदलिएको छ । बैंकिङ समूहको सेयरको कारोबार हिस्सा फेरी ५० प्रतिशत भन्दा माथि पुगेको छ । गत साता बैकिङ समूहको कारोबार हिस्सा ४१ प्रतिशत थियो । सामान्य अवस्थामा कुल कारोबारको ५० देखि ५२ प्रतिशत हिस्सा ओगट्दै आएको छ ।

बैंकिङ समूहको कारोबार घटेसँगै बिमा, उत्पादन तथा प्रशोधन समूहको कारोबार हिस्सा केही घटेको छ । गत साताहरुमा हिमालयन डिष्ट्रिलरी र शिवम सिमेन्टको ठूलो परिणाममा सेयर कारोबार भएकाले कुल कारोबारमा ती समूहको हिस्सा पनि बढेको थियो ।

साप्ताहिक सेयर कारोबारमा बिमा समूहको हिस्सा ८.७९, उत्पादन तथा प्रशोधनको ६.७७, जलविद्युतको ४.१६ र विकास बैंकको ४.९२ प्रतिशत छ । यो साता पाँच दिनको सेयर कारोबारमा दुई दिन नेप्से बढ्यो भने तीन दिन घट्यो । दुई दिनमा नेप्से करिब साढे २६ अंकले बढ्यो, बाँकी तीन दिनमा नेप्से करिब साढे २३ अंकल् ेघट्यो । यसकारण बढने भन्दा घटने परिसूचक कम हुदाँ साप्ताहिक कारोबारमा नेप्से करिब ३ अंकले सकारात्मक देखियो । साताको पहिलो दिन आइतबारको तुलनामा भने करिब साढे १५ अंकले बढेको देखिन्छ । आइतबार १ हजार २ सय ४४.८९ मा रहेको नेप्से बिहीबार १ हजार २ सय ६०.४७ विन्दुसमा बन्द भएको छ ।

यो साता सेयर बजारमा ६ लाख ३८ हजार ६ सय ७० कित्ता सेयर सूचीकृत भए । सो अवधिमा माहुली सामुदायिक लघुवित्त वित्तीय संस्था र नेरुडे लघुवित्त वित्तीय संस्थाको बोनस सेयर सूचीकृत भएका हुन । गत साता नेपाल इन्स्योरेन्स कम्पनीको ४० लाख १४ हजार कित्ता हकप्रद सेयर मात्र सूचीकृत भएको थियो ।

यो साता नेपाल स्टक एक्सचेन्जको कारोबार कक्ष नियमित कारोबारका लागि पाँच दिन खुला रह्यो। विगतमा जस्तै यो साता पनि ऋणपत्रतर्फ संस्थागत तथा सरकारी ऋणपत्रको कारोबार भएन।

प्रकाशित : असार २१, २०७६ २०:४९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×