बेलायती प्रधानमन्त्री चयन : बहसमा उत्रदै प्रतिस्पर्धी

पूर्व विदेशमन्त्री बोरिस जोन्सन र वर्तमान प्रधानमन्त्री जेरेमी हन्टबीचको विजेता बेलायतको नयाँ प्रधानमन्त्री बन्नेछन् 
नवीन पोखरेल

लन्डन — बेलायतको प्रधानमन्त्रीका लागि पूर्व र वर्तमान विदेशमन्त्रीबीच प्रतिस्पर्धा हुने निश्चित भएसँगै उनीहरू टेलिभिजन बहसमा उत्रने भएका छन् । दुई नेता आगामी जुलाई ९ मा टेलिभिजन बहसमा उत्रने छन् । उक्त बहस दुई नेताबीचको पहिलो हुने छ ।

सत्तारुढ कन्जरभेटिभ दल कन्जरभेटिभ नेता चयनका लागि भएका चरणवद्ध मतदानमा पूर्व विदेशमन्त्री बोरिस जोन्सन र वर्तमान विदेशमन्त्री जेरेमी हन्ट छानिइसकेका छन् । दुईमध्येको विजेताले ६६ मिलियन जनसंख्या रहेको बेलायतको नयाँ प्रधानमन्त्री बन्ने छन् । संसद्मा टोरी (कन्जरभेटिभ) दलको बहुमत रहेकाले उक्त दलको नेता नै प्रधानमन्त्री हुने निश्चित छ ।

आफ्नो ब्रेक्जिट डिलबाट असन्तुष्टि जनाउँदै बोरिसले गतवर्ष राजीनामा दिएपछि प्रधानमन्त्री टेरेजा मेले हन्टलाई विदेशमन्त्रीमा नियुक्त गरेकी थिइन् । कन्जरभेटिभ दलका ३१३ सांसदबीच नयाँ नेता चयनका लागि बिहीबार भएको पाँचौं चरणको निर्वाचनमा जोन्सनले सर्वाधिक १६० मत पाए भने हन्टले ७७ मत ल्याए । ब्रेक्जिट अभियानमा खुलेर लागेका जोन्सन सन् २००८ देखि ०१६ सम्म लन्डन मेयर बनेका थिए । सन् २०१० मा क्याबिनेट छिरेका हन्ट विदेशमन्त्री बन्नुअघि सबैभन्दा लामो समय स्वास्थ्यमन्त्री बन्ने भाग्यमानी हुन् । जोन्सनले मत परिणाम लगत्तै ट्वीटमार्फत आफू सौभाग्यशाली भन्दै समर्थन गर्नेहरुप्रति आभार व्यक्त गरेका थिए ।

पाँचौं चरणसम्म पुगेका वातावरण मन्त्री माइकल गोभ भने ७५ मत प्राप्त गरी अन्तिम चरणबाट बाहिरिए । एक मत बदर भएको थियो । हालसम्म पार्टीभित्रका सांसदहरुले मतदान गर्ने गरेकोमा अब भने दलका १ लाख ६० हजार सदस्यले नयाँ नेताका लागि पोस्टल भोटमार्फत मतदान गर्ने छन् । २२ जुनमा अन्तिम मतदान हुने र त्यसको महिना दिनभित्र बेलायतले नयाँ प्रधानमन्त्री पाइसक्ने अपेक्षा गरिएको छ । प्रधानमन्त्री टेरेजा मेले दलको नेताबाट राजीनामा दिएपछि उनी अहिले कामचलाउ प्रधानमन्त्रीका रूपमा छिन् ।

यसअघि बिहीबार नै भएको चौथो चरणको मतदानमा गृहमन्त्री साजिद जाविद सबैभन्दा कम मत प्राप्त गरी प्रतिस्पर्धाबाट बाहिरिएका थिए । भूतपूर्व ब्रेक्जिट मन्त्री डोमिनिक राब दोस्रो चरणबाटै बाहिरिए ।
टोरी नेता बन्ने दौडमा रहेका पाँच प्रतिस्पर्धीहरु मंगलबार राति बीबीसी वान लाइभ बहसमा सहभागी भएका थिए । टीभी वहसको एउटा प्रश्नको जवाफमा बोरिस जोन्सनले ३१ अक्टोबरमा ईयू छाड्न एकदमै सम्भव भएको बताएका थिए । गृहमन्त्री साजिद जाविदले उक्त मितिमाथि अरू बढी ध्यान दिनुपर्ने बताएका थिए भने माइकल गोभ र जेरेमी हन्टले थप समय चाहिन सक्ने धारणा राखे । तर, रोरी स्टेवार्टले भने आफ्ना प्रतिस्पर्धीहरुलाई बिनाकुनै ठोस योजना ब्रिटेनमाथि विश्वास गरौं भनेर अगाडि बढिरहेको आरोप लगाएका थिए ।

करिब एक घण्टा लामो बहसमा उनीहरु सबैले ब्रेक्जिट टुंगो नलागेसम्म आमनिर्वाचन भने नगर्ने दृढता व्यक्त गरेका थिए । टोरी नेता बन्न १० जनाले आवेदन दिएका थिए । मार्क हार्पर, एन्ड्री लिड्सम र इस्थर म्याकभे आवश्यक १७ मत ल्याउन असफल भएपछि पहिलो चरणबाटै बाहिरिए । म्याक ह्यानककले भने बीचैमा प्रतिस्पर्धा त्यागेका थिए । अन्तर्राष्ट्रिय विकासमन्त्री रोरी स्टेवार्ट तेस्रो चरणबाट बाहिरिए ।

अब बन्ने प्रधानमन्त्रीले बेलायत ईयूबाट बहिर्गमन (ब्रेक्जिट) डिल कसरी पार लगाउँछन् सर्वत्र चासोको विषय छ । प्रधानमन्त्री मे ईयूसँगको आफ्नो ब्रेक्जिट सम्झौता संसद्बाट तीनपटक प्रयास गर्दा पनि पारित गराउन नसकेकै कारण पदबाट राजीनामा दिन बाध्य भएकी थिइन् ।

प्रकाशित : असार ७, २०७६ २०:१०
ADVERTISEMENT
प्रतिक्रिया
पठाउनुहोस्
ADVERTISEMENT

प्रधानमन्त्री चयनमा अल्झियो बेलायती राजनीति

नवीन पोखरेल

लन्डन — केही महिनायता ब्रेक्जिट केन्द्रित बेलायतको राजनीति अब नयाँ प्रधानमन्त्री चुन्ने प्रक्रियामा छ । प्रधानमन्त्री टेरेजा मेले ब्रेक्जिट प्रक्रिया टुंगोमा पुर्‍याउन नसकेपछि सत्तारूढ कन्जरभेटिभ नेताबाट राजीनामा दिएसँगै संयुक्तअधिराज्य मेको उत्तराधिकारी छान्न व्यस्त भएको हो । 

पार्टीका केही ‘हेभीवेट’ अहिले कन्जरभेटिभ नेताको दौडमा कस्सिएका छन् । संसद्मा बहुमत प्राप्त कन्जरभेटिभ पार्टीको नेता नै अब बेलायतको प्रधानमन्त्री हुने छन् ।

पूर्व विदेशमन्त्री बोरिस जोन्सन नेताको दौडमा ११४ मत ल्याएर अग्रपंक्तिमा छन् । यतिखेर बोरिस टोरी सांसदहरूलाई विश्वस्त पार्न सक्रिय छन् । बोरिसले पछिल्लो एउटा अन्तरवार्तामा नयाँ ब्रेक्जिट डिलका लागि आफूले ईयूलाई दबाब दिन सक्ने दाबी गरे । यसलाई कतिपयले उनको मत आकर्षित गर्ने नाराका रूपमा पनि लिएका छन् ।

बीबीसीसँग कुरा गर्दै ब्रिटेनको सत्तारूढ कन्जरभेटिभ पार्टीको नेता पदका एक प्रमुख दाबेदार बोरिस जोन्सनले भने, ‘ब्रिटेन ईयूबाट बाहिरिनुपर्छ भन्ने ब्रेक्जिट पार्टीका २९ जना सदस्यहरू युरोपेली संसद्मा चुनिएका छन् यो कुरा ईयू नेतृत्वले बुझ्नुपर्छ ।’ उनले यही मंगलबार आफ्नो दलको नेतृत्वका दावेदारहरूबीच हुने टेलिभिजन बहसमा भाग लिन आफू तयार रहेको पनि बताएका छन् । यस अघि उनले त्यस्तो बहसमा भाग नलिने संकेत गरेका थिए ।

बोरिसले गत १२ जुनमा कन्जरभेटिभको आफ्नै बेवसाइटमा १५१२ सदस्यहरूबीच भएको सर्वेक्षणमा ५३ दशमलब ६ प्रतिशत मत ल्याएका थिए । सबैभन्दा बढी सांसदहरूको मत प्राप्त गर्ने दुई जना उम्मेदवारमध्येबाट एक जना छान्न देशभरिका कन्जरभेटिभ सदस्यहरूले मतदान गर्ने छन् । जुलाई महिनाको अन्त्य वा अगस्टसम्ममा ब्रिटेनमानयाँ प्रधानमन्त्री चयन भइसक्ने अपेक्षा गरिएको छ ।

बोरिस आवप्रावासीप्रति अलिक बढी उदार भएकाले प्रायः नेपाली उनी प्रधानमन्त्री भएको हेर्न उत्सुक छन् ।विदेश मन्त्री जेरेमी हन्ट ४३ मतसहित बोरिसको निकट प्रतिस्पर्धी छन् भने माइकल गोभले ३७ मत ल्याए । दौडमा उत्रिएका स्वास्थ्यमन्त्री म्याट हेनकक, मार्क हार्पर एवं दुई महिला उम्मेदवार एन्ड्री लिड्सम र इस्थर म्याकभे कन्जरभेटिभ नेता बन्ने प्रतिस्पर्धाबाट बाहिरिसकेका छन् ।

दलका सांसदहरूबीचको पहिलो ब्यालेटमा २० मत ल्याई छैटौं स्थानमा रहेका सबैभन्दा कान्छा ४० वर्षीय उम्मेदवार हेनककले आफू भावी करिअरका लागि केन्द्रित हुने बताउँदै प्रतिस्पर्धा त्यागेका हुन् । लिड्सम, हार्पर र म्याकभे क्रमशः ११, १० र ९ मत मात्र ल्याएर पहिलो चरणबाटै बाहिरिएका हुन् ।

अर्को चरणको मतदानमा जान योग्य डोमिनिक राब (२७ मत) र साजिद जाभिद (२३ मत) लाई प्रतिस्पर्धा छाड्न दबाब बढेको बताइएको छ । सत्तारूढ टोरी सांसदबीच आगामी सातासम्म हुने चार चरणको मतदानमा अत्यधिक मत ल्याउने दुई नेताको अन्तिममा पार्टी सदस्यहरूबीच प्रतिस्पर्धा हुनेछ । गत वर्ष मार्चसम्मको तथ्यांकअनुसार, कन्जरभेटिभका १ लाख २४ हजार सदस्य छन् ।

प्रकाशित : असार १, २०७६ ०८:४२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×