हङकङमा विशाल प्रदर्शन, सुपुर्दगी विधेयकको विरोध

एजेन्सी

हङकङ — हङकङमा सुपुर्दगीसम्बन्धी विवादास्पद विधेयकको विरोधमा दसौं हजार मानिस सडकमा उत्रेका छन् । हङकङमा रहेका शंकास्पद अपराधीलाई चीनमा सुनुवाइका लागि सुपुर्दगी गर्न सकिने व्यवस्था विधेयकमा छ । उक्त प्रावधानका आधारमा चीनले आफ्नो सरकारको विरोधमा उत्रने राजनीतिक नेता तथा प्रतिस्पर्धीलाई लक्षित गर्ने आलोचकहरूको भनाइ छ । 

हङकङका नेता क्यारी लामले ‘विधेयकको नयाँ व्यवस्था जुलाईअघि पारित हुने’ दाबी गरेका छन् । विधेयक पक्षधरले ‘राजनीतिक तथा धार्मिक मुद्दाका आरोपीलाई चीनमा सुपुर्दगी गर्नबाट रोक्ने’ व्यवस्था विधेयकमा रहेको दाबी गरेका छन् ।

हङकङमा आइतबारदेखि सुरु विरोध प्रदर्शन सन् २०१४ को ‘अम्रेला मुभमेन्ट’ पछिकै विशाल हुने अनुमान गरिएको छ । आइतबारको चर्को घाममा प्रदर्शनमा उत्रेका मानिसमा व्यवसायी, वकिल, विद्यार्थी, धार्मिक नेता तथा लोकतन्त्र पक्षधर रहेको बीबीसीले जनाएको छ । ‘यो हङकङको शासनको अन्त्यको खेल हो । यो जीवनमरणको कुरा हो,’ ५९ वर्षीय प्राध्यापक रक्की चाङले भने, ‘यो दुष्ट कानुन हो ।’

प्रदर्शनमा सहभागी कतिपयले उक्त विधेयकले विश्वको एक वित्तीय केन्द्रका रूपमा रहेको हङकङको अर्थतन्त्रमा समेत प्रभाव पार्ने जनाएका छन् । ‘मानिसहरूको आवाजको बेवास्ता गरिएको छ,’ एक १८ वर्षीय विद्यार्थी इभान ओङले भने, ‘यसले हङकङको अर्थतन्त्र मात्र होइन, न्यायिक व्यवस्थालाई नै प्रभावित पार्छ ।’

सुपुर्दगी कानुनमा गरिएको नयाँ प्रस्तावले चीन, ताइवान र मकाउका अधिकारीले हङकङमा अपराध तथा बलात्कारमा आरोप लागेकालाई सुपुदर्गी गर्न आग्रह गर्न सक्नेछन् । यद्यपि उनीहरूलाई सुपुर्दगी गर्ने/नगर्नेबारे मुद्दाको प्रकृतिअनुसार निर्णय गरिने प्रस्तावित कानुनमा उल्लेख छ ।

हङकङका अधिकारीले सुपुर्दगीबारे अन्तिम निर्णय हङकङस्थित अदालतले लिने बताएका छन् । उनीहरूले राजनीतिक तथा धार्मिक अपराधमा संलग्नलाई सुपुर्दगी नगरिने दाबी गरेका बीबीसीले जनाएको छ ।
केही समयअघि हङकङका १९ वर्षीय युवाले गर्भवती प्रेमिकाको ताईवानमा हत्या गरि देश फर्केपछि उक्त कानुन ल्याइएको हो । ताइवानका अधिकारीले उक्त युवकलाई आफ्नो देशमा फिर्ता गर्न हङकङसँग आग्रह गरेपनि सुपुदर्गी कानुन अभाव रहेको जनाइएको थियो ।

हङकङ सन् १९९७ अघि बेलायतको उपनिवेश रहेको थियो । त्यसयता चिनको शासन अन्तर्गत ‘एक देश दुई व्यवस्था’ अन्तर्गतको हङकङ अर्ध–स्वशासित क्षेत्रका रुपमा रहेको छ । आफ्नो छुट्टै कानुन रहेको हङकङका मानिसले नागरिक स्वतन्त्रताको अभ्यास गर्छन जुन चीनमा भने छैन् । हङकङले हालसम्म २० देशसँग सुपुदर्गी सन्धी गरिसकेको छ ।

प्रकाशित : जेष्ठ २७, २०७६ ०९:५५
प्रतिक्रिया
पठाउनुहोस्

दक्षिण अफ्रिकालाई गर या मरको स्थिति

एजेन्सी

साउथह्याम्प्टन — आईसीसी एकदिवसीय विश्वकपको सुरुआती डेढ साताको निराशाजनक नतिजापछि दक्षिण अफ्रिका पहिलो जितको लक्ष्यका साथ सोमबार साउथह्याम्प्टनमा वेस्ट इन्डिजसँग प्रतिस्पर्धा गर्दै छ । 

दक्षिण अफ्रिकाका कप्तान फाफ डु प्लेसिस र बलर इमरान ताहिर । फाइल तस्बिर

डेल स्टेयन चोटका कारण बाहिरिनु, लुंगी एनगिडी अनफिट हुनु, अनिश्चित ब्याटिङ क्रम र लगातार तीन हारको शृंखलाले दक्षिण अफ्रिकाका लागि विश्वकप–२०१९ को अभियानमा निकै कठिन सुरुआत मिल्यो । भारतविरुद्धको ६ विकेटको हारमा उसका फास्ट बलरहरूको प्रदर्शन टिम प्रबन्धनका लागि आशातीत रहन्छ । तर, वेस्ट इन्डिजको आक्रामक बलरहरूको सामना गर्न दक्षिण अफ्रिकाका ब्याट्सम्यानहरूले आफ्नो प्रदर्शन स्तर माथि लानुपर्नेछ ।
एनगिदी खेल्ने नखेल्नेमा अझै सन्देह छ । यस्तोमा टिमको बलिङ आक्रमणमा विविधता ल्याउन र अझै कसिलो बनाउन कप्तान फाफ डु प्लेसिसले स्टेयनलाई प्रतिस्थापन गरेका बेउरान हेनरिक्सलाई अवसर दिन सक्नेछन् । सेमिफाइनलमा पुग्ने सम्भावनालाई जीवितै राख्न दक्षिण अफ्रिकाका लागि यो खेल गर या मरको अवस्थामा छ ।

वेस्ट इन्डिज ट्रेन्ट ब्रिजमा अस्ट्रेलियासँग बेहोरेको साँधुरो हारबाट उठ्ने प्रयास गर्नेछ । उनीहरूले महसुस पनि गरेका होलान् कि त्यस खेलमा अधिकांश समय उनीहरूकै नियन्त्रणमा थियो ।

सुरुआती दुई खेलमा फास्ट बलरको आक्रामक सुरुआतले वेस्ट इन्डिजको पुराना सफलताका दिनहरू स्मरण गराउँथ्यो । तर, अस्ट्रेलियाविरुद्ध फास्ट बलरहरूको सुरुआती असफलता र जवाफी ब्याटिङमा ब्याट्सम्यानहरूको खराब सट सेलेक्सनकै कारण अस्ट्रेलियाविरुद्ध उसले नोक्सानी बेहोरेको हो ।

यद्यपि सुरुआती दुई जित र अस्ट्रेलियाविरुद्ध साँधुरो हारको नतिजापछि वेस्ट इन्डिज टोली आफ्नो प्रतिस्पर्धी दक्षिण अफ्रिकाभन्दा हेड टू हेडमा अगाडि छ । उसको आत्मविश्वासी पक्ष यही हो ।
ह्याम्प्सायर ओभलमा सोमबार अपराह्न वर्षाको सम्भावना छ । दिनभर बदली हुने मौसम पूर्वानुमानका कारण यस खेलमा फास्ट बलरले एकपल्ट फेरि निर्णायक भूमिका खेल्नेछन् ।

प्रकाशित : जेष्ठ २७, २०७६ ०९:०६
पूरा पढ्नुहोस्
प्रतिक्रिया
पठाउनुहोस्