युद्ध भए इरान ध्वस्त : ट्रम्प

एजेन्सी

वासिङटन — अमेरिकी राष्ट्रपति डोनाल्ड ट्रम्पले इरान अमेरिकासँग युद्धमा होमिए ध्वस्त पारिदिने चेतावनी दिएका छन् । 'यदि इरान युद्ध गर्न चाहन्छ भने त्यो इरानको आधिकारिक अन्त्य हो,' ट्रम्पले ट्वीटरमा भनेका छन्, 'त्यसपछि इरानले संयुक्तराज्य अमेरिकालाई कहिल्यै धम्की दिनेछैन ।' 


अमेरिकाले पछिल्ला दिनमा खाडी क्षेत्रमा सैनिक युद्धपोत तथा विमानहरु थपेको छ। आइतबार फक्स न्युजसँगको अन्तरवार्तामा राष्ट्रपति ट्रम्पले 'इरानलाई कुनै पनि हालतमा परमाणु हतियार विकसित गर्न नदिने' बताएका थिए।

'म युद्धमा जान चाहने व्यक्ति होइन किनकि यसले देशको अर्थतन्त्रमा असर पर्छ, र मानिस हताहत हुन्छन्,' उनले भने। इरान पनि अमेरिकासँग युद्ध नचाहने पक्षमा देखिन्छ। यसअघि इरानी विदेशमन्त्री मोहम्मद जाभद जारिफले आफूहरुले अमेरिकासँग युद्ध नचाहेको बताएका थिए।

इरान र अन्तर्राष्ट्रिय समुदायबीच सन् २०१५ मा भएको परमाणु सम्झौताबाट अमेरिका बाहिरिने निर्णय गरेपछि दुई देशबीच तनाव बढेको हो। इरानले खाडी क्षेत्रमा परमाणु हतियार राख्ने गरेको संयुक्त अरब इमरेटसले दाबी गर्दै आएको छ। तर उक्त आरोपको इरानले खण्डन गर्दैर् आएको छ।

प्रकाशित : जेष्ठ ६, २०७६ २०:३६
प्रतिक्रिया
पठाउनुहोस्

सहायक उद्योग बन्द गर्दै युनिलिभर

कान्तिपुर संवाददाता

हेटौंडा — बहुराष्ट्रिय कम्पनी युनिलिभर लिमिटेडले स्थानीय उद्योगीहरूले सञ्चालन गरिरहेका सहायक उद्योग बन्द गर्न थालेको छ । युनिलिभरका हेटौंडामा तीन सहायक उद्याेग छन । ती मध्ये २ वटा उद्योग बन्द गरिसकेको छ । उद्योगी र मजदुरहरूलाई क्षतिपूर्ति लगायत रकम भने उपलब्ध गराएको छैन ।

हेटौंडा औद्योगिक क्षेत्रमा रहेको युनिक सोप एन्ड केमिकल इन्डस्टि्रज ८ महिनाअघि नै बन्द भइसकेको छ । उक्त उद्योगमा कार्यरत मजदुरहरूले युनिलिभरबाट क्षतिपूर्ति नपाएको गुनासो गरेका छन् । उद्योगी नवराज अर्यालले पनि उद्योगले पाउनुपर्ने रकम पाएका छैनन् । उक्त उद्योगमा एक सय ११ जना कामदार कार्यरत थिए । युनिक सोप ५ किसिमका सर्फ उत्पादन गरिरहेको थियो ।

यस्तै हेटौंडा औद्योगिक क्षेत्रमै एक दशकदेखि सञ्चालित गंगा सोप एन्ड केमिकल इन्डस्टि्रजका कामदार पनि एक महिनादेखि आन्दोलनरत छन् । यो पनि युनिलिभिरकै सहायक उद्योग हो । उद्योगमा उत्पादित कच्चा पदार्थ युनिलिभरले लिएको छैन । उद्योग बन्द गरेपछि मजदुरहरूलाई क्षतिपूर्तिस्वरूप दिनुपर्ने रकम पनि दिएको छैन । क्षतिपूर्तिको रकम माग गर्दै मजदुर आन्दोलनमा छन् ।

उक्त उद्योगका सञ्चालक इन्द्रबहादुर बानियाले पनि युनिलिभरबाट पाउनुपर्ने २ करोड रकम भुक्तानी पाएका छैनन् । युनिलिभरका व्यवस्थापकहरूसँग पटक-पटक वार्ता गर्दा उनीहरूले मजदुरहरूलाई क्षतिपूर्ति र उद्योगले पाउनुपर्ने रकम उपलब्ध नगराएको बानियाले बताए । 'युनिलिभरको मिचाहा प्रवृत्ति छ, स्थानीय उद्योगीहरूलाई दुःख दिने नियत देखिन्छ,' बानियाले भने ।

प्रकाशित : जेष्ठ ६, २०७६ २०:३३
पूरा पढ्नुहोस्
प्रतिक्रिया
पठाउनुहोस्