२६.१२°C काठमाडौं
ठूलो संख्यामा जिउँदो कछुवा बरामद
काठमाडौँ — फिलिपिनो प्रहरीले ठूलो सङ्ख्यामा जिउँदो कछुवा बरामद गरेको छ । सुटकेशमा टेपले बेरिएर राखिएको अवस्थामा एक हजार ५ सय २९ वटा कछुवा प्रहरीले मनिलाको निनोइ अक्विनो अन्तर्राष्ट्रिय विमानस्थलबाट बरामद गरेको हो ।
बेवारिशे अवस्थामा छाडिएका चार वटा सुटेकेशमा टेपले बेरेर राखिएको अवस्थामा प्रहरीले ती कछुवा फेला पारेको थियो । कछुवाहरू केही लोपोन्मुख र संरक्षित प्रजातिका छन् ।
अधिकारीहरूले उक्त कछुवा हंकङबाट एक जना फिलिपिनो नागरिकले ल्याएर विमानस्थलमा छाडेर गएको जनाएका छन् ।कछुवाहरूलाई प्रहरीले देशको वन्यजन्तु तस्करी निगरानी एकाइलाई हस्तान्तरण गरेको छ ।
बरामद गरिएका कछुवाको बजार मूल्य ६० हजार पाउन्ड रहेको बताइएको छ । एसियाली राष्ट्रहरूमा कछुवालाई मासु तथा परम्परागत औषधीको रूपमा प्रयोग गर्ने भएकाले बजारमा यसको माग धेरै रहेको बताइएको छ ।
फिलिपिन्समा वन्यजन्तुको ओसारपसार गर्नेलाई दुई वर्षको जेल सजाय सहित २ लाख फिलिपिनो पेसो जरिवाना हुने कानुन छ ।
प्रकाशित : फाल्गुन २०, २०७५ १६:०४
