थाइल्यान्डकी राजकुमारी चुनावी दौडमा

कान्तिपुर संवाददाता

काठमाडौँ — राजकीय थाइ परम्परा तोड्दै थाइल्यान्डकी राजकुमारी उबोलरत्ना राजकन्या चुनावी प्रतिस्पर्धामा उत्रने भएकी छन् । आगामी मार्च २४ का लागि तय भएको आम निर्वाचनमा उनले उम्मेदवारी दिने घोषणा गरेकी हुन् । 

६७ वर्षीया राजकुमारी माहिडोलले पूर्वप्रधानमन्त्री थाक्सिन सिनावात्राको पार्टीबाट चुनावी मैदानमा प्रतिस्पर्धा गर्दैछिन् । ५ वर्षदेखिको सैन्य शासनलाई यो निर्वाचनले प्रतिस्थापन गर्ने अनुमान विश्वले गरेको छ ।


सन् १९५१मा जन्मिएकी राजकुमारी उबोलरत्ना थाइल्यान्डका पूर्वराजा भूमिबोल अदुल्यादेजको छोरी हुन् । सन् १९७२ मा एक अमेरिकी नगरिकसँग विवाह गरेपछि उनले राजकीय पद त्यागेकी थिइन् ।


डिभोर्सपछि उनी पुनः थाइल्यान्डमा फर्किइन् । थाइलेन्डमा उनी सामाजिक सञ्जाल र थाइ चलचित्रहरुमा काम गर्न थालिन् । राजकुमारी उबोलरत्नाको तीन सन्तानमध्ये एक जनाको सन् २००४ सुनामीका कारण मृत्यु भएको थियो । उनका अन्य दुई सन्तान अमेरिका मै बस्छन् । वर्तमान प्रधानमन्त्री प्रयुथ चान ओचा पनि चुनावी मैदानमा छन् ।

प्रकाशित : माघ २५, २०७५ १३:१५
प्रतिक्रिया
पठाउनुहोस्
ADVERTISEMENT

संस्कृति जोगाउन भिडियो प्रतियोगिता

कान्तिपुर संवाददाता

धनगढी — आफ्नै गाउँबस्तीमा ओझेलमा परेका स्थानीय संस्कृति र गन्तव्यहरूको प्रवद्र्धन गर्ने उद्देश्यले ‘मेरो गाउँ, मेरो ठाउँ’ शीर्षकमा भिडियो प्रतियोगिता हुने भएको छ । ‘वि विल राइज फाउन्डेसन’ ले प्रतियोगिता गर्न लागेको हो । फाउन्डेसनका संस्थापक निर्देशक निर्मल श्रेष्ठले प्रचारमा आउन नसकेका पर्यटकीय क्षेत्र, सांस्कृतिक भेषभूषा र खानपानलगायतको प्रवद्र्धन गर्ने उद्देश्यले भिडियो प्रतियोगिता गर्न लागिएको जानकारी दिए ।

‘सुदूरपश्चिम पर्यटन गन्तव्य र संस्कृतिले समृद्ध क्षेत्र हो,’ बिहीबार धनगढीमा आयोजित पत्रकार सम्मेलनमा श्रेष्ठले भने, ‘यो प्रतियोगितामार्फत गाउँ समाजमा लुकेका विषय, कुनै जातजातिको पहिचान, संस्कृति वा स्थानविशेषका गतिविधि उजागर भएर पर्यटन प्रवद्र्धनमा टेवा पुग्न सक्छ ।’

प्रतियोगिताका लागि फाउन्डेसनले देशैभरबाट भिडियो संकलन गर्न लागेको छ । यसलाई फाउन्डेसनले पर्यटन वर्षका निम्ति राष्ट्रिय अभियानमा समेत जोडिएको जनायो । कुनै पनि निश्चित विषयवस्तुमा आधारित बढीमा ५ मिनेटको भिडियो प्रतिस्पर्धामा सहभागी हुन पाउने श्रेष्ठले बताए ।

मोबाइलले खिचेका भिडियोलाई पनि समावेश गराइने उल्लेख गर्दै निर्देशक श्रेष्ठले भने, ‘एक जनाले ५ वटासम्म भिडियो प्रतिस्पर्धामा समावेश गर्न सक्नेछन् ।’ प्रतियोगिताको प्रचारप्रसार गर्न १३ पटक सगरमाथा चढेका आरोही तथा पत्रकार फुर्वा तेन्जिङ शेर्पा, अर्की सगरमाथा आरोही तथा पत्रकार रोजिता बुद्धाचार्यलगायत ‘वि विल राइज फाउन्डेसन’ को टोली धनगढी पुगेको छ । प्रतियोगितामा देशैभरिबाट संकलन भएका भिडियोमध्ये १० वटा छनोट गरी ६ वटालाई पुरस्कृत गरिनेछ ।

उत्कृष्ट भिडियोले एक लाख, दोस्रोले ५० हजार र तेस्रो हुनेले २५ हजार रुपैयाँ पाउनेछन् । छनोटमा परेका भिडियो फेसबुकमा समेत राखेर पब्लिक च्वाइसका आधारमा उत्कृष्ट हुने भिडियोलाई पनि एक लाख रुपैयाँ उपलब्ध गराउने श्रेष्ठले बताए । उत्कृष्ट स्क्रिप्ट र उत्कृष्ट सम्पादनतर्फ पनि पुरस्कारको व्यवस्था गरिएको छ ।

प्रकाशित : माघ २५, २०७५ १२:५३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×