कान्तिपुर वेबसाईट
AdvertisementAdvertisement

अस्ट्रेलियामा स्ट्रबेरीभित्र सियो अातंक

६ राज्यमा स्ट्रबेरी अायात रोकियो
बीबीसी

काठमाडौँ — अस्ट्रेलियाको विभिन्न राज्यहरुमा स्ट्रबेरीमा सियो पाइएपछि मानिसहरु त्रासित भएका छन् । त्यहाँका विभिन्न ६ वटा राज्यहरुमा बेच्न राखिएको स्ट्रबेरीभित्र सियो भेटिएको हो । यसलाई त्यहाँका एक जना मन्त्रीले ‘जघन्य अपराध’ भनेका छन् ।

स्ट्रबेरीसँगै सियो निलेपछि एक जना व्यक्तिलाई अस्पताल पुर्‍याइएको बीबीसीले जनाएको छ । न्यूजिल्याण्डका बिक्रेताले आयतित स्ट्रबेरीहरु बेच्न छाडेको जनाएका छन् ।


अष्ट्रेलियाका स्वास्थ्य मन्त्री ग्रग हन्टले खाद्य अधिकारीहरुलाई उक्त घटनाको अनुसन्धान गर्न निर्देशन दिएका छन् । ‘यो एउटा जघन्य अपराध हो । सर्वसाधारणमाथि सीधै आक्रमणको प्रयास हो ।’ उनले बीबीसीलाई भने । स्थानीय अधिकारीहरुले घटनाको बारेमा अनुसन्धान गरेपनि हालसम्म कुनै शंकास्पद व्यक्तिहरु पक्राउ नपरेको बीबीसीले जनाएको छ ।


यो घटना गतसाता क्वीन्सल्याण्डमा घटेको थियो । त्यसपछि न्यू साउथ वेल्स, भिक्टोरिया, दक्षिण अस्ट्रेलिया र तास्मनियामा फैलिएको थियो । उत्पादक र प्रहरीले केही घटना नक्कल गरेको समेत भएको उल्लेख गरेका छन् ।


क्वीन्सल्याण्ड राज्य सरकारले उक्त घटना बारे जानकारी दिनेलाई एक लाख अष्ट्रेलियन डलरले पुरस्कृत गर्ने जनाएको छ ।


गत बिहीबार क्वीन्सल्याण्डका स्ट्रबेरी उत्पादक संघले ‘असन्तुष्ट कर्मचारी’ले स्ट्रबेरीमा सियो घोचेको हुनसक्ने बताएको थियो । तर प्रहरीले उनीहरुको भनाइलाई पत्याएको छैन ।


हालसम्म स्ट्रबेरी बेच्ने विभिन्न ६ वटा ब्राण्डलाई छानबिनको दायरमा ल्याइएको छ । प्रहरीले बेरी ओपि ओवेशन, बेरी लिसियस, लब बेरी, डोनी ब्रकु बेरिज, डिलाइटफूल स्ट्रबेरिज र ओआसिस ब्राण्डमाथि अनुसन्धान गरिरहेको छ । यस्तै, स्वास्थ्य अधिकारीले स्ट्रबेरी काटेर मात्र खान सचेत गराएका छन् ।


स्ट्रबेरी उत्पादकहरुले उक्त घटनाको कारण व्यपारमा नकारत्मक असर पार्ने जनाएका छन् । अस्ट्रेलियमा वार्षिक एक सय ३० मिलियन अष्ट्रेलियन डलर बराबरकाे स्ट्रबेरी बिक्री हुन्छ ।

प्रकाशित : आश्विन १, २०७५ ११:३०
प्रतिक्रिया
पठाउनुहोस्

भूगोलका कारण पनि नेपाल भारतबाट टाढा हुन सक्दैन – भारतीय सेना प्रमुख

सुरेशराज न्यौपाने

नयाँदिल्ली — भारतीय सेना प्रमुख विपिन रावतले ‘भौगोलिक बाध्यता’ कारण नेपाल र भुटानले चाहेर पनि भारतबाट टाढा जान नसक्ने बताएका छन् । उनले भूगोलकै कारण यी दुई मुलुकले चीनतर्फ ढल्किन नसक्ने दाबी समेत गरेका छन् ।  

पुनेमा भएको बिमस्टेक राष्ट्रहरुको संयुक्त सैन्य अभ्यास ‘माइलेक्स–१८’ को आइतबारको समापन समारोहपछि आयोजित पत्रकारहरुसँगको अन्तक्रियामा नेपाल सहभागी नभएको सन्दर्भमा रावतले त्यस्तो भनेको भारतीय सञ्चारमाध्यमहरुले जनाएका छन् । सैन्य अभ्यासमा सहभागी नहुने नेपालको निर्णयबाट भारत सरकार असन्तुष्ट रहेको चर्चा चलिरहेको बेला रावतको उक्त भनाईलाई अर्थपूर्ण ठानिएको छ ।

‘उनीहरु भारतबाट टाढा जान सक्दैन । नेपाल र भुटानजस्ता मुलुकहरुले भूगोलका कारण स्वाभाविक रुपमा भारतर्फ झुकाव राख्नुपर्छ । भूगोलका कारण नै चीनतर्फ भन्दा भारततर्फ झुकाव राख्न अनुकूल छ, । हाम्रो नेतृत्वले पनि छिमेकी पहिले र पूर्व हेर नीति लिएको छ । बिमस्टेक पनि त्यही नीति अन्तर्गत पर्छ । त्यसैले हामीहरु छिमेकीसँगको सम्बन्ध सुदृढ पार्न प्रयासरत छौं । ठूलो मुलुक भएकाले हामीहरुले अग्रसरता देखायौं भने त्यसलाई अन्य मुलुकले अनुसरण गर्नेछन्,’ रावतलाई उद्धृत गर्दै भारतीय अंग्रेजी दैनिक द इण्डियन एक्सप्रेसले भनेको छ ।

तर सोही कार्यक्रममा भारतीय रक्षा राज्यमन्त्री सुभाष भाम्रेले भने नेपालमा सैन्य नेतृत्व भर्खरै परिवर्तन भएको हुँदा सैन्य भाग नलिने निर्णयलाई अन्य कोणबाट हेर्न नहुने बताएका छन् ।

साताव्यापी उक्त सैन्य अभ्यासमा नेपाल र थाइल्याण्ड औपचारिक रुपमा सहभागी भएनन् । दुवै मुलुकले पर्यवेक्षकका रुपमा मात्र सहभागिता जनाएका थिए । भारतीय प्रधानमन्त्री नरेन्द्र मोदीले काठमाडौंमा सम्पन्न चौथो बिमस्टेक शिखर सम्मेलनमा प्रस्ताव गरेको संयुक्त सैन्य अभ्यास नेपालले अन्तिम समयमा भाग नलिने निर्णय गरेको थियो ।

पार्टीभित्र र बाहिरबाट आलोचना भएपछि प्रधानमन्त्री केपी ओलीले सैन्य अभ्यासमा भाग नलिन नेपाली सेनालाई निर्देशन दिएका थिए । नेपालले चीनको प्रभावमा परेर उक्त निर्णय लिएको र त्यसबाट भारत असन्तुष्ट भएको दाबी भारतीय सञ्चारमाध्यमहरुले गरेका थिए ।

साथै नेपालले एकातिर भारतको प्रस्तावलाई अस्वीकार गरेको र अर्कोतर्फ आजबाट चीनसँगको बढ्दो निकटता परिणाम स्वरुप छेंग्दुमा सुरु हुने ‘सगरमाथा फ्रेन्डसीप–२’ नाम दिइएको नेपाल–चीन संयुक्त सैन्य अभ्यासमा सहभागी हुन लागेको समेत भारतीय सञ्चारमाध्यमहरुले उल्लेख गरेका थिए । जबकि चीनसँगको सैन्य अभ्यास पूर्वनिर्धारित कार्यक्रमअनुसार नै हुन लागेको हो ।

भारतीय सेना प्रमुख रावतले चीनले पनि भारतले जस्तै बजार खोजिरहेको, त्यसमा दुवैबीच प्रतिस्पर्धा रहेको हुँदा जसले राम्रो गर्न सक्यो उसैले जित हासिल गर्ने समेत बताएको द इण्डियन एक्सप्रेस ले लेखेको छ । त्यसैगरी पुनेमा गरिएको जस्तै सैन्य अभ्यास भविष्यमा पनि जारी रहन्छ भन्ने प्रश्नमा रावतले भारतले पहल गरेको तर, यसलाई भविष्यमा कसरी र कहाँ निरन्तरता दिने सम्बन्धमा निक्र्यौल हुन बाँकी रहेको बताएका छन् ।

त्यसैगरी सोमबारदेखि बैंककमा सुरु हुने बिमस्टेक राष्ट्रका उच्च अधिकारीहरुको बैठकमा कनेक्टिभिटी मास्टर प्लानलगायतका एजेण्डामा छलफल हुने बताइएको छ । तीन साता अघि काठमाडौंमा सम्पन्न शिखर सम्मेलनले मास्टर प्लानलाई चाँडै टुंगोमा पुऱ्याउने निर्णय गरेको थियो ।

प्रकाशित : आश्विन १, २०७५ ११:११
पूरा पढ्नुहोस्
प्रतिक्रिया
पठाउनुहोस्
×