‘सिरियामा आक्रमण गरे स्थिति भयावह’

रोयटर्स/बीबीसी

मस्को/दमास्कस — रूसी राष्ट्रपति भ्लादिमिर पुटिनले सिरियामा अमेरिकाले ‘पुन: आक्रमण गरे स्थिति भयावह हुने’ चेतावनी दिएका छन् ।

इरानी समकक्षी हसन रुहानीसँगको टेलिफोन कुराकानीमा दुई नेताहरू अमेरिकी नेतृत्वले गरेको आक्रमणका कारण सिरियामा राजनीतिक सम्झौताको सम्भावना सकिएकोमा सहमत भएका छन् ।

रूसी राष्ट्रपतिको कार्यालयले सोमबार जारी गरको विज्ञप्तिमा उल्लेख छ, ‘यदि पश्चिमा देशहरूले राष्ट्रसंघीय बडापत्रको प्रतिकूल कुनै कदम चाले भने त्यसले अन्तर्राष्ट्रिय सम्बन्धमै भयावह स्थिति उत्पन्न हुन्छ ।’ रोयटर्सका अनुसार अमेरिकाले मस्कोविरुद्ध थप आर्थिक प्रतिबन्ध लगाउने तयारी गरिरहँदा रूसी राष्ट्रपतिले चेतावनी दिएका छन् । एक अमेरिकी टेलिभिजसँगको अन्तर्वार्ताका क्रममा राष्ट्रसंघका लागि अमेरिकी राजदूत निकी हलीले अमेरिकाले रूसविरुद्ध छिट्टै नयाँ आर्थिक प्रतिबन्धको घोषणा गर्ने बताइन् । हलीले त्यस्ता प्रतिबन्धहरू सिरियाली राष्ट्रपति बसर अल–असदले प्रयोग गरेको रासायनिक हतियार निर्माणका लागि सहयोगी कम्पनीप्रति लक्षित रहेको दाबी गरिन् ।

अमेरिका, बेलायत र फ्रान्सले सिरियाको पूर्वी सहर डुमा गत साता सिरियाली सरकारी फौजले गरेको आक्रमणमा रासायनिक हतियार प्रयोग गरेको दाबी गर्दै आएका छन् । त्यसको प्रतिक्रियामा उनीहरूले शनिबार १ सय ५ वटा क्षेप्यास्त्र प्रहार गरेका थिए । अमेरिकी रक्षा मन्त्रालय पेन्टागनले ती क्षेप्यास्त्रहरू सिरियाको रासायनिक हतियार निर्माण तथा भण्डारण स्थलमा प्रहार गरिएको हो ।

तर रूस र सिरियाले उक्त हमलामा कुनै पनि रासायनिक हतियारको प्रयोग नगरेको बताउँदै आएका छन् । रूसले राष्ट्रपति असदको पक्षमा विद्रोहीलक्षित कारबाहीमा सहयोग गर्दै आएको छ । यसअघि, आइतबार अमेरिकी राष्ट्रपति डोनाल्ड ट्रम्पले सिरिया सरकारले विद्रोहीविरुद्ध रासायनिक हतियार प्रयोग गरे पुन: आक्रमण गर्ने चेतावनी दिएका थिए ।

अमेरिकी गठबन्धनको हमलापछि प्रतिक्रिया दिँदै ट्रम्पले आक्रमणपछि ‘लक्ष्य प्राप्त भएको’ बताएका थिए । समाचार संस्था रोयटर्सका अनुसार उक्त आक्रमणमा ट्रम्प रूसीहरू नपरून् भनेर संयमित बनेको जनाएको छ ।

प्रकाशित : वैशाख ४, २०७५ ०८:४१
ADVERTISEMENT
प्रतिक्रिया
पठाउनुहोस्
ADVERTISEMENT

‘ट्रम्प राष्ट्रपतिका लागि अयोग्य’

बीबीसी

वासिङ्टन — अमेरिकी संघीय अनुसन्धान निकाय (एफबीआई) का पूर्वनिर्देशक जेम्स कोमीले ‘महिलालाई सामानको रूपमा हेर्ने’ डोनाल्ड ट्रम्प राष्ट्रपतिका लागि ‘नैतिक रूपमा अयोग्य भएको’ बताएका छन् ।

पदबाट बर्खास्त गरिएपछि कोमी पहिलोपटक टेलिभिजन अन्तर्वार्तामा देखिएका हुन् । अन्तर्वार्ता प्रसारण हुनुभन्दा केही घण्टा पहिले ट्रम्पले कोमीले ‘धेरै झूट बोलेको’ बताएका थिए ।

अन्तर्वार्ताका क्रममा कोमीले रूससँग ट्रम्पलाई तर्साउन प्रयोग गर्न मिल्ने सामग्री भएको हुन सक्ने बताए । उनले राष्ट्रपति ट्रम्पले न्यायलाई अवरोध गरिरहेको केही प्रमाण निश्चित रूपमा रहेको दाबी गरे ।

ट्रम्पले ट्वीटरमा कोमीको आलोचना गर्दै उनलाई ‘ठग’ र ‘नराम्रो व्यक्ति’ भनेका छन् । कोमीले ट्रम्प राष्ट्रपतिको जिम्मेवारी बहन गर्न मानसिक रूपमा आयोग्य नभए पनि निरन्तरको झूटोपन र महिलाबारेका धारणाका कारण उनी अक्षम रहेको दाबी गरे ।

कोमीले ट्रम्पले सत्य र महत्त्वपूर्ण कुरालाई खासै चासो नदिने जनाए । ‘हाम्रो देशका राष्ट्रपतिले आधारभूत मान्यतालाई सम्मान र पालना गर्नैपर्छ,’ उनले भने, ‘सबैभन्दा मूल कुरा सत्य हो । तर राष्ट्रपतिले त्यसो गर्न सकिरहनुभएको छैन ।’

ट्रम्प र कोमीबीच लामो समययता वाक्युद्ध चलिरहेको छ । कोमीले आफ्नो आत्मकथा प्रकाशनमा ल्याउने घोषणा गरेपछि दुई जनाबीचको विवाद उत्कर्षमा पुगको हो । एफबीआईका पूर्वप्रमुख कोमी हाल आफ्नो पुस्तकको प्रचार प्रसारमा व्यस्त छन् ।

यसअघि ट्रम्पले ‘नराम्ररी सम्पादन गरिएको पुस्तक’ ले ठूला सवालहरू खडा गर्न सक्ने बताएका थिए । पुस्तकमा कोमीले ट्रम्पको आनीबानी र पारिवारिक सम्बन्धबारे पनि केही खुलासा गरेपछि उनले कोमीलाई थुनामा राख्नुपर्ने बताएपछि दुई जनाबीच वाक्युद्ध चर्केको हो । कोमी सन् २०१३ को सेप्टेम्बर ४ देखि एफबीआईको निर्देशकका बनेका थिए । उनलाई राष्ट्रपति ट्रम्पले २०१७ को मे ९ मा पदबाट बर्खास्त गरेका हुन् । पूर्ववकिल तथा लेखक कोमी डिसेम्बर २००३ देखि अगस्ट २००५ सम्म अमेरिकाको महान्यायधिवक्ता बनेका थिए ।

प्रकाशित : वैशाख ४, २०७५ ०८:४०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT