रजनीकान्तले गरे नयाँ पार्टी बनाउने घोषणा

नयाँ दिल्ली — दक्षिण भारतका सुपरस्टार अभिनेता रजनीकान्तले आफ्नो प्रशंसकका अगाडि राजनीतिमा आउने घोषणा गरेका छन् । रजनीकान्तले तमिलनाडुमा अब हुने विधानसभा चुनावमा नयाँ पार्टी बनाएर भाग लिने बताएका हुन् ।

रजनीकान्तले आफू कायर नभएको बताउँदै जस्तोसुकै प्रतिकुल अवस्था आए पनि पछि नहट्ने दाबी गरे। आफ्नो छोटो भाषणमा उनले भने, 'तमिलनाडुमा लोकतन्त्रको अवस्था एकदमै दयनीय छ। त्यसलाई हटाउन सिस्टममा परिवर्तन आवश्यक छ।'

'अहिले हाम्रो राज्यको अवस्था निकै नाजुक छ। यस्तो अवस्थामा यदि म अगाडि नआउने हो भने त्यो मेरो लागि नै लाजमर्दो विषय हुन्छ। म राजनीतिमा आउने कुरा सिनेमा होइन साँचो हो,' राघवेंद्र कल्याण मण्डपममा प्रशंसकहरुको बाक्लो उपस्थितिबीच उनले भने, 'मैले गरेका वाचाहरु यदी तीन वर्ष भित्र पुरा गर्न सकिन भने म राजिनामा दिएर हिँड्छु।'

रजनीकान्तले आफ्ना समर्थकहरुलाई पनि राजनीतिमा होमिएर गाउँको गल्ली गल्लीमा जान आव्हान गरेका थिए।

प्रदेशको लोकप्रिय मुख्यमन्त्री जयललिताको निधन पछि त्यहाँको राजनीतिमा अस्थिरता आएको छ। जयललिताको निधन पछि नै रजनीकान्त राजनीतिमा आउन सक्ने अडकलवाजी भइरहेको थियो। ६७ वर्षिय रजनीकान्तले २०२१ मा हुने विधानसभा चुनावमा उनको नयाँ पार्टीले सबै २३४ सीटमा उम्मेदवारी दिने पनि घोषणा गरे।

तामिल नाडुको राजनीतिमा पहिलेदेखि नै सिनेमाका चर्चित अभिनेताहरुको दबदबा रहँदै आएको छ। स्व जयललिता पनि आफ्नो समयको चर्चित अभिनेत्री थिइन्। त्यसैले पनि उनको स्थान लिनलाई सिनेमाका पर्दामा संधै जनताको रक्षक बनेर देखा पर्ने सुपरस्टार रजनीकान्त सक्षम हुने विश्वास आम मानिसलाई छ।

प्रकाशित : पुस १६, २०७४ १२:२४
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

पार्टी एकता गरेकै दिन ओली र दाहालले सक्रिय राजनीतिबाट बिदा लिनुपर्छ: योगेश भट्टराई

बालकृष्ण बस्नेत

काठमाडौँ — एमाले सचिव योगेश भट्टराईले पार्टी एकता भएकै दिन एमाले अध्यक्ष केपी शर्मा ओली, माओवादी केन्द्रका अध्यक्ष पुष्पकमल दाहालसहितका शीर्ष नेताहरुले सक्रिय राजनीतिबाट बिदा लिनुपर्ने बताएका छन् ।


दुई कम्युनिस्ट पार्टीका नेताहरुले राजनीतिबाट बिदा लिएर नेपालको शान्ति प्रक्रियाबारे अन्तर्राष्ट्रिय विश्वविद्यालयमा अध्यापन गराउन जाँदा उचित हुने भट्टराईको सुझाव छ । ‘एकता घोषणा भएकै दिन दुई पार्टीका नेताले सक्रिय राजनीतिबाट बिदा लिए हुन्छ, त्यसो भए उहाँहरु विश्वमा नेल्सन मन्डेलाजस्तै सम्माननीय हुनुहुन्छ,’ ओली र दाहालसहित माधवकुमार नेपाल, झलनाथ खनाल, वामदेव गौतमलगायतका नेताहरुले राजनीतिमा १०० पूर्णांकमा शतप्रतिशत अंक पाएको उल्लेख गर्दै भट्टराईले भने, ‘उहाँहरुले हावर्ड र अक्सफोर्डमा नेपालको शान्तिप्रक्रियाबारे पढाउन गए हुन्छ ।’

हावर्ड र अक्सफोर्डमा विश्वका धेरै नेताहरुले अध्यापन गराउन गएको एमाले सञ्चार इलाका कमिटीले आइतबार राजधानीमा गरेको कार्यक्रममा भट्टराईले उदाहरण पेस गरे । उनले एमाले र माओवादी केन्द्र एकता हुनेमा कुनै शंका नभएको बताए ।

संसदीय निर्वाचनपछि पुरानो संसद जानु र नयाँ आउनु संसदीय व्यवस्थाको सामान्य प्रचलन भएको उल्लेख गर्दै भट्टराईले तर कांग्रेसले सत्ता नछाडेर ‘नकचरोपन’ देखाएको बताए । ‘बेलायत र भारतमा पनि बहालवाला प्रधानमन्त्रीको पार्टीले हार्दा सर्लक्क छाड्छन्,’ नियम कानुनभन्दा पनि राजनीतिक नैतिकता माथि हुने बताउँदै उनले भने, ‘हाम्रा प्रधानमन्त्री शेरबहादुर देउवा नकचरो तालले सत्तामा टाँसिनुभएको छ ।’

वंशजका अन्तिम शासकले अन्तिममा चुरीफुरी यस्तै हुने बताउँदै एमाले प्रचार विभाग प्रमुखसमेत रहेका भट्टराईले कांग्रेस अबको पचासौं वर्ष सत्ता बाहिर हुने जिकिर गरे । ‘ज्ञानेन्द्रले पनि अन्तिममा आफैँ प्रधानमन्त्री हुने, फुलमाला लगाउने, मन्त्री छान्ने काम गरे,’ उनको भनाइ छ, ‘देउवाको चुरीफुरी पनि स्वभाविक हो, कांग्रेस ५० वर्षसम्म सत्तामा आउन सक्दैन ।’

भट्टराईले कांग्रेसलाई नैतिकता र लोकतन्त्रको पाठ जति पढाए पनि चेत नआउने बताउँदै भने, ‘हामीलाई त्यति दुखमनाउ छैन, दुई चार जनालाई प्रदेश प्रमुख आउलान्, भोलि हाम्रो सरकार बनाएपछि हामीलाई नै स्यालुट गर्छन्, कांग्रेसलाई यस्ता कुरा सुनाउनु भैंसीलाई बिणा बजाएजस्तै हो, सर्प भए पो नाच्नु ।’

भट्टराईले निर्वाचन आयोगका कामहरु सन्तोषजनक नभएको बताउँदै विवेकले काम गर्न सुझाव दिए । ‘निर्वाचन आयोगले जसरी काम गरेको छ, हाम्रो आपत्ति छ,’ उनको भनाइ छ, ‘विवेकले काम गर्नुस्, नेपाली टोपी लगाएर अरुकै काम गर्ने भए बेग्लै कुरा, होइन भने के नाटक गरेको ?’

राष्ट्रियसभाका लागि पुन: दल दर्ता गर्ने कार्यतालिका निकालेर आयोगले नौटंकी गरेको भट्टराईको भनाइ छ ।

प्रकाशित : पुस १६, २०७४ ११:२६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×