ट्रम्पको यात्रा प्रतिबन्धमा अदालतको अवरोध
वासिङटन — अमेरिकी राष्ट्रपति डोनाल्ड ट्रम्पले केही दिन अघि जारी गरेको यात्रा प्रतिबन्धको आदेश अदालतले पुन: रोकिदिएको छ ।
कार्यान्वयनमा आउनु अघि नै हवाईको अदालतले ट्रम्पको आदेशले राष्ट्रियताको आधारमा विभेद गरेको भन्दै यात्रा प्रतिबन्ध कार्यान्वयन नगर्न आदेश दिएको हो ।
मार्च ६ मा ट्रम्पले ६ वटा मुस्लिम बाहुल्यता भएको देशका नागरिकलाई अमेरिका प्रदेशमा रोक लगाउने आदेश जारी गरेका थिए ।
आधा दर्जन भन्दा बढी राज्यले राष्ट्रपति ट्रम्पको यात्रा प्रतिबन्ध कार्यान्वयन नगर्न प्रयास गरेका छन् । तीमध्ये मेरिल्याण्ड, वासिङ्गटन र हवाईको अदालतको यसको विपक्षमा बहस भएको थियो ।
अमेरिकी डिष्ट्रिक अदालतका न्यायाधीश डेट्रिक वाट्सनले राष्ट्रपतिको यात्रा प्रतिबन्ध कार्यान्वयन नगर्न आदेश दिएका हुन् ।
राष्ट्रपति हुनेवित्तिकै ट्रम्पले दिएको यस्तै खालको यात्रा प्रतिबन्धको आदेश पनि अदालतले रोकेको थियो । ट्रम्पले उक्त आदेश परिमार्जन गरी आज बिहीबारदेखि लागू हुने गरी आदेश दिएका थिए ।
प्रकाशित : चैत्र ३, २०७३ १५:०८