ओबामा फ्रान्स जाने- विश्व - कान्तिपुर समाचार
कान्तिपुर वेबसाईट
AdvertisementAdvertisement

ओबामा फ्रान्स जाने

एपी

वासिङ्टन — अमेरिकी राष्ट्रपति बाराक ओबामा जलवायु परिवर्तनसम्बन्धी राष्ट्रसंघीय सम्मेलनमा सहभागी हुन फ्रान्सको राजधानी पेरिस जाने भएका छन्। अमेरिकी राष्ट्रपतिको कार्यालय ह्वाइट हाउसले सोमबार दिएको जानकारीअनुसार विश्वव्यापी रूपमा बढ्दो मात्रामा देखिएको जलवायु परिवर्तनको चासोको सम्बोधनका लागि पहल भइरहेको भनिएको उक्त सम्मेलनमा सहभागिताका लागि राष्ट्रपति ओबामा जान लागेका हुन्।

ह्वाइट हाउसका प्रवक्ता जोस अर्नेस्टले दिएको जानकारीअनुसार राष्ट्रपति ओबामा यही नोभेम्बर ३० र डिसेम्बर १ का दिन मात्र उक्त सम्मेलनमा सहभागी हुनेछन्। सम्मेलन नोभेम्बर ३० बाट सुरु हुँदै छ। उक्त सम्मेलनमा विश्वका थुप्रै नेताहरूको सहभागिता हुने अनुमान गरिएको छ।

‘जलवायु परिवर्तनजस्तो विश्वव्यापी समस्याको एजेन्डामा विश्वका नेताहरूसँग छलफल र परामर्श गर्न राष्ट्रपति ओबामा त्यहाँ जान लागेका हुन्,’ प्रवक्ता जोसले बताए।

यसको प्रभाव कम गर्न आवश्यक कार्बन कटौतीका कार्यक्रममा पनि उनले जोड दिने ह्वाइट हाउसले जनाएको छ। यसैबीच अर्को एक समाचारअनुसार राष्ट्रपति बाराक ओबामाले सोमबारै आफ्नो नयाँ फेसबुक पेज पनि सञ्चालनमा ल्याएका छन्। उनले उक्त पेजमा गरेको पहिलो पोस्टमा जलवायु परिवर्तनको असर कम गर्ने कार्यका लागि सबैसँग आग्रह गरेका छन्।

प्रकाशित : कार्तिक २५, २०७२ १०:०७
प्रतिक्रिया
पठाउनुहोस्

बंगलादेशमा दर्जनौं गार्मेन्ट कारखाना बन्द

२० हजार कामदार प्रभावित
सिन्हवा

ढाका — बंगलादेशमा दर्जनौं गार्मेन्ट (तयारी पोसाक) कारखाना बन्द भएका छन्। यसका कारण कम्तीमा पनि २० हजार कामदार प्रभावित भएको समाचारमा जनाइएको छ।

बंगलादेशमा तयारी पोसाकका कारखानाहरूमा सुरक्षित मापदण्डको पालना नगरेको भन्दै आलोचना हुँदै आएको छ। त्यस कारणले पनि त्यहाँ भवन भत्किने, आगलागी हुने र अन्य कारणले ठूलो जनधनको क्षति हुने गरेको थियो। सन् २०१३ मा पनि यस्तै एक कारखानाको भवन भत्किएर भएको दुर्घटनामा परी एक हजार जनाभन्दा बढीको ज्यान गएको थियो। उक्त दुर्घटना भएपछि त्यसयता सरकारले सुरक्षित मापदण्ड लागू गर्ने र त्यसो नगर्नेका कारखाना बन्द गराउने अभियान चलाएको थियो।

यस अभियानका क्रममा २०१३ पछि आजसम्ममा करिब ७३ वटा यस्ता कारखाना बन्द भएका छन्। यसबाट ठूलो संख्याका मजदुर प्रभावित भएको बताइएको छ। ती कारखानाहरूको अनुगमनमा खटिएका एक वरिष्ठ प्रहरी अधिकारी सइद अहमदले भने, ‘३७ वटा ठूला यस्ता कारखाना नै बन्द गराइएको छ।’
ती कारखानामा कार्यरत मात्र १६ हजार ९ सय ३८ जना कामदार बेरोजगार बन्न पुगेका छन्। त्यसका अतिरिक्त अरू सानोखाले कारखाना पनि बन्द भएको समाचारमा जनाइएको छ। जसका कारण बेरोजगार हुने कामदारको संख्या करिब २० हजार पुगेको अधिकारीहरूले जनाएका छन्।

अरू ३६ वटा कारखानामा पनि उत्पादन बन्द गरिएको छ। ती कारखानाको पनि खारेजीको सूचना जारी गर्न लागिएकाले त्यसमा रहेका दुई हजारभन्दा बढी कामदार बेरोजगार हुने भएका छन्। सन् २०१३ को उक्त दुर्घटनापछि अन्तर्राष्ट्रिय श्रम संगठन, आईएलओको संलग्नतामा अनुगमनको काम अघि बढाइएको थियो।

आईएलओका प्रतिनिधिको रोहबरमा बंगलादेश प्रहरी पनि सम्मिलित समूहले उक्त कार्यको निरीक्षण जारी राखेका छन्। बंगलादेशको मुख्य निकासी बजार गार्मेन्ट हो र यसको मुख्य बजार युरोप र अमेरिका हो।

प्रकाशित : कार्तिक २५, २०७२ १०:०५
पूरा पढ्नुहोस्
प्रतिक्रिया
पठाउनुहोस्
×