विकासोन्मुख देशलाई चीनको २ अर्ब डलर

चिनियाँ राष्ट्रपति सी जिनपिङले विकासोन्मुख देशहरूका लागि २ अर्ब अमेरिकी डलरको कोष खडा गर्ने घोषणा गरेका छन्।

दिगो विकास लक्ष्यसम्बन्धी संयुक्त राष्ट्रसंघीय शिखर सम्मेलनलाई सम्बोधन गर्दै जिनपिङले सार्थक लगानी वृद्धिका लागि चिनियाँ योजना सार्वजनिक गरेका हुन्। आगामी १५ वर्षमा त्यस्तो लगानी १२ अर्ब डलर पुग्ने उनले बताए। स–साना टापु मुलुकलगायत विश्वका अतिकम विकसित देशलाई दिइने ब्याज मिनाहा गरिने उनले घोषणा गरे। आगामी ५ वर्षका लागि ६ सयवटा वैदेशिक सहायता कार्यक्रम सञ्चालन गरिने बताए। जसलाई ६ वटा १ सय (सिक्स वान हन्ड्रेड) योजना नाम दिइएको छ। जसअन्तर्गत गरिबी उन्मूलन, कृषि उपज समन्वय, व्यापार सरलीकरण, वातावरण सुरक्षा र जलवायु परिवर्तनका प्रभाव सामना, अस्पताल र क्लिनिकहरू निर्माण, विद्यालय र व्यावसायिक तालिम केन्द्र स्थापनाका लागि १/१ वटा परियोजना सञ्चालन गर्ने चिनियाँ योजना छ।

‘संसारको परिस्थिति हेर्दा शान्ति र विकासका लागि २ मुख्य विषयवस्तु देखिन्छन्,’ राष्ट्रपति जिनपिङले भने, ‘युरोपेली शरणार्थी समस्यासहित धेरै विश्वव्यापी चुनौतीको समाधान गर्नु तथा शान्ति र वास्तविक विकासको अनुभूति दिलाउनु नै मुख्य विषय हुन्।’ चुनौती र कठिनाइको सामना गर्दै विश्वले विकासमा फड्को मार्नुपर्ने उनले बताए। ‘विकासले मात्र द्वन्द्वका कारक तत्त्वलाई निर्मूल पार्न सक्छ,’ उनले भने।

विकसित देशले दिने सहायताले दिगो विकाससम्बन्धी राष्ट्रसंघीय लक्ष्य प्राप्तिमा चुम्न टेवा पुर्‍याउने उनले भनाइको एक दिनअगाडि सबै सदस्य राष्ट्रले त्यसका लागि महत्त्वाकांक्षी कार्यक्रम सञ्चालनको प्रतिबद्धता जनाएका थिए। राष्ट्रसंघले सन् २०३० सम्ममा गरिबी र भोकमरी अन्त्यको उक्त लक्ष्य प्राप्त गर्ने महत्त्वाकांक्षी योजना सार्वजनिक गरेको छ।

यसअघिको सहस्राब्दी विकास लक्ष्यमा चीनले सन्तोषजनक प्रगति गरेको थियो। धेरै परिवारले गरिबीको चक्रबाट मुक्ति पाएका छन्। यो चीनको असाधारण रेकर्ड त हो नै, गरिबी निवारणमा विश्वव्यापी लक्ष्य हासिल गर्ने कुरालाई पनि सुनिश्चित गर्छ। राष्ट्रपति जिनपिङको भनाइमा अहिले घरेलु समस्यामाथि विजय हासिल गरेर चीन खासगरी अफ्रिकी मुलुकको रूपान्तरणका लागि विकास साझेदार बन्ने दिशामा उन्मुख छ। नयाँ पहलले उदाउँदो आर्थिक महाशक्ति चीनलाई थप जिम्मेवारी दिएको छ।

आगामी ५ वर्षमा चीनले विकासोन्मुख देशका १ लाख २० हजार जनसंख्यालाई कोष र १ लाख ५० हजार विद्यार्थीलाई छात्रवृत्ति प्रदान गर्दै छ। दक्षिण–दक्षिण समन्वय र विकास प्रतिष्ठानहरू स्थापना गर्ने चिनियाँ योजना छ। विश्व स्वास्थ्य संगठनका लागि २ अर्ब डलर नगद उपलब्ध गराउँदै छ। ‘विकासोन्मुख देशहरूसँग एकता र समन्वय चिनियाँ विदेश नीतिको मूल जग हो,’ राष्ट्रपति जिनपिङले भने।