७ सय वर्ष पुरानो टुँडाल घर फिर्ता

झन्डै ४५ वर्षअघि चोरिए पनि यो टुँडाल सन् २००० यता भने सिड्नीको आर्ट ग्यालरी अफ न्यु साउथ वेल्समा पाइएको सूचना बाहिर आएको थियो । त्यसपछि सुरु भएको उत्पत्तिको पहिचान तथा सम्पदा अधिकारसम्बन्धी प्रमाण पहिल्याउने काममा पूर्णता पाएपछि टुँडाल काठमाडौं आइपुगेको हो ।

मंगलबार पाटन म्युजियममा आयोजित एक समारोहमाझ अस्ट्रेलियाका सहायक परराष्टमन्त्री टिम वाट्स र सिड्नी ग्यालरीका निर्देशक माइकल ब्रान्डले उक्त टुँडाल रत्नेश्वर मन्दिरका मुख्य पुजारी हेरम्बराज राजोपाध्यायलाई हस्तान्तरण गरेका हुन् ।

सम्पदा खोजबिन र घरफिर्तीको अभियान, लस्ट आर्टस् अफ नेपालका अनुसार सिड्नीको आर्ट ग्यालरी अफ न्यु साउथ वेल्समा अझै पनि भूपतीन्द्र मल्ल दम्पतीको सालिक, पद्मपाणी लोकेश्वर आकृति र बोधिसत्व अवलोकितेश्वरका मूर्ति प्रर्दशनीमा छन् । यी सम्पदा पनि घर फिर्ता ल्याउने सहकार्य र संवाद जारी रहेको सम्पदाप्रेमी रवीन्द्र पुरीले बताए ।

रत्नेश्वर मन्दिरका पुजारी प्रतिनिधि सुनील शर्माका अनुसार, घरफिर्ता भएको टुँडाल सम्पदा तत्काल पाटन म्युजियममा राखिए पनि पछि मन्दिरमा प्रतिस्थापन गरिने भएको छ । टुँडाल हस्तान्तरण समारोहमा ललितपुर महानगरका मेयर चिरीबाबु महर्जन, काठमाडौं महानगरकी उपमेयर सुनिता डंगोल, पर्यटन मन्त्रालयका सचिव सुरेश अधिकारी, पुरातत्व विभागका महानिर्देशक दामोदर गौतम, काठमाडौंस्थित अस्ट्रेलियाली राजदूत फेलिसिटी भोल्कसहितको उपस्थिति थियो ।