काठमाडौँ — भक्तपुरको ताथलीस्थित चाँगुनारायण नगरपालिका-९ सौडोलमा रहेका बस्नेत समुदायले महाखली पर्व मनाएका छन् । खाली खुट्टाले आगोको कोइलामा हिँडेर मनाइने यो जात्रालाई स्थानीय कौशिक गोत्रका खप्तडी बस्नेत बन्धुले कुल देवताको पूजाको रुपमा पनि मनाउने गरेका छन् ।

यसअन्तर्गत भर्भराउँदो आगो निभेपछि बाँकी रहेको तातो कोइलामाथि स्थानीय वृद्ध र युवाहरू खाली खुट्टाले हिँड्दै घुम्ने गर्छन् । रातको समयमा यसरी घुमेर 'खली खाएपछि' युवाहरू परिपक्व बन्छन् भन्ने जनविश्वास छ । यसरी आगोमा हिँड्दा 'पाप' गर्नेको खुट्टा पोल्ने र 'धर्म' गर्नेको खुट्टा नपोल्ने स्थानीयहरूको विश्वास छ । स्थानीयहरूका अनुसार पुस्तौंदेखि नै यो चलन यहाँ परम्पराको रुपमा चलिआएको छ ।