राज्यप्रतिको भरोसा बढाउन प्रहरीको आन्तरिक सुदृढीकरण गर्छु : आईजीपी कुँवर
काठमाडौँ — नेपाल प्रहरीका नवनियुक्त प्रहरी महानिरीक्षक(आईजीपी) बसन्त कुँवरले नेपाल प्रहरी राज्यको पहिलो अनुभूति दिलाउने अंग रहेको भन्दै राज्यप्रतिको भरोसा बढाउन प्रहरीको आन्तरिक सुदृढीकरणमा जोड दिने बताएका छन् ।महानिरीक्षकमा बढुवा भएपछि आइतबार दर्ज्यानी चिह्नबाट सुशोभित भएपछि महानिरीक्षक कुँवरले प्रहरी नागरिकका हरेक दुःख र पीडाको प्रत्यक्ष साक्षी र सहयोगी रहेको बताए ।
‘प्रहरी संगठन समाजभन्दा अलग छैन । समाजमा देखिने राम्रा नराम्रा सबै पात्रहरू प्रहरीमा छन् । प्रहरीमा सुधार आवश्यक छ, तर त्यसका लागि दिन गनेर बस्ने छुट पनि छैन,’ महानिरीक्षक कुँवरले भने, ‘कसैले मार्ग बिराएका छन् भने तिनीहरूले आफूलाई नसुधारेर विकल्प छैन । प्रहरीको आन्तरिक सुदृढीकरण मेरो भीष्म प्रतिज्ञा हो, म यसबाट किञ्चित पनि डगमगाउने छैन ।’
उनले आफ्नो कार्यकालमा प्रहरीले नागरिकमा राज्यप्रतिको भरोसा र प्रगाढता बढाउने गरी काम गर्ने र कार्ययोजना बनाउने बताए । ‘अपराधको रोकथाम, अनुसन्धान, कुनै पनि बाहना र विकल्पबिना शान्ति सुरक्षाको व्यवस्थाकालागि नेपाल प्रहरी कटिबद्ध रहनेछ,’ उनले भने, ‘प्रहरी संगठनको क्षमता अभिवृद्धि, न्यूनतम मानवीय आवश्यकता, श्रोतसाधनको समान वितरणमा कुनै कमजोरी हुँदैन, निष्पक्षता कायम रहन्छ ।’
महानिरीक्षक कुँवरलाई गृहसचिव विनोदप्रकाश सिंहले आइतबार गृह मन्त्रालयमा दर्ज्यानी चिह्न प्रदान गरेका हुन् । सरकारले गत शुक्रबार कुँवरलाई नेपाल प्रहरीको महानिरीक्षक (आईजीपी)मा बढुवा गरेको थियो ।
