मिडिया विधेयकलाई तत्काल अगाडि बढाउने तयारीमा छौं : सञ्चारमन्त्री शर्मा

प्रेस काउन्सिल र नेपाल पत्रकार महासंघको भेटघाट कार्यक्रममा सोमबार बोल्दै मन्त्री शर्माले संसद्‌मा पेस गर्न बाँकी मिडिया विधेयकहरूलाई सरकारले तत्काल अगाडि बढाउने कार्ययोजनामा रहेको बताइन् । उनले त्यसका लागि तत्काल सरोकारवाला निकायहरूले आवश्यक सल्लाह सुझावहरू मन्त्रालयलाई दिनसमेत आग्रह गरिन् ।

सञ्चारमन्त्री शर्माले आमसञ्चार क्षेत्रका लागि बनेका कानुनहरू अधिकांश पुराना भएकाले वर्तमान अवस्थाका आधारमा कानुन परिमार्जन गर्न आवश्यक रहेको र सरकार सकारात्मक रहेको बताएकी छन् । मन्त्री शर्माले आमसञ्चार क्षेत्रलाई आवश्यक ऐन, कानुन बनाउँदा सरोकारवाला निकायहरूसँग सहकार्य गरेर अगाडि बढ्न सरकार तयार रहेको बताए । उनले आमसञ्चार क्षेत्रको विकास, समृद्धि र सबलीकरण हुनु भनेको राज्यको सबलीकरण हुनुसरह रहेको बताइन् । उनले देशको राजनीतिक परिवर्तन र पत्रकारिता अभिन्न अंगका रुपमा जोडिएको भन्दै राजनीति र पत्रकारिता सहकार्यले मात्रै मुलुकमा ठूला-ठूला राजनीतिक परिवर्तन सम्भव भएको धारणा राखिन् ।

उनले भनिन्, ‘आमसञ्चार क्षेत्रका विज्ञहरुको समेत सुझाव लिएर सरकारलाई मिडिया विधेयकबारे तत्काल सल्लाह सुझाव दिन आग्रह गर्दछु । संसद्‌मा पेस भएर बसेको मिडिया विधेयकहरू अगाडि बढाउने कार्ययोजना बनाएर अगाडि बढ्ने तयारीमा सरकार छ । मिडिया र आमसञ्चारको क्षेत्रलाई आवश्यक ऐन‚ कानुन र अन्य काम गर्दा सरकार र सरोकारवाला निकायहरू सहकार्यमा अगाडि बढ्न सरकार तयार रहेको छ ।’

आमसञ्चारको क्षेत्र एउटा महत्त्वपूर्ण क्षेत्र भएको भन्दै उनले यो क्षेत्रको विकास, समृद्धि र सबलीकरण हुनु नै राज्यको सबलीकरण हुनु भएको बताइन् ।