पुतली बगैंचामा यसरी बन्दैछ संघीय संसद् भवन- भिडियो - कान्तिपुर समाचार
कान्तिपुर वेबसाईट
AdvertisementAdvertisement

पुतली बगैंचामा यसरी बन्दैछ संघीय संसद् भवन

कान्तिपुर संवाददाता

काठमाडौँ — सिंहदरबारस्थित पुतली बगैंचामा संघीय संसद् भवन निर्माण भइरहेको छ । २०७९ चैतसम्म निर्माण गरिसक्नुपर्ने समयसीमा पाएको निर्माण कम्पनीले धमाधम काम गरिरहेको छ ।

संसद् भवनको निर्माणबारे संघीय संसद्का पदाधिकारी र सरकारका अधिकारीले बारम्बार अनुगमन गर्ने तथा कामको प्रगति विवरण लिने गरिरहेका छन् । यसैबीच राष्ट्रिय सभाको प्रत्यायोजित व्यवस्थापन तथा सरकारी आश्वासन समितिले सोमबार भवन निर्माणबारे अनुगमन गर्दै चासो राखेको थियो । समिति सभापति मायाप्रसाद शर्माले संसद् भवन निर्माणबारे जानकारी लिँदै त्यसमाथि समितिमा थप छलफल गरिने जानकारी दिएका छन् । संसद् भवनको निर्माण टुन्दी/सेक कम्पनीले गरिरहेको छ । उसले ठेक्का पाएको समय गत असोजमा सकिएको थियो । त्यतिबेला ६ महिना समय थपेर चैतसम्म निर्माण सक्ने सीमा पाएको छ ।

संघीय संसद्को नयाँ भवनमा प्रतिनिधिसभा र राष्ट्रिय सभाका बैठक कक्ष, संसदीय समितिका सचिवालय, संसदीय दलका कार्यालय, पुस्तकालय, चमेनागृहलगायत अत्याधुनिक संरचना निर्माण भइरहेका छन् । अहिले सिंहदरबारमा दुई ठूला भवन र केही अस्थायी भवनमा संचालन भइरहेको सचिवालय र नयाँ बानेश्वरस्थित अन्तर्राष्ट्रिय सम्मेलन केन्द्रलाई भाडा तिरेर दुवै सदनका बैठक संचालन भइरहेका छन् । संघीय संसद् सचिवालयले अन्तर्राष्ट्रिय सम्मेलन केन्द्रलाई वार्षिक १५ करोड ९ लाख रुपैयाँ भाडा तिरिरहेको छ ।

भवन निर्माणको जिम्मेवारी सहरी विकास मन्त्रालय अन्तर्गतको सहरी विकास तथा भवन निर्माण विभागले पाएको छ । भवनका मूख्य संरचना बनिसकेपछि इन्टेरियर डेकोरेसनलगायतका काम बाँकी रहनेछन् । त्यसका लागि थप १ वर्ष समय चाहिने ठेकेदार कम्पनीले विभागलाई जानकारी गराएको अधिकारीले बताएका छन् । सिंहदरबारको पुलती बगैंचामा १ सय ५१ रोपनी क्षेत्रफलमा १२ मूल भवनसहित संसद् भवन निर्माण भइरहेको हो ।

प्रकाशित : माघ ९, २०७९ २१:३९
प्रतिक्रिया
पठाउनुहोस्

११औं हिसान स्पोर्ट्स मिट खेलकुद सुरु

कान्तिपुर संवाददाता

विराटनगर — ११ औं हिसान स्पोर्ट्स मिट खेलकुद प्रतियोगिता सोमबार विराटनगरमा सुरु भएको छ । प्रतियोगिताको उद्घाटन खेलमा फुटवलतर्फ विकेभीएम, कोसी क्याम्पस र अर्किड क्याम्पस विजयी भएका छन् ।

पहिलो खेलमा विकेभीएमले कोभाष कलेजलाई ६–० गोलले पराजित गर्‍यो । त्यसमा म्यान अफ द म्याच सवी चौधरीले ह्याट्रिक गर्दा प्रशिक कार्कीले दुई र निश्चल थारुले एक गोल गरे ।

दोस्रो खेलमा कासी क्याम्पसले सगरमाथा कलेजलाई ३–१ गोलले र तेस्रो खेलमा अर्किड कलेजले मेरिल्याण्ड कलेजलाई २–० गोलले पराजित गरे ।

राष्ट्रियस्तरका खेलाडी तयार गर्ने उद्देश्यले स्पोर्ट्स मिटको आयोजना गरिएको हिसान मोरङका अध्यक्ष अमित ढकालको भनाइ थियो ।

प्रकाशित : माघ ९, २०७९ २१:२२
पूरा पढ्नुहोस्
प्रतिक्रिया
पठाउनुहोस्
×