उपसभामुखमा पनि प्रतिस्पर्धा गर्छौं : लेखक- भिडियो - कान्तिपुर समाचार
कान्तिपुर वेबसाईट
AdvertisementAdvertisement

उपसभामुखमा पनि प्रतिस्पर्धा गर्छौं : लेखक

कान्तिपुर संवाददाता

काठमाडौँ — नेपाली कांग्रेसका प्रमुख सचेतक रमेश लेखकले उपसभामुख निर्वाचनमा पनि प्रतिस्पर्धा हुने बताएका छन् । प्रतिनिधिसभामा बिहीबार सभामुखको निर्वाचनपछि सञ्चारकर्मीसँग संक्षिप्त कुराकानी गर्दै प्रमुख सचेतक लेखकले सभामुखमा जस्तै उपसभामुखमा पनि कांग्रेसले प्रतिस्पर्धा गर्ने बताए ।

उपसभामुखको निर्वाचन आगामी शनिबार हुँदैछ । ‘यो संसदीय व्यवस्था हो । यो भनेकै प्रतिस्पर्धात्मक व्यवस्था हो । हामीले सभामुखमा प्रतिस्पर्धा गर्‍यौँ,’ उनले भने, ‘उपसभामुखमा पनि प्रतिस्पर्धा गर्छौं ।’

उनले उपसभामुखमा कांग्रेसले नै उम्मेदवारी दिने वा अन्य दलहरूबाट उम्मेदवार हुने भन्ने विषयमा भने छलफलपछि मात्रै टुंगो लाग्ने बताए ।

‘हामीले विपक्षी दलहरूलाई एक ठाउँमा ल्याउने प्रयास गरिरहेका छौं । विपक्षी बेञ्चलाई सशक्त बनाएर विपक्षी दलहरू सबैलाई मिलाएर लैजान्छौं,’ उनले भने, ‘दलीय व्यवस्थामा दलहरूबीच निरन्तर छलफल हुन्छ, सभामुखको निर्वाचनमा हामी चार दल एक ठाउँमा उभियौं । अरू दलहरूसँग पनि निरन्तर छलफल हुन्छ, कुराकानी हुन्छ र सहकार्य हुन्छ ।’

उनले राष्ट्रपतिमा गैरदलीय व्यक्तिलाई ल्याउने विषयमा कांग्रेस संलग्न नभएको र त्यस्तो छलफल नभएको दाबी गरे ।

प्रकाशित : माघ ५, २०७९ १८:४०
प्रतिक्रिया
पठाउनुहोस्

विद्यालय तहको खेलकुद सुधार्न खेलकुद शिक्षकलाई प्रशिक्षण

अमृता अनमोल

बुटवल — विद्यालय तहको खेलकुद सुधार्न र १३औँ राष्ट्रपति रनिङ सिल्ड प्रतियोगितालाई प्रभावकारी बनाउन लुम्बिनी प्रदेशका खेलकुद शिक्षकलाई प्रशिक्षण सुरु गरिएको छ ।

खेलको जगका रुपमा विद्यालय खेलकुद भएकाले त्यहि तहबाट अब्बल खेलाडीको छनोट र उचित प्रशिक्षण दिन भन्दै प्रदेश खेलकुद परिषद्‌ले खेलकुद शिक्षकलाई प्रशिक्षण चलाएको हो । बिहीबारदेखि बुटवलमा सुरु भएको प्रशिक्षण ३ दिनसम्म चल्नेछ‚ जसमा लुम्बिनी प्रदेशका १२ जिल्लाका ६० विद्यालयका खेल शिक्षकहरू सहभागी छन् ।

उनीहरुलाई एथलेटिक्सका मुख्य प्रशिक्षक चन्द्र गुरुङ, कबड्डीका मुख्य प्रशिक्षक पार्वती राईलगायत विभिन्न खेल विधाका राष्ट्रिय प्रशिक्षकले प्रशिक्षण दिनेछन् ।

कार्यक्रमको उद्घाटन गर्दै लुम्बिनी प्रदेशका शिक्षा तथा खेलकुद मन्त्रालयका महाशाखा प्रमुख मनोज गैरेले प्रशिक्षणले रनिङसिल्ड प्रतियोगितामा प्रदेशको बलियो उपस्थिति देखाउन सहयोग सिद्ध हुने बताए । उनले खेलकुदलाई पाठ्यक्रमको अभिन्न अंग भएको समेत बताए ।

प्रदेश खेलकुद परिषद् लुम्बिनीका सदस्य सचिव जयप्रकाश भट्टराईले १२औँ राष्ट्रपति रनिङसिल्डमा उत्कृष्ट गरेको प्रदेशलाई यो वर्ष पनि अझ बलियो प्रदर्शन गर्न प्रशिक्षण दिएको बताए ।

प्रकाशित : माघ ५, २०७९ १८:३६
पूरा पढ्नुहोस्
प्रतिक्रिया
पठाउनुहोस्
×