आयात खुले पनि गाडी व्यवसायी आन्दोलित- भिडियो - कान्तिपुर समाचार
कान्तिपुर वेबसाईट
AdvertisementAdvertisement

आयात खुले पनि गाडी व्यवसायी आन्दोलित

आयात खुले पनि व्यवसायको वातावरण भएन : नाडा अध्यक्ष थापा
कान्तिपुर संवाददाता

काठमाडौँ — बिहीबार गाडी व्यवसायीको संगठन नाडा अटोमोबाइल्स एसोसिएसन अफ नेपालले माइतीघर मण्डलामा विरोध प्रदर्शन गरेको छ । सरकारले पुसदेखि लागू हुनेगरी सवारीसाधनको आयात खुला गरे पनि व्यवसायीले भने राष्ट्र बैंकको नीतिका कारण गाडी आयात गर्न सक्ने वातावरण नबनेको, बिक्री हुने वातावरण नबनेको भन्दै विरोध प्रदर्शन गरेका हुन् ।

विरोध कार्यक्रममा व्यवसायीले ‘जसले कर तिर्छ, उसैलाई पेल्छ, बैंकले अपमान गर्छ, सरकार ब्याजदर कहिले घट्छ’ जस्ता नारा लेखिएका प्लेकार्ड बोकेका थिए । सवारी साधनहरुको आयात खुलेपनि राष्ट्र बैंकको नीतिका कारण गाडी बिक्री गर्ने वातावरण नभएको आन्दोलनरत् व्यवसायीको भनाइ छ ।

नाडाका अध्यक्ष ध्रुव थापाले सवारी आयात खुला भएपनि एलसी खोली गाडी आयात गर्न ५० प्रतिशत नगद मार्जिनको व्यवस्था रहेकाले मार्जिन हटाउनुपर्ने बताए । उनले भने ‘गाडी आयात गर्दा ५० प्रतिशत मार्जिन, ५० प्रतिशत मात्रै फाइनान्सिङ गर्न पाइने व्यवस्थाले अटो व्यवसायी मारमा परेका छन् । राष्ट्र बैंकले ५० प्रतिशत नगद मार्जिनलाई पुरानै अवस्थामा ल्याइनुपर्दछ, ५० प्रतिशत मात्रै फाइनान्सिङ मात्रै गर्न पाउने व्यवस्थालाई ८० प्रतिशत बनाइनुपर्छ ।’

त्यस्तै बैंकको ब्याजदर पनि घटाइनुपर्ने व्यवसायीको माग छ । आयात खुलेपनि अहिलेकै बैंक ब्याजदरमा कसैले पनि गाडी खरिद नगर्ने थापाको भनाइ छ । थापाले भने ‘शान्तिपूर्ण धर्ना तथा दबाबमूलक कार्यक्रम गर्दा सरकारले अटो व्यवसायीका मागलाई सम्बोधन नगरे थप आन्दोलन गर्न बाध्य हुनेछौं ।’ अटो क्षेत्रका लागि राष्ट्र बैंकले बनाएका नीतिले गरिखान नदिने उनको भनाइ छ । बजारमा तरलता अभाव, ब्याजदर वृद्धि जस्ता समस्या रहेको उनले औंल्याए ।

अटो क्षेत्रको कर्जामा कायम गरिएको जोखिम भारलाई घटाउनुपर्ने व्यवसायीको माग छ । ‘यस्तो जोखिमभार अहिले १५० प्रतिशत पुर्‍याइएको छ, यसलाई पुरानै अवस्थामा अर्थात् ७५ प्रतिशत नै कायम गरिनुपर्छ’ उनले भने ‘अटोमोबाइल व्यवसायको पुनरुत्थानका लागि कर्जामा पुनर्तालिकीकरण तथा ब्याजदरमा विशेष सहुलियतको व्यवस्था हुनुपर्छ ।’

त्यस्तै बैंकहरुबाट निजी सवारी साधनको हायर पर्चेज लोन प्रवाह गर्ने प्रक्रियामा लोन टु भ्यालु रेसियोको हालको सीमा ५० प्रतिशतबाट वृद्धि गरी ७० प्रतिशत कायम गर्नुपर्ने, पुनर्कर्जा नवीकरण गर्ने म्याद एक वर्षको लागि थप गरिनुपर्ने, कोभिड तथा आयात प्रतिबन्धका कारण लामो समयदेखि थला परेको अटोमोबाइल व्यवसायको पुनरुत्थानका लागि कर्जामा पुनर्तालिकीकरण तथा ब्याजदरमा विशेष सहुलियतको व्यवस्था गरिनुपर्ने माग व्यवसायीले अघि सारेका छन् । विदेशी मुद्रा सञ्चितिमा कमी आउन नदिन नेपाल राष्ट्र बैंकले सवारीसाधनको आयात न्यूनीकरण गर्ने उद्देश्यले सवारीसाधनको कर्जामा विभिन्न माध्यमबाट कडाईका नीति लागू गरेको छ ।

प्रकाशित : मंसिर २२, २०७९ १७:०४
प्रतिक्रिया
पठाउनुहोस्

पश्चिम सेती र पञ्चेश्वर परियोजनाको काम छिट्टै अघि बढ्छ : प्रधानमन्त्री देउवा

अर्जुन शाह

धनगढी — प्रधानमन्त्री शेरबहादुर देउवाले राष्ट्रिय गौरवको पश्चिम सेती जलविद्युत् परियोजना र पञ्चेश्वर परियोजनाको काम चाँडै सुुरु हुने बताएका छन् । धनगढीमा बिहीबार आयोजित सुदूरपश्चिम महोत्सवको उद्घाटनका क्रममा प्रधानमन्त्री देउवाले पश्चिम सेती बनाउन भारतीय कम्पनीले लाइसेन्स लिइसकेको र चाँडै काम सुुरु हुने बताए ।

‘पश्चिम सेती बनाउन भारतीय कम्पनीले लाइसेन्स लिइसकेको छ । त्यो भरपर्दो कम्पनी छ,’ प्रधानमन्त्री देउवाले भने‚ ‘आउने भइसक्या छ ।’ प्रधानमन्त्री देउवाले पञ्चेश्वरको काम पनि चाँँडै सुरु हुने बताए । लुुम्बिनी भ्रमणमा आएका बेला र आफू भारत भ्रमणमा गएका बेला भारतीय प्रधानमन्त्रीले पञ्चेश्वरको विकासमा चासो राखेको उनले बताए । ‘पश्चिम सेती आउनेछ‚ पञ्चेश्वर पनि आउनेछ,’ उनले भने‚ ‘डडेलधुरा र सुदूरपश्चिमको विकास हुनेछ ।’

उनले गौरिफन्टा सीमा नाका व्यवस्थापन तथा स्तरोन्नतिका लागि भारत सरकारसँग कुरा गरेको बताएका छन् । उनले भने‚ ‘यसअघि पनि कुरा गरेको छु र फेरि पनि कुरा गर्छु,’ उनले भने‚ ‘भारतबाट सहयोग हुने विश्वास गरेको छु ।’

प्रधानमन्त्री देउवाले महोत्सवले सुदूरपश्चिमको आर्थिक, सामाजिक, सांस्कृतिक विकासमा टेवा पुुग्ने बताए । उनले महोत्सले स्थानीय उत्पादनको व्यावसायीकरण गर्न प्रचारप्रसार हुने बताए । साथै खप्तड र रामारोशनजस्ता पर्यटकीय क्षेत्रको विकास गरेर सुदूरपश्चिमको पर्यटन क्षेत्रलाई बढाउन सकिने सम्भावना रहेको उनको भनाइ थियो ।

प्रकाशित : मंसिर २२, २०७९ १६:४३
पूरा पढ्नुहोस्
प्रतिक्रिया
पठाउनुहोस्
×