माओवादी 'पेन्डुलम' पार्टी, एमाले र कांग्रेस 'प्रचण्डीकरण' भइसक्यो : मिश्र- भिडियो - कान्तिपुर समाचार

माओवादी 'पेन्डुलम' पार्टी, एमाले र कांग्रेस 'प्रचण्डीकरण' भइसक्यो : मिश्र

कान्तिपुर संवाददाता

काठमाडौँ — राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्रले नेकपा (माओवादी केन्द्र) पेन्डुलम पार्टी भएको आरोप लगाएका छन् । वरिष्ठ उपाध्यक्ष मिश्रले अबको केही वर्षमा नेपालमा राष्ट्रिय प्रजातन्त्र पार्टी, नेकपा एमाले र नेपाली कांग्रेस मात्रै राजनीतिक दलमात्र बाँकी रहने दाबी गरे ।

मिश्रले माओवादी केन्द्र अबको केही वर्षभित्र पेन्डुलम बनेर एक अर्काको पछि लाग्ने वा विलय हुने बताए । ३ पार्टीमध्ये दुई पार्टी एमाले र कांग्रेस एउटै कित्तामा दुई नामका पार्टी मात्रै भएको उनको भनाइ थियो । दुवै पार्टी प्रचण्डीकरण भइसकेको उल्लेख गर्दै एमाले र कांग्रेसलाई जति गाली गरे पनि प्रचण्डपथमा नै हिँडेको उनले बताए ।

उनले भने, ‘यो देशमा अबको केही वर्षमा जम्मा ३ वटा पार्टी रहन्छ । मूल रूपमा राष्ट्रिय प्रजातन्त्र पार्टी, नेकपा एमाले र नेपाली कांग्रेस । माओवादी पेन्डुलम जस्तो यता र उति गर्छ, की त्यो विलय हुन्छ, कि त्यो साँघुरिएर बस्छ । त्यसबाहेक अर्को क्षेत्रीय र अन्य दलहरू सानो-सानो अवस्थामा रहन्छन् । तीन वटामा दुई वटा पार्टी एमाले र कांग्रेस एउटै कित्तामा भएका दुई नामका पार्टी मात्रै हुन् । एउटै कित्ताका पार्टी हुन् । किनभने यी दुवै पार्टीको लगभग प्रचण्डीकरण भइसक्यो । जति गाली गरे पनि प्रचण्डीकरण भइसक्यो । त्यही बाटोमा हिँडेका छन् । अर्को नरम संवर्द्धनवादी धारमा त्यो निरन्तरतासहितको गतिशील राजनीति भनेर जुन राप्रपाले भन्दै आएको छ, त्यो निरन्तरता भनेको यो देशको धर्म जोगाउने, संस्कृति, अस्तित्व, स्वाभिमान, भुगोल जोगाउनु हो । यो देशको पहिचान, जाति, भाषाभाषी सबै जोगाउनुपर्‍यो । त्यो जगमा प्रगतिशील हुनुहुन्छ । त्यो जगमा यो देशलाई रुपान्तरण गर्नुपर्‍यो भन्ने धार राप्रपाले जुन बोकेको छ, त्यो धार कहिले पनि मर्दैन ।’

काठमाडौं क्षेत्र नम्बर १ मा राप्रपाबाट प्रतिनिधिसभा सदस्यको उम्मेदवारसमेत रहेका वरिष्ठ उपाध्यक्ष मिश्रले कांग्रेस नेता स्व.गणेशमान सिंहको राजनीतिको उत्तराधिकारी आफू भएको दाबीसमेत गरे ।

प्रकाशित : कार्तिक २५, २०७९ १८:५२
प्रतिक्रिया
पठाउनुहोस्

भुटानमा १८ वर्ष पुगेका युवालाई ३ महिने सैनिक तालिम अनिवार्य

कान्तिपुर संवाददाता

काठमाडौँ — भुटानले १८ वर्ष उमेर पुगेका नागरिकलाई अनिवार्य आधारभूत सैनिक तालिम दिने भएको छ । भुटानको दुवै सदनले राष्ट्रिय सेवा (ग्याल्सुङ) सम्बन्धी ऐनलाई सर्वसम्मत रुपमा पारित गरेसँगै १८ वर्ष उमेर पुगेका वा १२ कक्षा अध्ययन पूरा गरेका नागरिकले ३ महिने तालिम लिनुपर्ने भएको हो ।

आधारभूत सैनिक तालिमपछि घर निर्माण प्रविधि, कम्प्युटिङ र कृषिमा सीप विकास गर्ने उद्यमको विषयमा तालिम दिइने ग्याल्सुङको वेबसाइटमा लेखिएको छ ।

भुटानी राजा जिग्मे खेशर वाङचुकले २०१९ डिसेम्ब १७ मा एक वर्षे राष्ट्रिय सेवाको घोषणा गरेका थिए । 'ग्यल्सुङको उद्देश्य युवालाई सशक्त, स्वतन्त्र चिन्तक र देशका लागि सेवाको क्षमताका लागि विकासका लागि दिशानिर्देश तथा प्रेरित गर्ने रहेको छ' कार्यक्रममा भनिएको छ । कार्यक्रमले भुटानी युवाहरूको आर्थिक तथा क्षेत्रीय पृष्ठभूमिलाई वास्ता नगरी भुटानका सबैलाई एकै स्थानमा ल्याउने र अनुभव आदानप्रदान गराउने एउटा अनुष्ठानको रुपमा रहने सो कार्यक्रमले जनाएको छ ।

२०२४ देखि सुरु हुने कार्यक्रममा प्रत्येक वर्ष करिब १३ हजारले तालिम राष्ट्रिय सेवामा सहभागी हुने अनुमान भुटानी अधिकारीहरूले गरेका छन् । सुरुवातमा यसै वर्षबाट तालिम दिने योजना भए पनि कोभिड १९ को कारण पछि धकेलिएको भुटानी सञ्चार मध्यमहरूले जनाएका छन् ।

यस्तो तालिम भुटानको ५ स्थानमा एकै समयमा सञ्चालन हुने बताइएको छ । प्रत्येक सेन्टरमा करिब २६ सय तालिमे, ३ सय स्वयंसेवक र ३२ अधिकारी हुने रहने जनाएको छ ।

भुटानको सरकारी सञ्चार माध्यम कुन्सेलले शुक्रबार 'ग्युल्सङ कार्यक्रम र भुटानको भविष्य' नामको सम्पादकीय प्रकाशित गरेको छ ।

'ग्यल्सुङ वा राष्ट्रिय सेवा कार्यक्रम एउटा कानुन हो जसले हाम्रो युवाको क्षमता वृद्धि गर्ने, भुटानको सुरक्षा, सार्वभौमिकता र आर्थिक कल्याणलाई आकार दिने र सशक्त बनाउने छ, ' कुन्सेलले सम्पादकीय लेखिएको छ ।

प्रकाशित : कार्तिक २५, २०७९ १८:४८
पूरा पढ्नुहोस्
प्रतिक्रिया
पठाउनुहोस्
×