सम्पदा घरफिर्तीको ‘राजदूत ताकेता’

‘मैंले नसोचेको र जीवनमैं कहिल्यै नपाएको अमूल्य उपहार पाएको छु,’भक्तपुरको नेपाल भोकेसनल एकेडेमीमा आयोजित सम्मान तथा विदाइ समारोहमा राजदूत बेरीले भने—‘संसारको जहाा पुगेपनि नेपाल मनैमा लिएर हिंड्नेछु ।’ नेपाली सम्पदाको संरक्षण तथा सम्पदा फिर्ता ल्याउन उल्लेख्य सहयोग पुर्‍याएकोमा राजदूत बेरीको सम्मानमा आरपी फाउण्डेसन फर कन्जरभेसन र म्युजियम अफ स्टोलन आर्ट्सले समारोह आयोजना गरेको थियो । यससँगै राजदूत बेरीको कार्यकालमा अमेरिकाबाट १७ वटा पूरातात्विक महत्त्वका मूर्ति तथा अन्य सम्पदा नेपाल फिर्ता गरिएको छ । फाउण्डसेनका प्रमुख सम्पदाविद्‍ रवीन्द्र पुरीले राजदूत बेरीले जस्तै अनुकरणीय काम अन्य कूटनीतिक नियोग र महामहिमले गरिदिएमा चोरिएर वा हराएर विदेश पुगेका नेपाली सम्पदाको घरफिर्तीमा थप बल पुग्ने बताएका थिए । पुरीका अनुसार म्युजियम अफ स्टोलन आर्टमा नेपालबाट चोरिएका र ‘स्टोलन इमेजेज अफ नेपाल’कृति (लैनसिंह वाङदेल)को चिनारीमा रहेका ५० वटा विशिष्ट मूर्ति/सम्पदाको प्रतिरुप निर्माण गरेर म्युजियममा राखिँदै छ । अहिलेसम्म ४० वटा मूर्तिको प्रतिरुप तयार भइसकेको छ । जानकारी दिँदै पुरीले अब एक वर्षमा म्युजियम संचालनमा आउने बताए । चोरिएका मूर्तिको प्रतिरुप निर्माणमा भारत, उडिसा घर भएका कलाकार तिमिर नासन ओझा एक दशकयता आफ्नो टोली लिएर पनौतीमा बसिरहेका छन् । म्युजियम अफ स्टोलन आर्ट पनौतीमा निर्माणाधीन छ ।