माधवजीहरुसँग पार्टी एकता संयोजन समिति बनाउने तयारीमा छौं : दाहाल- भिडियो - कान्तिपुर समाचार

माधवजीहरुसँग पार्टी एकता संयोजन समिति बनाउने तयारीमा छौं : दाहाल

कान्तिपुर संवाददाता

काठमाडौँ — नेकपा माओवादी केन्द्रका अध्यक्ष पुष्पकमल दाहालले नेकपा एकीकृत समाजवादीसँग पार्टी एकता संयोजन समिति बनाउने तयारी भइरहेको जानकारी दिएका छन् । नेपाल समाजवादी पार्टीका अध्यक्षद्वय बाबुराम भट्टराई र महिन्द्रराय यादवसँग छलफलपछि सञ्चारकर्मीसँग दाहालले वामपन्थी दलहरुसँगको बृहत् एकताका लागि एकीकृत समाजवादीसँग एकता संयोजन समिति बनाउने तयारी रहेको बताएका हुन् ।

उनले भने, 'हामी अरु पनि वामपन्थीहरुसँग जस्तो माधवजीहरुसँग पार्टी एकता संयोजन समिति बनाउने तयारीमा छौं ।'

भट्टराई, यादव र नेकपा एकता राष्ट्रिय अभियानका अध्यक्ष वामदेव गौतमले आउँदो आमनिर्वाचनमा माओवादी केन्द्रको चुनाव चह्नबाट चुनावमा प्रतिस्पर्धा गर्ने सहमति बनिकसेको छ । नेसपा र माओवादीबीच एकै चुनाव चिह्नमा चुनाव लड्ने सहमतिबारे मंगलबार निर्वाचन आयोगमा जानकारी गराएपछि दुई पार्टीका शीर्ष नेताबीच पेरिसडाँडामा वार्ता भएको छ ।

अहिलेलाई एउटै चुनाव चिह्न, साझा घोषणापत्रसहित चुनावमा जाने र चुनावपछि पार्टी एकता गर्ने सहमति भइसकेको पनि दाहालले उल्लेख गरे । भट्टराई पक्षले नेकपा र माओवादी शब्दमा असहमति जनाएको छ भन्ने सञ्चारकर्मीको जिज्ञासामा दाहाले चुनावपछि हुने पार्टी एकतामा नेकपा शब्दमा सहमति भइसकेको दाबी गरे । 'पार्टी एकतापछि पनि नाम नेपाल कम्युनिष्ट पार्टी नै रहन्छ,' दाहालले भने, 'चुनावअगाडि केही नै हुँदैन । चुनावपछि नाममाचाहिँ नेकपा (समाजवादी) वा केही हुनसक्छ । निर्णय भइ नसकेको हुनाले मैले अहिल्यै भन्न सक्दिनँ । नेकपामा हाम्रो सहमति भइसक्यो ।'

प्रकाशित : श्रावण ३१, २०७९ १९:५२
प्रतिक्रिया
पठाउनुहोस्

प्रधानमन्त्री देउवालाई भेटेर मेयर शाहले गरे फोहोर व्यवस्थापनसम्बन्धी छलफल

कान्तिपुर संवाददाता

काठमाडौँ — प्रधानमन्त्री शेरबहादुर देउवासँग काठमाडौं महानगरपालिकाका मेयर बालेन्द्र शाहले फोहोर व्यवस्थापनको विषयलाई लिएर छलफल गरेका छन् ।

मेयर शाहले प्रधानमन्त्री देउवालाई बन्चरेडाडा ल्यान्डफिल साइट जाने सडक खण्डको स्तरोन्नति गर्न आग्रह गर्दै सरकारको तर्फबाट भएका प्रतिबद्धताहरू कार्यान्वयन गराउनका लागि आग्रह गरेको उनको सचिवालयले जनाएको ।

शाहको सचिवालयमा फोहोर व्यवस्थापन सम्बन्धी हेर्दै आएका विज्ञ सुनिल लम्सालका अनुसार स्थानीयको समस्या दीर्घकालीन रूपमा समाधान गर्ने विषयमा छलफल भएको थियो । मेयर शाहले इमरजेन्सी बजेट विनियोजन गरेर भए पनि भत्किएको सडक बनाउन प्रधानमन्त्रीलाई आग्रह गरेको लम्सालले जानकारी दिए ।

केही समययता सत्तारुढ दलकै स्थानीय नेताले बन्चरेडाँडामा फोहोर विसर्जनमा अवरोध गर्दै आएका छन् । महानगरले प्रहरीको सहयोगमा फोहोर विसर्जन गर्दै आएको छ ।

प्रकाशित : श्रावण ३१, २०७९ १९:४३
पूरा पढ्नुहोस्
प्रतिक्रिया
पठाउनुहोस्
x
×