प्रधानन्यायाधीशविरुद्धको महाभियोग अब अघि बढ्छ : उपसभामुख भुसाल- भिडियो - कान्तिपुर समाचार
कान्तिपुर वेबसाईट
AdvertisementAdvertisement

प्रधानन्यायाधीशविरुद्धको महाभियोग अब अघि बढ्छ : उपसभामुख भुसाल

कान्तिपुर संवाददाता

काठमाडौँ — प्रतिनिधिसभाकी उपसभामुख पुष्पा भुसालले निलम्बित प्रधानन्यायाधीश चोलेन्द्र शमशेर जबराविरुद्धको महाभियोग प्रस्ताव संसद्‌को यही अधिवेशनमा अघि बढ्ने बताएकी छन् । बिहीबार नै सरकारले प्रतिनिधिसभा विघटन नगरी आगामी मंसिर ४ गते प्रतिनिधिसभा र प्रदेशसभा सदस्यको निर्वाचनको मिति घोषणा गरेको छ ।

उपसभामुख भुसालले प्रतिनिधिसभाको आगामी बैठकमा महाभियोगबारे कार्यसूची राख्ने र संसद्‌मा छलफल गरी सुझाव लिने बताइन् । त्यसरी प्राप्त सुझावहरूलाई महाअभियोग समितिमा पठाइने उनको भनाइ छ ।

जबराविरुद्धको महाअभियोगका लागि समिति गठन भइसकेको छ । तर, उपसभामुख भुसालले भने समितिले आफ्नो काम सुरु गर्नुअघि नै संसद्‌मा त्यसबारे छलफल गर्न आवश्यक रहेको बताइन् । संसद्‌मा प्राप्त सुझावलाई समितिमा पठाउनका लागि पनि महाअभियोगलाई कार्यसूचीमा राखेर छलफल गर्न आवश्यक रहेको उनको जोड छ ।

‘अहिले चुनावको मिति घोषणा भयो तर संसद् विघटन हुँदैन । संविधानले त्यसबारे परिकल्पना गरेको छैन,’ उनले भनिन्, ‘महाअभियोगको जुन प्रस्ताव दर्ता भएको छ, यसलाई संसद्‌बाट नै घनिभूत ढंगबाट छलफल गरेर सुझावसहित जानुपर्छ । महाअभियोग विशेष समिति पनि गठन भइसकेको छ । त्यो समितिले आफ्नो काम सुरु गर्नुभन्दा अगाडि नै संसद्‌भित्र नै यो विषयलाई छलफलको विषय बनाउनुपर्छ ।’

संसद्‌मा छलफलको विषय बनाएर विषयगत समितिमा यसको सुझावहरू पठाउनका लागि कार्यसूचीमा ल्याएर यसलाई अघि बढाउनुपर्ने बताउँदै अनि मात्र संसद्ले आफ्नो दायित्वबाट यो विषयलाई अघि बढाउन सक्ने उनले बताइन् । उनले आगामी निर्वाचनको लागि मनोनयन दर्ता गर्ने दिनसम्म प्रतिनिधिसभा कायम रहने बताइन् ।

प्रकाशित : श्रावण १९, २०७९ १५:५१
प्रतिक्रिया
पठाउनुहोस्

हेटौंडामा तीनपांग्रे सवारी व्यवस्थापन सुरु

सुवास विडारी

मकवानपुर — हेटौंडा बजारमा देखिएको सवारीसाधनको चाप व्यवस्थापन गर्न हेटौंडा उपमहानगरपालिकाले पहिलो चरणमा तीनपांग्रे सवारीसाधनलाई व्यवस्थित गर्न सुरु गरेको छ ।

उपमहानगरले बिहीबारबाट आफ्नो क्षेत्रभित्र सञ्चालन अनुमतिप्राप्त तीनपांग्रे सवारीसाधनलाई मात्र सञ्चालन अनुमतिसहितको स्टिकर प्रदान गर्न सुरु गरेको हो ।

उपमहानगरका प्रवक्ता सवीन न्यौपानेका अनुसार गत असार ३२ गते उपमेयर राजेश बानियाँको अध्यक्षतामा बसेको पार्किङ व्यवस्थापन समितिको बैठकबाट गठित दुई उपसमितिले यातायात व्यवसायी, ट्राफिक प्रहरीसहित सरोकारवालासँगको पटकपटकको छलफल र स्थलगत निरीक्षणबाट प्राप्त सुझावको आधारमा कार्यपालिकाले यस्तो अभियान सञ्चालन गरेको हो ।

अभियानको उद्घाटन हेटौंडाकी मेयर मीना लामाले तीनपांग्रे सवारीमा स्टिरक टाँसेर सुरुवात गरेकी हुन् ।

२०७६ पुसको ७ गतेको बैठकबाट हेटौंडा उपमहानगर क्षेत्रमा थप तीनपांग्रे सवारीसाधन दर्ता अनुमति नदिने निर्णय गरेको थियो । उक्त मितिपछि विभिन्न पालिका तथा अन्यत्र जिल्लामा सञ्चालन अनुमति (परमिट) लिएर हेटौंडा बजार क्षेत्रमा अनधिकृत रुपमा सञ्चालन भइरहेका तीनपांग्रे सवारीसाधनलाई निषेध गर्ने गरी उपमहानगर अगाडि बढेको हो ।

प्रवक्ता न्यौपानेले स्टिकर प्रदान गरेसँगै अब हेटौंडा उपमहानगर क्षेत्रमा सञ्चालन अनुमति लिएका तीन पांग्रे सवारीसाधनबाहेक अन्यलाई निषेध गरिने बताए ।

प्रकाशित : श्रावण १९, २०७९ १५:१३
पूरा पढ्नुहोस्
प्रतिक्रिया
पठाउनुहोस्
×