१८.१२°C काठमाडौं
काठमाडौंमा वायुको गुणस्तर: १२४

बिहीबारबाट सञ्चालनमा आउँदै साझा यातायातका विद्युतीय बस

के छन् सुविधा?
दिपेन्द्र रोक्का

काठमाडौँ — साझा यातायातले बिहीबारबाट ३ वटा विद्युतीय बस सञ्चालनमा ल्याउने भएको छ । डिजेलबाट चल्ने अन्य बसहरूको तुलनामा यो सेवा सुविधा सम्पन्न मानिन्छ । सिटी बसको डिजाइनमा बनेको यो बस सेमी फ्लोर बस हो । जुन वृद्ध, अशक्त र बालबालिकाका लागि उपयोगी मानिन्छ ।

बिहीबारबाट सञ्चालनमा आउँदै साझा यातायातका विद्युतीय बस

पुरानो डिजेल बस जस्तै यो बस पनि अपांगमैत्री छ । बसमा १६१.२८ किलो वाटको ब्याट्री प्रयोग गरिएको छ । जसले ४५ किलोवाटको चार्जरमा ५ घण्टा चार्ज गर्दा २०० किलोमिटर गुड्न सक्छ । १ चालक सिट १ अपांग सिट गरी बसमा जम्मा २६ सिट छन् । बसमा यात्रुका लागि आनन्ददायक सिट, उभिएर यात्रा गर्न ह्यान्डल बार, टिभी, वाइफाइ, सीसीटीभी, डस्टबिन, इमर्जेन्सी एक्जिट र बस रोक्न बिशेष बटनको सुविधा छ । यस्तै एबीएस, प्यासेन्जर अनाउन्समेन्ट सिस्टम, डीभीआर प्लेयर र जीपीएस ट्र्याकिङ डिभाइसले चालकलाई मद्दत गर्ने पनि अपेक्षा गरिएको साझा यातायातले जनाएको छ । इलेक्ट्रिक बस भएका कारण यसमा गियर र क्लच हुँदैन । साझा यातायातका प्रमुख कार्यकारी अधृकित महेन्द्र राज पाण्डेका अनुसार साझाका हाल सञ्चालनमा रहेका डिजेल बसलाई विद्युतीय बसमा रूपान्तरण गर्ने योजना अनुरूप ४० वटा विद्युतीय बस चीनबाट झिकाइएका हुन् । ग्लोबल टेन्डर मार्फत् खरिद गरिएका ४० वटा बस मध्ये ३ वटा बस यही बिहीबारबाट सञ्चालनमा आउने र अन्य बसहरू आउन केही महिना लाग्ने उनले बताए । साझा यातायातले हाल ७१ वटा डिजेल बसहरू सञ्चालनमा ल्याएको छ । अब ४० विद्युतीय बसहरू सञ्चालनमा आउँदा पुल्चोकमा रहेको ठाउँ साँघुरो हुने र चार्जिङ स्टेसन पनि धेरै चाहिने हुँदा नेपाल सरकारले अन्य ७ ठाउँमा जग्गा उपलब्ध गराइदिए सहज हुने उनको बुझाइ छ ।

प्रकाशित : असार २२, २०७९ २०:१८
प्रतिक्रिया
पठाउनुहोस्
जनताको राय

त्रिभुवन विश्वविद्यालयमा बारम्बार परीक्षार्थीको उत्तरपुस्तिका हराउने गरेको छ। यसको समाधान कसरी हुन्छ?