ललितपुरलाई सांस्कृतिक महानगर बनाउँछौं : हरिकृष्ण व्यञ्जनकार- भिडियो - कान्तिपुर समाचार

ललितपुरलाई सांस्कृतिक महानगर बनाउँछौं : हरिकृष्ण व्यञ्जनकार

फ्लाइओभर त मान्छे हाँस्ने कुरा भएको छ । मोनोरेलको कुरा छ, त्यो पनि हुने कुरा होइन । हामी गर्ने काम भन्‍‍छौं र भनेका कुरा गर्छौं । जस्तो खानेपानी, फोहोरमैलाको समस्या समाधान गर्छौं ।
कान्तिपुर संवाददाता

काठमाडौँ — स्थानीय तहको निर्वाचन नजिकिँदै गर्दा उम्मेदवारहरू आफ्ना एजेन्डा लिएर पाँच वर्षपछि फेरि भोट माग्न जनताको घरदैलोमा पुगेका छन् । वैशाख ३० मा हुने स्थानीय तह निर्वाचनमा प्रमुख प्रतिपक्षमा रहेको एमालेले एक्लै बहुमत पालिकामा जित्ने दाबी गरिरहेको छ । अर्कोतिर सत्तारुढ गठबन्धनमा रहेका पाँच दलले तालमेल गरेर मुलुकको ठूलो दल एमालेसामू चुनौती पेस गरेका छन् ।

एमालेले पनि देशका विभिन्न पालिकामा पार्टी र व्यक्तिसँग गठबन्धन गरेको छ । कांग्रेस नेतृत्वको सत्ता गठबन्धनले ६ महानगर र ११ उपमहानगरपालिकामा तालमेल गरेर उम्मेदवार चुनावी मैदानमा उतारेको छ । अर्कोतिर एमालेले राप्रपा, परिवार दल, सत्ता गठबन्धनसँग असन्तुष्ट नेताहरूसँग तालमेल गरेको छ ।

ललितपुर महानगरपालिकामा एमालेले २०७४ सालकै प्रतिस्पर्धीलाई मैदानमा उतारेको छ । उक्त निर्वाचनमा ३ सय २६ मतले पछि परेका हरिकृष्ण व्यञ्जनकार एमालेबाट ललितपुर महानगरपालिकाको मेयरमा उम्मेदवार बनेका छन् । स्थानीय तह निर्वाचनमा ललितपुर महानगरको प्रतिस्पर्धाबारे एमाले उम्मेदवार व्यञ्जनकारसँग आगामी चुनावका एजेन्डा र तयारीबारे ई-कान्तिपुरका जयसिंह महरा र प्रशान्त माली ले गरेको कुराकानी पूरा पढ्न : 'हामी गर्न नसकिने काम भन्दैनौं, नभनेका काम गर्दैनौं'

प्रकाशित : वैशाख २०, २०७९ १८:५२
प्रतिक्रिया
पठाउनुहोस्

वित्तीय प्रणालीबाटै हरायो १० खर्ब : पूर्वअर्थमन्त्री खतिवडा

‘तपाईं-हाम्रो पैसा खोलामा बगेजस्तै गएको गयै भयो । बैंकहरूले क्रिप्टो, व्यापार विचलनमा प्रयोग त गरेनन् ?’
कान्तिपुर संवाददाता

काठमाडौँ — पूर्वअर्थमन्त्री युवराज खतिवडाले वित्तीय प्रणालीबाट करिब १० खर्ब रुपैयाँ बाहिरिएको बताएका छन् । पछिल्लो एक वर्षको अवधिमा कर्जाको माग उच्च भएको तर, निक्षेप संकलन अपेक्षितरूपमा बढ्न नसकेकाले वित्तीय प्रणालीबाट ठूलो रकम बाहिरिएको उनले बताए । ‘जनताको पैसा खोलामा बगेजस्तै गएको गयै भयो,’ उनले भने, ‘त्यो पैसा क्रिप्टोलगायत गैरकानुनी गतिविधिमा वा व्यापार विचलनमा प्रयोग भयो कि ?’

नेपाल चेम्बर अफ कमर्सले आयोजना गरेको ‘वर्तमान आर्थिक स्थितिका चुनौती र सम्भावना’ विषयक अन्तरक्रिया कार्यक्रम बोल्दै पूर्वगर्भनर खतिवडाले यस्तो बताएका हुन् । ‘शोधनान्तर स्थिति (बीओपी)ले २ खर्ब ५८ अर्ब बाहिरिएको देखिन्छ,’ उनले भने, ‘तर, एक वर्षमा बैंकहरूले ९ खर्ब रुपैयाँ बराबरको कर्जाको माग सिर्जना गरका छन् । बैंकमा ४/५ खर्ब पनि जम्मा छैन । खोई निक्षेप बढेको ? तपाईं-हाम्रो पैसा खोलामा बगेको जस्तै गएको गए भयो ।’

व्यापारीहरूले एलसी खोलेर सामान आयात गरेका छन् । यसरी मुलुकबाहिर गएको करिब १ खर्ब रुपैयाँ वैद्यानिकरूपमा देशमा नआएको उनले दाबी गरे । ‘एलसी खोलेर पैसा पारी पुगेपछि अर्को मुलुकको पैसा बन्छ,’ उनले भने ।

त्यस्तै, घरजग्गा, ठेक्कापट्टाबाट मिलोमतोमा गएको पैसा पनि वित्तीय प्रणालीमा नआएको उनले आरोप लगाए । ‘एक वर्षमा घरजग्गामा करिब १५ देखि २० खर्बको करोबार भएको अनुमान छ,’ खतिवडाले भने, ‘कारोबार मूल्य एउटा हुन्छ तर कागजी मूल्य अर्को । त्यसरी राजस्व छली हुन्छ, राजस्व छलीले स्रोत देखिँदैन । स्रोत नदेखिएको पैसा बैंकमा आउँदैन । ५/७ खर्ब त्यही प्रक्रियबाट हरायो । यसरी क्षेत्रै/क्षेत्र पैसा हराएको छ ।’

रेमिट्यान्स घटिरहेकाले त्यो पैसा बाहिरै रोकिएको हुनसक्ने उनको आशंका छ । ‘रेमिट्यान्स किन आएन, किन घट्यो भन्ने खोजौं,’ उनले भने, ‘रेमिट्यान्स जति घट्यो, त्यो पैसा पनि त्यतैबाट हराएको हो भन्ने बुझ्नुपर्छ ।’ उल्लेखित सबै कारणले करिब १० खर्ब रुपैयाँ वित्तीय प्रणालीबाट बाहिरिएको उनको दाबी छ ।

प्रकाशित : वैशाख २०, २०७९ १८:४९
पूरा पढ्नुहोस्
प्रतिक्रिया
पठाउनुहोस्
x
×