आइतरबार रातिदेखि मौन अवधि सुरु, सामाजिक सञ्जालबाट पनि भोट माग्न नपाइने- भिडियो - कान्तिपुर समाचार

आइतरबार रातिदेखि मौन अवधि सुरु, सामाजिक सञ्जालबाट पनि भोट माग्न नपाइने

कान्तिपुर संवाददाता

काठमाडौँ — राष्ट्रिय सभा निर्वाचनको मौन अवधि आइतबार रातिदेखि सुरु हुँदै छ । निर्वाचन आयोगले राष्ट्रिय सभा निर्वाचनको मौन अवधि आइतबार राति १२ बजेबाट सुरु हुने जानकारी दिएको छ ।

आयोगका प्रवक्ता शालिग्राम शर्मा पौडेलले मौन अवधिमा राष्ट्रिय सभा निर्वाचनका उम्मेदवारहरूले सामाजिक सञ्जालबाट समेत प्रचार प्रसार गर्न नहुने बताएका छन् । आइतबार एक विज्ञप्ति जारी गर्दै आयोगले 'यस अवधिमा निर्वाचन प्रचार प्रसार गर्न र मत माग्न नहुने मौन अवधि सुरु हुनुभन्दा अगाडि मतदान केन्द्रको ३०० मिटर वरिपरी राखिएका आआफ्ना निर्वाचन चिह्न तथा प्रचार प्रसार सामग्री हटाइएको हुनुपर्ने' भनेको छ ।

आयोगले सामाजिक सञ्जालबाट पनि भोट माग्नु आचारसंहिता विपरीत हुने उल्लेख गरेको छ । 'एसएमएस, फेसबुक भाइबरजस्ता विद्युतीय माध्यमद्वारा प्रयोग गरिने सामाजिक सञ्जालमार्फत समेत मत माग्न र निर्वाचन प्रचार प्रसार गर्न नहुने, उम्मेदवार वा राजनीतिक दलको प्रचार प्रसार हुने गरी कुनै समाचार वा सूचना प्रकाशन वा प्रसारण गर्न नहुने' आयोगले जनाएको छ ।

आयोगले मतदाता पहिचान गर्न पनि निर्वाचन आधिकृतहरूलाई भनेको छ । राष्ट्रिय सभा निर्वाचनमा स्थानीय तहका अध्यक्ष र उपाध्यक्ष प्रमुख र उपप्रमुख तथा प्रदेशसभा सदस्यहरूले मतदान गर्ने व्यवस्था छ ।

राष्ट्रिय सभाका १९ सिटका लागि माघ १२ गते मतदान हुँदैछ । राष्ट्रिय सभा निर्वाचनमा ४३ जना उम्मेदवार रहेको आयोगले जानकारी दिएको छ ।

प्रकाशित : माघ ९, २०७८ १७:४४
प्रतिक्रिया
पठाउनुहोस्

आहा-रारा गोल्डकप : पुलिसलाई हराउँदै मनाङको सेमिफाइनल यात्रा सुनिश्चित

दीपक परियार

पोखरा — आहा-रारा गोल्डकपमा नेपाल पुलिसलाई २–० गोल अन्तरले हराउँदै मनाङ मर्स्याङदी क्लबले पोखरामा जारी २० औं संस्करणमा सेमिफाइनल यात्रा सुनिश्चित गरेको छ ।

पोखरा रंगशालामा आइतबारको क्वार्टरफाइनलमा पुलिसको कमजोर डिफेन्स लाइनको फाइदा उठाउँदै मनाङले नतिजा आफ्नो पक्षमा पार्‍यो । नाइजेरियन फरवार्ड आफिज ओलावालेको सशक्त प्रदर्शन मनाङका लागि बलियो पक्ष बन्यो । उनले एक गोल गरे भने अर्को गोलमा असिस्ट गरे ।

पहिलो हाफ गोलरहित बराबरीमा टुंगियो । दुवै टोलीबाट उल्लेखनीय प्रहार हुन सकेनन् । खेलको ६४ औं मिनेटमा रुपेश केसीले गोल गर्दै मनाङलाई सुरुआती अग्रता दिलाएका थिए । पुलिसका हेमन्त श्रेष्ठको ब्याक पासलाई अजित भण्डारीले क्लियर गर्न नसक्दा आफिजले बल कलेक्ट गर्दै रुपेशलाई उपलब्ध गराए ।

पेनाल्टी बक्सभित्र अजितको गम्भीर गल्तीको फाइदा लिँदै रुपेशले तीन डिफेन्डर र गोल रक्षकबीचबाट गरेको प्रहार गोलमा परिणत भयो । खेलको ८४ औं मिनेटमा जुमानु राईले बराबरीमा पुर्‍याएर पुनरागमन गर्ने अवसर चुकाए । पेनाल्टी बक्सबाटै वान टचमा प्रहार गर्नुपर्ने बलमा उनले होल्ड गर्दा सुवर्ण अवसर गुम्यो ।

त्यसलगत्तै ओलावालेले काउन्टर अट्याकमा डिफेन्सलाई बिट गर्दै एक्लै बल अगाडि बढाएर अशोक थापा मगरलाई पास दिए । अशोकको शक्तिशाली प्रहारलाई गोलरक्षक सञ्जित श्रेष्ठले उत्कृष्ट बचाउ गरेका थिए । रिबाउन्डमा पुनः अशोककै हेड पासमा राजेश परियारको प्रहार अकासिएको थियो ।

८७ औं मिनेटमा ओलावालेले गोल गर्दै अग्रता दोब्बर बनाएर मनाङको जित निश्चित गरे । पुलिसका भोला सिलवालले लय गुमाउँदा ओलावालेले बल छिने । खोसेको बललाई एक्लै अगाडि बढाएर भोला र अजितलाई बिट गर्दै गोलरक्षक अगाडि बढेको अवस्थामा सुन्दर गोल गरे ।

ओलावाले म्यान अफ दी म्याच भए । दुवै टिम समान ६ वटा उपाधि विजेता हुन् । क्याराभान गोल्डकपमा भने पुलिसले उपाधि उचालेको थियो । ‘ए’ डिभिजन लिग अन्तर्गत गत पुसमा मनाङले आफ्नो होम ग्राउन्ड पोखरा रंगशालामा पुलिसलाई ३–१ ले हराएको थियो ।

मनाङले मंगलबार हुने त्रिभुवन आर्मी र थ्री स्टार क्लबको विजेतासँग सेमिफाइनल खेल्ने छ । सोमबार प्रतियोगिताको तेस्रो क्वार्टरफाइनलमा डिफेन्डिङ च्याम्पियन संकटा र जारी लिगको शीर्ष टोली मछिन्द्रबीच प्रतिस्पर्धा हुनेछ ।

प्रकाशित : माघ ९, २०७८ १७:४३
पूरा पढ्नुहोस्
प्रतिक्रिया
पठाउनुहोस्
×