महानगरको बेवास्ताले कुरूप बन्दै कमलपोखरी- भिडियो - कान्तिपुर समाचार

महानगरको बेवास्ताले कुरूप बन्दै कमलपोखरी

कान्तिपुर संवाददाता

काठमाडौँ — काठमाडौंको कमलपोखरीमा नियमित सरसफाई र व्यवस्थापन नहुँदा पोखरी कुरूप बन्दै गइरहेको छ।पोखरी र परिसरमा पनि पानीका बोतल, चाउचाउ, बिस्कुटका खोल, कपडालगायत यत्रतत्र फालिएको छ । मरेका माछाले पोखरीलाई दुर्गन्धित मात्र बनाएको छैन, सौन्दर्य नै घटाएको छ । पोखरीको यो अवस्था भइसक्दा पनि काठमाडौं महानगरपालिकाको नजर पुगेको छैन ।

कमलपोखरी क्षेत्र महानगरको वडा–१ मा पर्छ । यसबारे वडाध्यक्ष भरतलाल श्रेष्ठलाई सोध्दा केन्द्रबाटै पोखरी निर्माण भइरहेको भन्दै पन्छिए । ‘कमलपोखरी वडालाई हस्तान्तरण गरेपछि मात्रै सरसफाइ, संरक्षण गर्छौं,’ उनले भने, ‘निर्माणाधीन भएसम्म वडाले केही गर्दैन ।पोखरीमा के कारणले माछा मरे भन्ने विषयमा महानगर बेखबर छ । वडाध्यक्ष श्रेष्ठलाई त कसले पोखरीमा माछाको भुरा छाडेको हो, त्यो पनि थाहा छैन । महानगर प्रवक्ता ईश्वरमान डंगोलका अनुसार पोखरीमा केही समयअघि महानगरले नै भुरा छाडेको हो । स्थानीयहरू महानगरले पोखरीमा पानीको सतह नहेरी भुरा छाडेकाले अहिले धमाधम मरेको दाबी गर्छन् ।

महानगरपालिकाले ६ करोड ३६ लाख रुपैयाँमा पोखरी निर्माण गरिरहेको छ । पुस अन्तिम साता औपचारिक उद्घाटन गर्ने तयारी गरिए पनि हुन सकेन ।

प्रकाशित : पुस २१, २०७८ १५:३०
प्रतिक्रिया
पठाउनुहोस्

छुट्टाछुट्टै दुर्घटनामा २ को मृत्यु

सन्जु पौडेल

तिलोत्तमा — रुपन्देहीमा छुट्टा छुट्टै सवारी दुर्घटनामा परी २ जनाको मृत्यु भएको छ । जिल्लाको सिद्धार्थनगर नगरपालिका–१२ देवकोटा चोकमा बुधबार बिहान लु ३४ प १३७२ नम्बरको मोटरसाइकल अनियन्त्रित भई दुर्घटना हुँदा सिद्धार्थनगर १२ बस्ने २५ वर्षीय आशिष यादवको मृत्यु भएको हो ।

दुर्घटनामा गम्भीर घाइते भएका उनको भीम अस्तपालमा उपचारको क्रममा बिहान ३ बजेर ४० मिनेटमा मृत्यु भएको लुम्बिनी प्रदेश प्रहरी कार्यालय बुटवलका सूचना अधिकारी प्रहरी निरीक्षक मधु नेपालले बताए । सोही मोटरसाइकलमा सवार सिद्धार्थनगर नगरपालिका–१२ का राहुल गुरुङ घाइते भएको र उनको उपचार भएको नेपालले जनाए ।

त्यस्तै, बुटवल उपमहागनगरपालिका–५ नेपालगन्ज रोडमा मंगलबार राति स्कुटरले पैदलयात्रीलाई ठक्कर दिँदा एकजनाको ज्यान गएको हो ।

पैदलयात्री नवलपरासी वर्दघाट नगरपालिका चिसापानी घर भई हाल बुटवल उपमहानगरपालिका–९ दिपनगर बस्ने ५१ वर्षीय सुवास रानाको मृत्यु भएको प्रहरी कार्यालयले जनाएको छ । ठक्करबाट गम्भीर घाइते भएका रानाको मंगलबार राति उपचारको क्रममा लुम्बिनी प्रादेशिक अस्पतालमा मृत्यु भएको हो ।

प्रकाशित : पुस २१, २०७८ १५:२८
पूरा पढ्नुहोस्
प्रतिक्रिया
पठाउनुहोस्
×