प्रदेश २ सरकारमा जोडियो नेकपा एकीकृत- भिडियो - कान्तिपुर समाचार

प्रदेश २ सरकारमा जोडियो नेकपा एकीकृत

लामो रस्साकस्सीपछि नेकपा एकीकृतका दुई मन्त्रीले आइतबारदेखि सम्हाले कार्यभार
कान्तिपुर संवाददाता

धनुषा — मन्त्रालय र मन्त्रीको टुंगो नलाग्दा लम्बिएको नेकपा एकीकृतको सत्तारोहण आइतबार बल्ल पूरा भएको छ । दुई मन्त्रीको भाग लिँदै नेकपा(एस) आइतबार प्रदेश २ सरकारमा सहभागी भएका छन् ।

नेकपा (एस) संसदीय दलका नेता सत्रुधन महतो र प्रदेश सांसद प्रमोद यादवलाई प्रदेश प्रमुख हरिशंकर मिश्रले आइतबार बिहान पद तथा गोपनियताको शपथ गराएका छन् । महतोले उद्योग, वन, पर्यटन तथा वातावरण मन्त्रीका जिम्मेवारी पाएका छन् भने यादवले कानुन, न्याय तथा प्रदेशसभा मन्त्रीमा नियुक्त भएका हुन् । महतोलाई उद्योग, वन, पर्यटन तथा वातावरण मन्त्रालय दिन मुख्यमन्त्री लालबाबु राउतले आफ्नै दल जनता समाजवादी पार्टीका मन्त्री रामनरेश रायलाई गत साता बर्खास्त गरेका थिए ।

धनुषा निर्वाचन क्षेत्र नं. ४(ख) बाट निर्वाचित महतो संविधानसभाका बेला संघीय सरकारका स्थानीय विकास राज्यमन्त्री समेत भएका थिए । सिरहा निर्वाचन क्षेत्र नं. ३ (ख) बाट प्रदेश सांसद जितेका यादव अर्को मन्त्रालयको जिम्मेवारी पाएका हुन् । प्रदेशसभामा नेकपा(एस)को १३ जना सांसद छन् ।

केन्द्रमा बनेको गठबन्धन अनुसार प्रदेशमा जसपा नेतृत्वको सरकारमा कांग्रेस, माओवादी र नेकपा(एस)लाई सहभागी गराइएको छ । प्रदेश सरकारमा जसपाले मुख्यमन्त्रीसहित अर्थ, समाजिक विकास, भूमि व्यवस्था, कृषि तथा सहकारी गरी ४ मन्त्रालय, कांग्रेसले भौतिक पूर्वाधार, उर्जा तथा खानेपानी र महिला, बालबालिका, युवा तथा खेलकुद गरी तीन मन्त्रालय र माओवादी (केन्द्र) आन्तरिक मामिला तथा सञ्चार मन्त्रालय पाएका छन् । नेकपा(एस)लाई पनि भागबन्डामै दुई मन्त्रालय दिइएको छ ।

प्रकाशित : मंसिर ५, २०७८ १७:५२
प्रतिक्रिया
पठाउनुहोस्

कांग्रेस महाधिवेशन प्रतिनिधिमा रिनाशाको उम्मेदवारी

विप्लव भट्टराई

इलाम — फिल्मी क्षेत्रमा व्यस्त रिनाशा बान्तवा केही दिनदेखि गृहजिल्ला इलाममा छिन् । चलचित्र छायांकन या पेशागत व्यस्तताले उनी राजाधानी बाहर पुगेकी हैनन् ।


शनिबार साँझ उनी इलाम चोक बजार छेउको सिटीमार्ट पार्कमा देखिँदा फ्यानहरूले सेल्फी खिच्नसम्म भ्याए । धेरैले उनलाई देख्नासाथ फिल्म सुटिङको लागि आएको हुनसक्ने आकलन गरे ।

जब उनी इलामका सञ्चारकर्मीमाझ पुगिन् बल्ल उनको इलाम आगमनको रहस्य खुल्यो । सयौं गीतकी कोरियाग्राफ तथा ‘इन्टुमिन्टु लन्डनमा’ निर्देशक रिनाशाको इलाम आगमन राजनीतिक मिसन थियो ।

चर्चित कोरियोग्राफर तथा चलचित्र निर्देशक रिनाशाको घर इलामको चुलाचुली गाउँपालिका ४ आइतबारे हो । १५ वर्षदेखि निरन्तर कलाकारिता क्षेत्रमा क्रियाशील उनी आफ्नो क्षेत्रमा स्थापित छिन् ।

सेलीब्रिटीहरू राजनीतिमा प्रवेश गर्ने र हराउने लुकामारीबीच रिनाशाको राजनीतिक डेब्यू देखिएको छ । ‘गाउँ समाजको परिवेश र समाजसेवा गर्ने ध्येयले मलाई राजनीतिमा सक्रिय बन्न प्रेरित गर्‍यो,’ उनले भनिन्, ‘नाम कमाउन कार्यरत क्षेत्र नै काफी छ तर मेरो गाउँ र जिल्लालाई म केही गर्न सक्छु भन्ने उद्देश्यले राजनीतिमा लागेकी हुँ ।’

पुस्तौनी कांग्रेस परिवारकी रिनाशाले राजनीतिक यात्राका लागि त्यही बाटो पहिल्याएको बताइन् । १३ वर्षअघि बिएस्सी नर्सिङको अध्ययन गर्दागर्दै उनी कलाकारितामा लागेकी थिइन् । ‘पढाइ एकातिर आफ्नो इच्छा र चाहना फरक । मैले रोजेको क्षेत्रमा सोचेभन्दा धेरै सफलता हासिल गरेको ठान्छु । अब मलाई राजनीतिमार्फत् सामाजिक रुपान्तरणको अभियान चलाउनु छ ।’

कांग्रेस कार्यकर्ता नरेन्द्र कुमार वान्तवाकी छोरी रिनाशाले चुलाचुलीबाट धाएरै झापा दमकको विद्यालयबाट प्रारम्भिक शिक्षा हासिल गरेकी हुन् ।

'आइएम ट्वान्टीवान' चलचित्र निर्देशन गर्दै गरेकी रिनाशा यसपटक नेपाली कांग्रेसको १४औं महाधिवेशनमा सहभागी भएकी छन् । उनले महाधिवेशन प्रतिनिधिका लागि इलाम क्षेत्र नं. २ बाट उम्मेदवारीसमेत दिएकी छन् ।

तर कलाकारिता छाडेर पूर्णकालीन राजनीतिमा प्रवेश गरेको हो वा महाधिवेशनमा प्रतिनिधि बन्नकै लागि उम्मेदवारी दिएको भन्नेबारे रिनाशाले केही खुलाएकी छैनन् । यद्यपि यसअघि ठूलो संख्यामा कलाकारहरू राजनीतिक दलमा प्रवेश गर्दा रिनाशा भने खासै खुलेकी थिइनन् ।

प्रकाशित : मंसिर ५, २०७८ १७:४९
पूरा पढ्नुहोस्
प्रतिक्रिया
पठाउनुहोस्
×