माओवादीको टोलदेखि प्रदेशसम्मको सम्मेलन कार्यतालिका हेरफेर- भिडियो - कान्तिपुर समाचार
कान्तिपुर वेबसाईट
AdvertisementAdvertisement

माओवादीको टोलदेखि प्रदेशसम्मको सम्मेलन कार्यतालिका हेरफेर

कान्तिपुर संवाददाता

काठमाडौँ — नेकपा (माओवादी केन्द्र) ले प्रदेश पार्टी कमिटीसम्मको सम्मेलन कार्यतालिका हेरफेर गरेको छ । मंगलबार बसेको स्थायी कमिटी बैठकले टोल, वडा, पालिका र प्रदेश कमिटीका सम्मेलनको कार्यकातालिका हेरफेर गरेको पार्टी प्रवक्ता कृष्णबहादुर महराले जानकारी दिए ।

'पार्टी सदस्यता नवीकरण कार्तिक २५ गतेसम्म गर्ने गरी कार्यतालिका हेरफेर गरिएको छ,' बैठकका निर्णयबारे जानकारी दिँदै उनले भने, 'त्यस्तै, टोल सम्मेलन कार्तिक २७ गतेसम्म, वडा सम्मेलन मंसिर ४ गतेसम्म, पालिका (गाउँपालिका, नगरपालिका, नगरपालिका, उपमहानगरपालिका र महानगरपालिका) सम्मेलन मंसिर ११ गतेसम्म र प्रदेश सम्मेलन मंसिर २५ गतेसम्म गर्ने गरी समय थपिएको छ ।'

माओवादीले राष्ट्रिय सम्मेलन भने निर्धारित समयमै गर्ने भएको छ । प्रवक्ता महराले राष्ट्रिय सम्मेलनको मिति यथावत् रहेको बताए । माओवादीले राष्ट्रिय सम्मेलन पुस ११, १२ र १३ गतेका लागि तय गरेको छ ।

त्यस्तै, माओवादीले १ सय ४९ जनाको सल्लाहकार समिति, ९९ जनाको ज्येष्ठ कम्युनिस्ट मञ्च, पेशलकुमार पोखरेलको अध्यक्षतामा २५ सदस्यीय लेखा आयोग र टंक राईको अध्यक्षतामा २५ सदस्यीय अनुशासन आयोग पनि गठन गरेको महराले जानकारी दिए ।

प्रकाशित : कार्तिक २, २०७८ १३:५५
प्रतिक्रिया
पठाउनुहोस्

ट्याक्टरको सामानले च्यापिँदा चालकको मृत्यु

कान्तिपुर संवाददाता

लमजुङ — आफैंले चलाएर लगेको ट्याक्टरमा राखिएको सामानले च्यापिँदा लमजुङको मर्स्याङ्दी गाउँपालिका ३, खुदीमा चालकको मृत्यु भएको छ ।

बेंसीसहरबाट मनाङतर्फ जाँदै गरेको ग१त ५५६५ नम्बरको ट्याक्टरले बोकेको फलामजन्य सामग्रीले च्यापिन पुग्दा चालक दोर्दी गाउँपालिका ४ का २५ बर्षीय मनबहादुर गुरुङको मृत्यु भएको ट्राफिक प्रहरीले जनाएको छ ।

ट्राफिक प्रमुख सई विष्णुबहादुर नेपालीका अनुसार सोमबार साँझ खुदीस्थित ओरालो सडकमा ब्रेक लगाउने क्रममा पछाडि राखेको छडलगायतका सामग्री अगाडि हुत्तिएर चालकको टाउको र गर्धनमा लागेको थियो ।

घरको रेलिङका लागि प्रयोग हुने फलामले च्यापिन पुग्दा उनको घटनास्थलमै मृत्यु भएको प्रहरीले जनाएको छ । शवको पोस्टमार्टमका लागि बेंसीसहरस्थित जिल्ला अस्पताल लमजुङमा ल्याइएको छ । ट्याक्टरमा भने कुनै क्षति नपुगेको प्रहरीले जनाएको छ ।

प्रकाशित : कार्तिक २, २०७८ १३:५३
पूरा पढ्नुहोस्
प्रतिक्रिया
पठाउनुहोस्
×