संसद चलाउनेबारे सबैले आत्मसमिक्षा गरौं: सभामुख सापकोटा- भिडियो - कान्तिपुर समाचार

संसद चलाउनेबारे सबैले आत्मसमिक्षा गरौं: सभामुख सापकोटा

कान्तिपुर संवाददाता

काठमाडौँ — सभामुख अग्निप्रसाद सापकोटाले संसद सुचारु गराउन नेकपा एमालेसँग छलफलको लागि तयार रहेको बताएका छन् । सभामुख सापकोटाले संसद चलाउनका लागि संवादको विकल्प नभएकोले सरोकारवाला सबै पक्ष संवादमा आउनुपर्ने उल्लेख गरे ।

बुधवार न्यूज एजेन्सी नेपालसँगको कुराकानीमा उनले संसदको गरिमा बढाउन सबैको भूमिका बराबर रहेको उल्लेख गर्दै आफू प्रतिपक्ष दल नेकपा एमालेसँग छलफलका लागि तयार रहेको बताएका हुन् । सभामुख सापकोटाले आफूले सकेसम्म तटस्थ बसेर निर्णय लिएको बताउँदै सबैले आफूले गरेको कामको समिक्षा गरेर संवादमा आउनुपर्ने बताए ।

‘म अझै के भन्छु भने पहिला हाम्रो संवाद भइरहेको थियो, अहिले विवाद भइरहेको छ,अन्तिममा फेरि वादविवाद, संवादको विकल्प छैन, ढिलो चाँडो संवादमा उहाँहरू आउनुहुन्छ भन्ने छ’ सभामुख सापकोटाले भने । उनले संसदको गरिमा बढाउनका लागि हामी सबैको दायित्व उत्तिकै रहेको उल्लेख गरे । ‘के पक्ष, के विपक्ष, सबैभन्दा बढी भूमिका त सदनको हिसावले सभामुखको नै हो, के गर्नुपर्छ त्यसको लागि म तयार छु, तर सरकार, सभामुख, विपक्षी दलको नेताको र समस्त सांसदहरुको सबै दायित्व हुन्छ’ उनले भने ।

उनले सभामुखको जिम्मेवारी प्राप्त भइसकेपछि आफूले पनि तटस्थ, निष्पक्ष र स्वतन्त्र भूमिका खेलेको बताए । ‘मैले संविधान र खासगरी प्रतिनिधिसभाको नियमावलीमा टेकेरै आफ्ना कार्य सम्पादन गर्नुपर्छ, मैले फेरि फर्केर सबै कामको समिक्षा गर्ने कुरा हुन्छ, उहाँहरूले पनि समिक्षा गर्नुहुन्छ भन्ने आशा छ, हामी सबैले समिक्षा गरौं र सकारात्मक सोचका साथ संवाद थालौं, जतिसुकै ठूलो समस्या भएपनि संवादको विकल्प छैन, समन्वय, सहकार्य र समझदारी नै हो’ सभामुख सापकोटाले भने । संसदमा अहिलेका समस्या समाधान गर्नका लागि १५ दिनको समय रहेकाले त्यतिन्जेल सम्म सकारात्मक वातावरण बन्नेमा आफू आशावादी रहेको उनले बताए ।

प्रकाशित : आश्विन २७, २०७८ १७:२१
प्रतिक्रिया
पठाउनुहोस्

विश्‍व कीर्तिमानी धावक छुरा प्रहार गरिएको अवस्थामा आफ्नै घरमा मृत भेटिइन्

एजेन्सी

नैरोबी — दुईपटकको विश्व च्याम्पियन कांस्य पदक विजेता केन्याकी खेलाडी एग्नेस तिरोपको निवासमै छुरा हानेको अवस्थामा मृत भेटिएकी छन् । २५ वर्षीया धावक तिरोपले २०१७ र २०१९ को १०००० मि विश्व च्याम्पियनशिपमा कांस्य पदक जितेकी थिइन् ।

केन्याको नैरोबीस्थित एथलेटिक्स केन्याका अध्यक्ष बर्नाबा कोरिरले दुखद् समाचार भन्दै इटेन इल्गेओ काउन्टीमा उनको मृत्युको पुष्टि गरेका छन् ।

तिरोपले गत महिना मात्र जर्मनीमा १० किलोमिटरको विश्व कीर्तिमान बनाएकी थिइन् । विश्व कीर्तिमान बनाउन पाएकोमा उनले खुसी व्यक्त गर्दै भनेकी थिइन्, ‘गति कठिन थियो तर विश्व कीर्तिमान तोड्दा म धेरै खुसी छु।' उनको मृत्युबारे केन्याको प्रहरीबाट कुनै प्रतिक्रिया सार्वजनिक भइसकेको छैन ।

प्रकाशित : आश्विन २७, २०७८ १७:०५
पूरा पढ्नुहोस्
प्रतिक्रिया
पठाउनुहोस्
×