यस्तो बन्यो धरहरा- भिडियो - कान्तिपुर समाचार
कान्तिपुर वेबसाईट
AdvertisementAdvertisement

यस्तो बन्यो धरहरा

दिपेन्द्र रोक्का

काठमाडौँ — भूकम्पपछि पुनर्निर्माण गरिएको धरहरा यही वैशाख ११ गते प्रधानमन्त्री केपी शर्मा ओलीले उद्घाटन गर्ने भएका छन् । ३ अर्ब ४८ करोड रुपैयाँ अनुमानित लागत रहेको धरहराको पुनर्निर्माणमा बिहान र बेलुका गरेर साढे तीन सय मजदुरहरुले काम गर्दै आइरहेका छन् । यसको निर्माण ठेक्का जीआईटीसी रमन जेभीले २०७५ असोज १४ गते पाएको हो ।

डबल बेसमेन्टको धरहरा टावर, करिब ३ सय हाराहारीको क्षमता भएको ट्रिपल बेसमेन्ट पार्किङ, भूकम्पको संग्रहालय र क्याफेटेरिया गरी धरहरा निर्माणलाई चार भागमा विभाजन गरिएको थियो ।

भूकम्पले भत्काएको धरहराको भग्नावशेषलाई भने सिसाले छोपेर नयाँ धरहरा छेवैमा राखिनेछ । धरहराको पुरानै गजुरलाई मर्मत गरी सुनको जलप राख्ने काम पनि अन्तिम चरणमा पुगेको छ । धरहराको कुल उचाई ८० मिटर रहेको छ । यसलाई पुरानै संरचनामा निर्माण गरिएको हो । हरेक दुई तलामा पहिलाकै जस्तो कार्नेसको बुट्टा रहेको छ भने पुरानै शैलीको गोलो झ्यालहरु यसमा देख्न पाइनेछ ।

२०औं तलाबाट काठमाडौंको दृश्यावलोकन गर्ने व्यवस्था मिलाइएको छ । २२औं तलामा भने पुरानै शिव लिंग स्थापना गरिनेछ । नयाँ धरहरामा दुईवटा लिफ्टको पनि व्यवस्था गरिएको छ जुन अपांगमैत्री हुनेछन् । पहिलेको धरहरामा गोलो भर्‍याङ राखिएको थियो भने अहिलेको त्यसलाई नयाँ शैलीमा निर्माण गरिएको छ ।

पहिले सुर्की र इँटाबाट बनेको धरहरा अहिले गिट्टी बालुवा, सिमेन्ट र रडको प्रयोग गरी बनाइएको छ । पहिले हुलाक कार्यालय रहेको ठाउँमा अहिले पार्किङ क्षेत्र बनाइएको छ। यो तीन तहको पार्किङ क्षेत्र हुनेछ भने यसको माथि बगैंचा र पानीको फोहोरा हुनेछ । अहिले बन्न लागेको धरहराको कुल क्षेत्रफल ४२.२ रोपनी रहेको छ । छेवैमा रहेको सुन्धारालाई पनि जीवन्त बनाउने काम भइरहेको छ । अहिलेसम्म धरहराको ९७.३ प्रतिशत काम सम्पन्न भइसकेको छ अब बाँकी रहेको काममा रङ लगाउने, लिफ्टको काम, बत्तीका तारहरु लगाउने र जमिनको फ्लोरिङ गर्ने कामहरु रहेका छन् ।

प्रकाशित : वैशाख ३, २०७८ १३:४१
प्रतिक्रिया
पठाउनुहोस्

फेसन मास्कको

दिपेन्द्र रोक्का

काठमाडौँ — कोरोनाको विषम परिस्थितिमा पर्यायवाची बनेको मास्क हाल फेसन र प्रविधिको अध्ययन गरिरहेका विद्यार्थीले आफ्ना डिजाइनमा उतार्न थालेका छन् । नमुना कलेज अफ फेसन टेक्नोलोजीका १५ औं ब्याचका विद्यार्थीहरुले हाल आफ्नो ग्र्याजुएसनको अन्तिम परीक्षाका लागि यसको प्रयोग गर्न थालेका हुन्। प्रयोगात्मक कक्षामा विद्यार्थीहरुले गुडियामा बनाएको डिजाइन र त्यसमाथि प्रयोग भएको रंगीचंगी मास्क देख्न सकिन्छ। १०० अंकको यो परीक्षामा २५ अङ्क डिजाइनबाट, २५ प्रयोगात्मकबाट र र ५० अंक र्‍याम्प वाकबाट आउने छ।

विद्यार्थीहरुले बनाएका ७९ डिजाइनहरू मोडलले ३० गते काठमाडौंको सोल्टी होटलमा र्‍याम्प वाक गर्नेछन् । यो समयमा विद्यार्थीले बनाएको मास्क फेसेनेबल हुनुको साथसाथै यी डिजाइनले राम्रो बजार पाउने विश्वास कलेजकी प्रिन्सिपल ज्ञानीशोभा तुलाधरको छ । कोरोनाको समयमा अनिवार्य बनेको बनेको फेस र सर्जिकल मास्क एकै किसिमको लाउँदा मान्छेलाई अल्छी लाग्न सक्दछ त्यसैले फेसनमा पनि विभिन्न किसिमका ग्ल्यामरस मास्कको प्रयोग गरिएको तुलाधर बताउँछिन् । 'फेसन पनि भयो र जनचेतना पनि जगाउँछ भन्ने विश्वास छ मलाई,' पन्ध्रौं ब्याचकी पूजा न्यौपाने सुनाउँछिन् । यो ब्याचका ग्र्याजुएसन विद्यार्थीले आगामी सोमबार होटल सोल्टीमा आफ्नो फेसन सो प्रस्तुत गर्नेछन् ।


प्रकाशित : चैत्र २६, २०७७ १६:४१
पूरा पढ्नुहोस्
प्रतिक्रिया
पठाउनुहोस्
×