रोड टु नेसनल फुटसल लिग- भिडियो - कान्तिपुर समाचार
कान्तिपुर वेबसाईट
AdvertisementAdvertisement

रोड टु नेसनल फुटसल लिग

कान्तिपुर संवाददाता

काठमाडौँ — ढुकु फुटसल हब, स्काई गोल्स, प्रभातफेरी युथ क्लब र शंखमूल फुटसल शुक्रबार नेसनल फुटसल लिगमा छनोट भएका छन् ।पेप्सीकोलास्थित बैजन्ती फुटसलमा भएको वाग्मती प्रदेशको छनोटको सेमिफाइनलमा स्थान पक्का गर्दै यी टोली नेसनल फुटसललाई छनोट भएका हुन् । फाइनल पुग्न शनिबार ढुकु र स्काई तथा प्रभातफेरी र शंखमूलले प्रतिस्पर्धा गर्नेछन् ।

ढुकु फुटसलले प्रिजमाटिक फुटसल एन्ड आरसीलाई ९–३ ले, स्काईले काया स्पोर्टसलाई ६–२ ले र प्रभातफेरी युथले स्तुपा स्पोर्ट्सलाई ६–३ ले पराजित गरे । शंखमूल र सूर्य फुटसलबीच निर्धारित समयको खेल १–१ को बराबरीमा टुंगिएपछि पेनाल्टी शुटआउटमा शंखमूल ४–२ ले विजयी थियो ।

वाग्मती प्रदेशबाट ४ टोली छनोट हुने प्रावधानअनुरुप ढुकु, स्काई, प्रभातफेरी र शंखमूल जेठ १ देखि २२ सम्म पोखरास्थित बहुउद्देश्यीय कभर्डहलमा हुने नेसनल फुटसल लिगलाई छनोट भएको हो । अखिल नेपाल फुटबल संघ (एन्फा) को फुटसल कमिटीले टर्नपाइक इभेन्ट्स प्रालिको व्यवस्थापनमा ‘ए’ डिभिजन राष्ट्रिय फुटसल लिग अर्थात नेसनल फुटसल लिगको छनोट खेल आयोजना गरिरहेको छ । वाग्मतीको छनोट तीन दिनअघि सुरु भएको हो ।

प्रकाशित : चैत्र २८, २०७७ १७:२५
प्रतिक्रिया
पठाउनुहोस्

एपीएफ ललितपुर मेयर महिला च्याम्पियन

कान्तिपुर संवाददाता

काठमाडौँ — नेपाल एपीएफ क्लबले ललितपुर मेयर महिला च्याम्पियनसिप क्रिकेटको उपाधि जितेको छ । प्रतियोगिताको शनिबार भएको फाइनलमा एपीएफले सुदूरपश्चिम प्रदेशलाई ८ विकेटले पराजित गर्‍यो । टस जितेको सुदूरपश्चिमले त्रिवि क्रिकेट मैदानमा ७ विकेट गुमाई १ सय ६ रनमात्र बनाउन सक्यो ।

कप्तान सीता रानामगर र ज्योति पाण्डेले पहिलो विकेटमा ६९ रनको साझेदारी गरेपछि एपीएफले १६.२ ओभरमै १ सय ९ रन बनाएको थियो । सीता २७ र प्लेयर अफ द फाइनल ज्योति ३६ रनमा रनआउट भए । इन्दु बर्मा १९ र ममता चौधरी १५ रनमा अविजित रहे ।

यसअघि सुदूरपश्चिमबाट विन्दु रावलले अविजित ४४ रन बनाएकी थिइन् । उनले ५४ बल खेली ४ चौका प्रहार गरिन् । डली भट्ट १४, कविता कुँवर १३ र रेवती धामी १० रनमा आउट भइन् । एपीएफकी रेखा रावल, करुणा भण्डारी, सुष्मा श्रेष्ठ, सीता र विनु बुढामगरले १–१ विकेट लिइन् ।

विनु उत्कृष्ट बलर र ललितपुर मेयर–११ की कप्तान रुविना क्षेत्री उत्कृष्ट ब्याटर बनिन् । सीता उत्कृष्ट खेलाडी बनि २५ हजार पारिन् । ललितपुर महानगरपालिकाको प्रमुख प्रायोजनमा पहिलो पटक आयोजना भएको प्रतियोगितामा प्रधानमन्त्री कपका शीर्ष पाँच टोलीले राउन्ड रोबिनका आधारमा प्रतिस्पर्धा गरेका थिए ।

विजयी एपीएफले ३ लाख नगद र उपविजेता सुदूरपश्चिमले १ लाख ५० हजार नगद हात पार्‍यो । विजयी खेलाडीलाई ललितपुर महानगरपालिकाका प्रमुख चिरीबाबु महर्जन, नेपाल क्रिकेट संघका अध्यक्ष चतुरबहादुर चन्द लगायतले पुरस्कृत गरे ।

प्रकाशित : चैत्र २८, २०७७ १७:२१
पूरा पढ्नुहोस्
प्रतिक्रिया
पठाउनुहोस्
×