'ब्याड' जोडीको 'गुड वर्क'- भिडियो - कान्तिपुर समाचार
कान्तिपुर वेबसाईट
AdvertisementAdvertisement

'ब्याड' जोडीको 'गुड वर्क'

राजकुमार कार्की

सिन्धुली — लकडाउन र निषेधाज्ञामा प्रायः सबैजना घरमै लक भए । तर सिन्धुलीको कमलामाई नगरपालिका ५, गैयाटारका दुई तन्नेरीले लकडाउनमै आफ्नो खुबी देखाए । लोकभाकामा आफ्ना सिर्जनाहरु पस्कन माहिर २२ वर्षीय दीपेश फुयाँलले भर्खर १८ वर्ष टेकेका विवेक गौतमको साथमा आफ्नो सिर्जना युट्युब र सामाजिक सञ्जालमार्फत दुनियाँलाई देखाए र सबैको तारिफ पाए ।

विवेक मुखबाटै विभिन्न धुन निकालेर संगीत भरिदिने अर्थात विट-बक्सिङ गर्छन भने दीपेश सुरिलो स्वरमा भाका भर्छन् ।

दिपेश र विवेक यसअर्थमा फरक छन् कि उनीहरुले सामाजिक समस्यामा आधारित र जनचेतनामूलक विषयमा गीत निर्माण गरिरहेछन् । पछिल्लो समय उनीहरुले खासगरी बालबालिका र कोरोना कहरसँग जुध्नका लागि मनोबल बढाउने खालको गीत गाए । युवतीहरुमाथि एसिड प्रहारको घटनाले पनि उनीहरुलाई छोयो । अनि एसिड प्रहारको विरोध जनाउन पनि गीत नै गाए ।

कोरोना कहरमै दीपेश र विवेकको जोडीले बालबालिका लक्षित गरेर आफ्नो प्रस्तुति दिएका छन् । घरका अभिभावकले भनेको नमान्ने तर मन छुने खालको गीतमा सन्देशमूलक सामाग्रीहरु पस्किन सके बालबालिकाहरुले त्यसलाई समाउने दीपेशको बुझाइ छ । जाजरकोटको नवराज विक हत्याकाण्डलाई मार्मिक तवरले जोडीले प्रस्तुत गरेका छन् ।

प्रकाशित : भाद्र ४, २०७७ १९:१२
प्रतिक्रिया
पठाउनुहोस्

महामारीमा प्रदेशसँग समन्वय गर्न स्वास्थ्यमन्त्रीले बनाए उच्चस्तरीय समिति

कान्तिपुर संवाददाता

काठमाडौँ — स्वास्थ्य तथा जनसंख्यामन्त्री भानुभक्त ढकालले कोभिड-१९ रोकथामका लागि हरेक प्रदेशमा एक उच्चस्तरीय समिति गठन गरी परिचालन गर्ने निर्णय गरेका छन् । महानिर्देशक नेतृत्वमा देशभर कोभिड-१९ को रोकथाम एवं प्रतिकार्य सहजीकरण गर्न खटिएको टोलीले औंल्याएका समस्याहरुलाई प्रभावकारी तरिकाले समन्वय गर्नका लागि स्वास्थ्य मन्त्री ढकालले सो निर्णय गरेको प्रेस सल्लाहकार माधवप्रसाद तिवारीले जानकारी दिए ।

उनका अनुसार समितिमा स्वास्थ्य मन्त्रालयका एघारौं तहका कर्मचारी, राष्ट्रिय स्वास्थ्य तालिम केन्द्रका शाखा प्रमुख तथा एक जनस्वास्थ्य अधिकृत रहने छन् । समितिले प्रदेशका विभिन्न स्थानहरुमा भ्रमण गरी त्यहाँका अस्पताल, स्थानीय तह, प्रदेश स्वास्थ्य कार्यालय, प्रदेश स्वास्थ्य निर्देशनालय, प्रादेशिक प्रयोगशाला एवं सामाजिक विकास मन्त्रालयसँग समन्वय गरेर ‌संक्रमितहरुको व्यवस्थापन तथा कन्ट्याक्ट ट्रेसिङलाई प्रभावकारी बनाउन सहयोग गर्ने छ ।

यस्तै, विभिन्न नाकाहरुबाट नेपाल प्रवेश गर्ने व्यक्तिहरुलाई अनिवार्य रुपमा मापदण्ड अनुसारको क्वारेन्टाइनहरुमा राख्ने र परीक्षण गर्ने व्यवस्था समेत सो समितिले मिलाउने छ । यसका साथै कुनैपनि अस्पतालहरुमा कार्यरत स्वास्थ्यकर्मीहरुलाई संक्रमण भइ अस्पताल सञ्चालन गर्न कठिन भएमा हब तथा स्याटेलाइट अस्पतालबाट स्वास्थ्यकर्मी र अन्य सहयोगी कर्मचारीहरु व्यवस्थापन गर्नका लागि समन्वयकारी भूमिका निर्वाह गर्ने छ ।

समितिले कोभिड-१९ अस्पतालहरुमा यथाशिघ्र अक्सिजन प्लान्टहरु निमार्ण गर्न पनि पहल गर्नेछ भने आईसीयू र भेन्टिलेटरको व्यवस्था गर्न पनि समन्वय गर्ने छ । समितिको कार्य अवधी २ देखि ३ हप्ताको हुने बताइएको छ ।

प्रकाशित : भाद्र ४, २०७७ १९:०४
पूरा पढ्नुहोस्
प्रतिक्रिया
पठाउनुहोस्
×