काठमाडौँ — साइबर सुरक्षा विज्ञ विवेक राणाले सार्वजनिक निकायमा अनलाइन सेवाबाट आवेदन लिइए पनि अन्य काम डिजिटल हुनै नसकेको बताएका छन् । जसले गर्दा झन्झटिलो भई अनलाइन आवेदन प्रणाली प्रति पनि सर्वसाधारणको विश्वास घटेको बताए ।

कान्तिपुर मिडिया ग्रुपले आयोजना गरेको साइबर सुरक्षा संवादमा बोल्दै राणाले सार्वजनिक निकायले अनलाइनबाट आवेदन लिने सेवा सुरु गरे पनि काम डिजिटल नहुँदा ग्राहकलाई झन् सास्ती भएको बताए । साइबर सुरक्षा इन्डेक्समा नेपाल पहिले भन्दा माथि गए पनि अपराध बढिरहेको उनको भनाइ छ ।

अन्य मुलुकहरुले सिस्टमहरु तयार गर्ने क्रममा ९ वर्षको योजना बनाउने गरे पनि नेपालमा १ वर्षको मात्रै बनाइने गरेको र सिस्टमको डिजाइन गर्दा त्यसको क्षमता र प्रभावकारिताका सन्दर्भमा ध्यान नदिइने गरेको उनले बताए ।

सरकारले डिजिटल इकोनोमीको कुरा गरिरहे पनि नेपालमा डिजिटल प्लाटफर्म नै विकास हुन नसकेको उनको भनाइ छ । उनले भने 'आइटी गभर्नेन्सका कुरा नै राम्ररी गर्न सकेका छैनौं, हाम्रो सोच आइटीमै केन्द्रित छ । डिजिटल गभर्नेन्स परको कुरा । आइटी र डिजिटल फरक विषय हुन् ।' सामान्य एउटा डिभाइस किन्दा पनि हामीले त्यसको सुरक्षाका विषय नसोची मूल्यमा बढी सोच्ने गरिएको उनको भनाइ छ । इन्टरनेटको प्रयोग प्रविधिको सुरक्षाका विषयमा बढी प्रयोग हुनुपर्ने उनले बताए ।