साइबर सुरक्षा मजबुत बनाउन प्रयोगकर्ता पनि डिजिटल साक्षर हुन आवश्यक छ : एसएसपी अर्याल

कान्तिपुर मिडिया ग्रुपले बिहीबार आयोजना गरेको 'कान्तिपुर : साइबर सेक्युरिटी डायलग १‍.०' को पहिलो सत्र 'अधिक प्रयोग : न्यून साक्षरता' मा आफ्ना कुरा राख्दै एसएसपी अर्यालले पछिल्लो समय विभिन्न अनलाइन पोर्टल र अनलाइन कारोबारका नाममा साइबर ठगी भइरहेको बताएका हुन् ।

एसएसपी अर्यालले साइबर सुरक्षालाई थप मजबुत बनाउनका लागि दक्ष जनशक्तिका साथै क्षमता विकासलगायतका कुरालाई विशिष्टकृत रूपमा अध्ययन गरेर सुरक्षा रणनीति बनाउनुपर्ने बताएका हुन् ।

एसएसपी अर्यालले भने, 'पछिल्लो समय डेटिङ पोर्टलको दुरुपयोग बढिरहेको छ । त्यस्तै विद्युतीय कारोबारसम्बन्धी ठगी पनि बढिरहेको छ । ओटीपी, वालेटलगायतका कुरामा सेवाग्राही ठगिएका छन् ।'

वित्तीय तथा विभिन्न क्षेत्रमा देखिएको साइबर असुरक्षाको सामना गर्नका लागि प्रमाणित सफ्टवेयरहरूको प्रयोग हुनुपर्ने एसएसपी अर्यालले बताए । साइबर अपराधहरू न्यूनीकरण तथा नियन्त्रणका लागि नेपाल प्रहरीले प्रदेशमा समेत साइबर ब्युरोको विस्तारका लागि काम गरिरहेको ब्युरो प्रमुख अर्यालले जानकारी दिए ।