आफ्नै अन्तरिक्ष केन्द्र निर्माणका लागि चीनले पठायो ३ अन्तरिक्ष यात्री- विज्ञान र प्रविधि - कान्तिपुर समाचार
कान्तिपुर वेबसाईट
AdvertisementAdvertisement

आफ्नै अन्तरिक्ष केन्द्र निर्माणका लागि चीनले पठायो ३ अन्तरिक्ष यात्री

इकान्तिपुर डेस्क

काठमाडौँ — चीनले आफैं निर्माण गरिरहेको टियाहे अन्तरिक्ष केन्द्रमा बिहीबार तीन जना चिनियाँ अन्तरिक्षयात्री त्यसतर्फ गएका छन् ।

जियूकान स्याटेलाइट लन्च सेन्टरबाट बिहीबार बिहान ९ बजेर २२ मिनेटमा मार्च-२ एफ रकेटले उनीहरु चढेको सेन्झोउ-१२ यानलाई अन्तरिक्ष केन्द्र लगेको हो ।प्रक्षेपण सफल भएको चिनियाँ सञ्चारमाध्यमहरुले जनाएका छन् । चीनले पछिल्लो ५ वर्षमा पहिलो पटक अन्तरिक्षयात्रीहरुलाई अन्तरिक्षमा पठाएको हो ।

अन्तरिक्ष केन्द्रमा पठाइएका चिनियाँ अन्तरिक्षयात्रीहरुमा ५६ वर्षीय निह हाइसङ,५४ वर्षीय लिउ बोमिङ र ४५ वर्षीय थङ हङ्बो रहेका छन् । हाइसङ यसअघि सेन्झोउ-६ र सेन्झोउ-१० मिसनमा काम गरिसकेका अनुभवी टाइकानट्स(चिनियाँ अन्तरिक्षयात्री) हुन् । बोमिङ सेन्झोउ-७ मिसनमा सहभागी थिए भते थङको यो पहिलो अन्तरिक्ष मिसन हो ।

उनीहरु त्यहाँ ३ महिना बसेर अन्तरिक्ष अन्वेषणसम्बन्धीका कामहरु गर्नेछन् । निर्माणाधीन अवस्थामा रहेको अन्तरिक्ष केन्द्रलाई एसेम्बल गर्ने, अन्य 'एक्स्ट्रा भेहिकुलर' गतिविधि गर्ने र अन्तरिक्ष केन्द्रको कक्ष मर्मतसम्हार गर्ने कार्यमा खटिने चिनियाँ सञ्चारमाध्यमहरुले जनाएका छन् ।

गत अप्रिलमा चीनले अन्तरिक्ष अन्वेषणका लागि सन् २०२२ सम्ममा आफ्नो छुट्टै अन्तरिक्ष केन्द्र निर्माण गर्ने घोषणा गरेको थियो । घोषणा गरेको दुई महिनामै उसले अन्तरिक्षयात्री पठाएसँगै चीनले 'अन्तरिक्ष रेस'मा अभूतपूर्व सफलता हासिल गरेको बताइएको छ ।

अन्तरिक्ष केन्द्र स्थापनाका लागि गरिएको यो तेस्रो प्रक्षेपण हो । विभिन्न ११ चरणमा अन्तरिक्ष निर्माण कार्य सम्पन्न हुने बताइएको छ । यसअघि चीनले अन्तरिक्ष केन्द्र निर्माणका लागि भनेर कार्गो मिसन र कोर मोड्युल(टियाहे) अन्तरिक्षमा पुर्‍याइसकेको थियो ।

टियाहे मोड्युल २२.५ टनको छ । ल्याब क्याप्सुल वेन्टियन मोड्युल र मेङ्टिएनल ल्याब क्याप्सुल मोड्युल पनि २० देखि २२ टनको हुनेछन् ।

चीनले प्रक्षेपणमा प्रयोग गरिएको लङ मार्च-२एफ रकेट चीनको सुरक्षित रकेट बताइन्छ । ५८.३ मिटर उचाइको यो रकेट छिटो र भरपर्दो केरिएर रकेट हो । यसमा दुई वटा कोर स्टेज र चारवटा बुस्टर छन् । यसले लो अर्थ अर्बिटमा ८.६ टनसम्मको पेलोड पठाउन सक्छ ।

तस्बिरहरू : सिन्ह्वा

प्रकाशित : असार ३, २०७८ १२:१७
प्रतिक्रिया
पठाउनुहोस्

कमिसन चक्करमा अस्पताल निर्माण योजना फ्रिज

विनोद भण्डारी

मोरङ — जनप्रतिनिधि र कर्मचारीले ‘कमिसन नपाउँदा’ अस्पताल निर्माणका लागि स्वास्थ्य मन्त्रालयबाट उपलब्ध हुने साढे १८ करोड बजेट मोरङको सुनवर्षी नगरपालिकाले गुमाएको छ ।

स्वास्थ्य मन्त्रालयले चालु वर्ष हरेक गाउँपालिका र नगरपालिकामा १५ बेडको अस्पताल निर्माणका लागि डीपीआर निर्माणका लागि ४० लाख र भवन निर्माणका लागि १८ करोड रकम विनियोजन गरेको थियो ।

त्यसका लागि स्थानीय तहले अस्पताल निर्माणका लागि आवश्यक जमिनमात्र फागुन मसान्तभित्रमा उपलब्ध गर्नुपर्ने प्रावधान थियो । प्रावधानअनुसार मोरङका अन्य स्थानीय तहमा अस्पताल निर्माण कार्य सुरु भइसकेको छ । तर सुनवर्षी नगरपालिकाका जनप्रतिनिधि र कर्मचारीले कमिसनको चक्करका कारण समयमा जमिन उपलब्ध गराउन नसक्दा बजेट नै फ्रिज भएको नगरवासीको दाबी छ ।

नगरपालिकाको वडा ९ ले हालको नगरपालिका कार्यालय पूर्वको मुरारी सिंह र गणपत साहसहित ६ जनाको नाममा रहेको सडक सञ्जालले छोएको प्रतिकट्ठा १५ लाख मूल्य पर्ने साँढे १८ कट्ठा जमिन निःशुल्क उपलब्ध गराउन वडा अध्यक्ष कमलकिशोर सिंहसँग सम्झौता गरेका थिए । जग्गा दातामध्येका मुरारी सिंहका अनुसार मेयर कालीप्रसाद दास र कार्यकारी अधिकृत पुरुषोत्तम घिमिरेले आफूहरूलाई पनि दुई–दुई कट्ठा जमिन उपलब्ध भएमात्र उक्त जमिनमा अस्पताल बनाउन स्वीकृत गर्ने बताएपछि योजना नै फ्रिज भएको बताए ।

जमिन उपलब्ध नगर्ने बताएपछि मेयर दासले कसैलाई जानकारी नगराई हुलाकी सडकदेखि करिब ८ सय मिटर उत्तरमा पर्ने खुर्सिद आलम, महताव आलमलगायतको नाममा रहेको सडकले नछोएको बीच भागमा पर्ने एक बिघा ६ कट्ठा जमिनमा अस्पताल बनाउने तयारी गरेको सिंहले बताए । त्यहाँ मेयर दासले आफू र नजिकका कर्मचारीलाई दुई/दुई कट्ठाका दरले जग्गा पास गराएर अस्पताल बनाउने सम्झौता गरेको सिंहले बताए ।

उजुरीपछि प्रमुख जिल्ला अधिकारीले अधिकृत रामप्रसाद नेपालको संयोजकत्वमा छानबिन समिति गठन गरे । उक्त समितिले साढे १८ कट्ठामा अस्पताल निर्माण गर्न उपयुक्त भएको भन्दै एक बिघा ६ कट्ठा प्राविधिक रूपमा उपयुक्त नभएको प्रतिवेदन बुझाएपछि प्रजिअले पहिलो प्राप्त जमिनमा अस्पताल निर्माण निर्देशन दिए पनि मेयर र कार्यकारीले अटेर गर्दा समस्या भएको स्थानीयको गुनासो छ । नगरवासीले यसविरुद्ध अख्तियार दुरुपयोग अनुसन्धान आयोगमा पनि उजुरी दिएका छन् ।

जिल्ला प्रशासनबाट आएको छानबिन समितिले आफूहरूसँग सम्पर्क नगरी जमिन हेरेर फर्किएको कार्यकारी अधिकृत घिमिरेले बताए । सुरुको साढे अठार कट्ठा जमिन मात्र हेरेर हुलाकी मार्ग उत्तरको १ बिघा ६ कट्ठा जमिनमा पुग्दै नपुगी फर्केर गएर आफ्नो प्रतिवेदन बुझाएको घिमिरेको दाबी छ ।

प्रकाशित : असार ३, २०७८ १२:१६
पूरा पढ्नुहोस्
प्रतिक्रिया
पठाउनुहोस्
×