मंगल ग्रहमा रहेको चिनियाँ रोभरले खिचेका तस्बिरहरु सार्वजनिक - विज्ञान र प्रविधि - कान्तिपुर समाचार
कान्तिपुर वेबसाईट
AdvertisementAdvertisement

मंगल ग्रहमा रहेको चिनियाँ रोभरले खिचेका तस्बिरहरु सार्वजनिक 

आफैले निर्माण गरेको अन्तरिक्ष केन्द्रमा अर्को साता तीन अन्तरिक्ष यात्रीहरु पठाउँदै चीन
इकान्तिपुर डेस्क

काठमाडौँ — अमेरिका पछि मंगल ग्रहको सतहमा रोभर अवतरण गराउने दोस्रो मुलुक बनेको चीनले त्यहाँका तस्बिरहरु सार्वजनिक गरेको छ । 

चिनियाँ झन्डा अंकित मंगल ग्रहको सतहमा गुडिरहेको चुरोङ रोभरले खिचेका तस्बिरहरु चाइना नेसनल स्पेस एड्मिनिस्ट्रेसन(सीएनएसए)ले ले सार्वजनिक गरेको हो ।

मंगल ग्रहको सतहका साथै मार्सियन सतहमा रोभरले सेल्फी लिएको तस्बिर समेत सीएनएसएले एक कार्यक्रमका बीच सार्वजनिक गरेको हो ।

एउटा तस्बिरमा रोभरले सेल्फी लिएको, अर्को तस्बिरमा अवतरण गर्ने बेलामा रोभरको प्लेटफर्मलगायतका तस्बिरहरु छन् ।

गत बिहीबार अमेरिकाको एरिजोना विश्वविद्यालयले मंगल ग्रहको सतहमा रहेको चीनको चुरोङ रोभरको स्याटेलाइट तस्बिर सार्वजनिक गरेको थियो ।

करिब सात महिनाको अन्तरिक्ष यात्रापछि रोभर गत मेमा मंगल ग्रह पुगेको थियो । मंगल ग्रहको कक्षमा तीन महिनासम्म परिक्रमा गरेर चुरोङ रोभर त्यहाँ पुगेको थियो । चिनियाँ भाषामा चुरोङको अर्थ पौराणिक अग्नि र युद्धको देवताको रुप हो । रोभरले ९० मार्सियन दिनसम्म काम गर्ने अपेक्षा लिइएको छ ।

सन् २०२०को जुलाईमा चीनले मंगल ग्रह तियान्वेन-१ मिसन सञ्चालन गरेको थियो । चीनको यो सफलतालाई अन्तरिक्ष खोजमा ठूलो सफलताको रुपमा लिइएको छ ।

चीनले तियान्वेन मिसनबारे थोरै जानकारी मात्र सार्वजनिक गरेको छ । तर यो रोभरले ‌मंगल ग्रहको सतहको नक्सांकन र त्यहाँ जीवको अस्तित्वको खोज गर्नेछ । तियान्वेन-१ यानमा एउटा अर्बिटर, ल्यान्डर र रोभर छ ।

अघिल्लो वर्ष प्रक्षेपण भएपछि तियान्वेन-१ले धेरै मात्रामा वैज्ञानिक तथ्यांक संकलन गरिरहेको चीनले जनाएको छ ।

चीनको यो रोभर मंगल ग्रहको उत्तरी गोलार्धस्थित युटोपिया प्‍लेनेसिया भू-भागमा अवतरण गरेको थियो । त्यहाँबाट पृथ्वीमा रेडियो सन्देश पुर्‍याउन करिब १८ मिनेट लाग्छ । पृथ्वी र मंगल ग्रहबीचको दूरी ३२ करोड किलोमिटर छ ।

चिनियाँ मंगल मिसनलाई अन्तरिक्ष अन्वेषणको एक महत्वपूर्ण हिस्साको रुपमा लिइएको छ । सन् २०२० मा चिनियाँ यानले चन्द्रमामा अवतरण गरेर केही नमुना लिएर पृथ्वीमा फर्किएको थियो । उक्त मिसनपछि अमेरिका र सोभियत युनियनपछि चन्द्रमाबाट लुनर नमुना लिएर फर्कने तेस्रो मुलुक बनेको थियो ।

चीनको चुरोङ रोभरका अलावम यो वर्ष मंगल ग्रहमा नासाको पर्सिभरेन्स रोभर पनि अवतरण गरेको थियो । गत फेब्रुअरी १८मा पर्सिभरेन्स रोभरले मंगल ग्रहको सतहलाई छोएको थियो । हाल उक्त रोभरले मंगल ग्रहमा खोज तथा अनुसन्धान गरिरहेको छ । पर्सिभरेन्स रोभर मंगल ग्रहमा रहेको सय दिनको अवसर पारेर नासाले तस्बिरहरु समेत सार्वजनिक गरेको थियो । उक्त रोभरसँगै मंगल ग्रहमा पठाइएको इन्जिन्युटी हेलिकप्‍टरको पनि सफल परीक्षण भएको

सन् २०२१को फेब्रुअरीमै यूएईको होप यान मंगल ग्रहको कक्षमा प्रवेश गरेर नयाँ कीर्तिमान कायम गरेको थियो । यूएई मंगल ग्रहको कक्षमा आफ्नो यान पुर्‍याउने यूएई संसारको पाचौं मुलुक बनेको छ । उक्त यान मंगल ग्रहलाई परिक्रमा गरेर त्यसको वायुमण्डल अध्ययन गर्नका लागि तयार गरिएको थियो ।

यसैबीच चीनले अन्तरिक्षमा निर्माण गरेको आफ्नै नयाँ अन्तरिक्ष केन्द्रमा अन्तरिक्ष यात्रीहरु पठाउन रकेट तयार भएको जनाएको छ । यो रकेट अर्को साता अन्तरिक्षतर्फ पठाइने तयारी चीनले गरेको छ ।

चीनले पहिलो पटक तीन जना अन्तरिक्ष यात्रीलाई नयाँ अन्तरिक्ष केन्द्रमा पठाउँदैछ । उनीहरु तीन महिना अन्तरिक्षमा रहने छन् । उनीहरुले त्यहाँ रहँदा अन्तरिक्ष केन्द्र बाहिर हिँड्ने (स्पेसवाक), निर्माण र मर्मतका साथै वैज्ञानिक अनुसन्धान गर्नेछन् ।

तियान्हे नाम दिइएको नयाँ अन्तरिक्ष केन्द्रको मुख्य खण्ड गत अप्रिल २९ मा अन्तरिक्षमा पठाइएको थियो भने गत महिना अन्तरिक्ष यात्रीका लागि आवश्यक इन्धन, खाद्यान्न र उपकरण बोकेको कार्गो रकेट पठाइएको थियो ।

लङ मार्च–२एफ वाई१२ रकेटलाई बुधबार चीनको उत्तरपश्चिम स्थित जिक्वान स्याटेलाइट लन्च सेन्टरमा पठाइएको छ । यो रकेटले सम्भवतः आगामी बुधबार अन्तरिक्ष यात्रीहरुलाई अन्तरिक्षमा पठाउने बताइएको छ ।

चिनियाँ अन्तरिक्ष इन्जिनियरिङ कार्यालयले अर्को वर्षको अन्त्यसम्ममा ११ वटा रकेट प्रक्षेपण गर्नेछ जसले दुई वटा प्रयोगशाला मोड्युलहरु अन्तरिक्षमा पठाउने छ । हाल तियान्हेको वजन करिब ७० टन छ । चीनले चार पटक अन्तरिक्ष यात्रीहरु अन्तरिक्षमा पठाउने योजना बनाएको छ ।

चीनले पठाउन लागेका अन्तरिक्ष यात्रीहरुमा वरिष्ट अन्तरिक्ष यात्रीहरु, नयाँ व्यक्तिहरु र महिलाहरु पनि रहेका छन् । चीनले यसअघि ११ जना यात्रीलाई अन्तरिक्षमा पठाइसकेको छ जसमा सबैजसो चीनको सेनाका पाइलटहरु रहेका छन् ।

प्रकाशित : जेष्ठ २९, २०७८ १५:११
प्रतिक्रिया
पठाउनुहोस्

राजमो सांसद थापा प्रदेश प्रमुख निवासमा

कान्तिपुर संवाददाता

पोखरा — नयाँ सरकार गठनका लागि दिइएको समय सकिनैलाग्दा पार्टीले सांसद पदबाट निस्कासन गरेका राष्ट्रिय जनमोर्चाका सांसद कृष्ण थापा गण्डकी प्रदेशप्रमुखको निवास छिरेर फर्किएका छन् । 

प्रदेश प्रमुख सीताकुमारी पौडेलले शुक्रबार दिउसो ३ बजेसम्मका लागि नयाँ सरकार गठन गर्न समयसीमा दिएकी थिइन् । बिहीबार नै विपक्षी गठबन्धनले बहुमत पुर्याएर कांग्रेस संसदीय दलका नेता कृष्णचन्द्र पोखरेललाई मुख्यमन्त्री नियुक्त गर्न माग गरेको छ । थापाको पार्टीका अन्य सांसद यो गठबन्धनमा भए पनि थापा भने छैनन् । ३१ जना सांसद् पोखरेलको पक्षमा समर्थन गर्दै प्रमुख निवासमा सशरीर उपस्थित भएका थिए । तर प्रदेश प्रमुखले अहिलेसम्म कुनै निर्णय गरेकी छैनन् । थापालाई सर्वोच्चले पदमा पुनर्वहाली गरिदिएको थियो । यो मुद्दाको अन्तिम किनारा भने लागेको छैन । बिहीबार मुख्यमन्त्री पृथ्वीसुव्वा गुरुङले विश्वासको मत माग्दा प्रदेशसभामा उनी तटस्थ बसेका थिए । त्यसपछि पनि फेरि उनलई पार्टीले सांसदबाट निस्कासन गरेको शुक्रबारको प्रदेशसभा बैठकमा सभामुखले जानकारी गराएका थिए ।

थापा प्रमुख निवासमा पुग्नु र बहुमत पुग्दासमेत मुख्यमन्त्री नियुक्त नगर्नुमा कुनै षड्यन्त्र त छैन भन्ने विपक्षी गठबन्धनका नेताहरुले आशंका गरेका छन् ।

थापाले भने सर्वोच्चको अन्तरिम आदेशसम्बन्धी निवेदन दिन गएकाे बताएका छन् । दलको नेता परिवर्तन नभएको जानकारी सहितको पत्र बुझाएको भन्ने पनि छ है । प्रदेश संसदीय दलमा राजमोको संसदीय दलको नेता रहेका थापालाई पार्टीले हटाएको थियो । उनले संसदीय दलको नेता परिवर्तन नभएको भन्ने पत्र बुझाएको बताइएको छ ।


प्रकाशित : जेष्ठ २९, २०७८ १५:०५
पूरा पढ्नुहोस्
प्रतिक्रिया
पठाउनुहोस्
×