कोरोना रोकथामको लागि एनसेलको १० करोड

प्रधानमन्त्री तथा मन्त्रिपरिषद् कार्यालयका सचिव नारायणप्रसाद विडारीलाई भेटेर एनसेलका प्रमुख कार्यकारी अधिकृत एण्डी चोङ्गले मंगलबार १० करोडको चेक हस्तान्तरण गरेका हुन् ।

यो सहयोग कोभिड–१९ रोकथाम, नियन्त्रण तथा उपचारका लागि अत्यावश्यक व्यक्तिगत सुरक्षा उपकरण (पीपीई), स्वास्थ्य सामग्री, पीसीआर परीक्षण किट किन्न तथा क्वारेन्टाइनका साथै संक्रमित बिरामीको उपचारमा उपयोग हुनेछ ।

एनसेलको सहयोग बुझ्दै प्रधानमन्त्री कार्यालयका सचिव विडारीले सरकारको प्रयासमा निजी क्षेत्रको सहयोग सह्राहनीय भएको बताए ।

सहयोग हस्तान्तरण गर्दै एनसेलको प्रमुख कार्यकारी अधिकृत चोङ्गले सामाजिक उत्तरदायित्व अन्तर्गत एनसेलले यो सहयोग गरेको बताए । ‘हाम्रो सहयोगले सरकारलाई अत्यावश्यक स्वास्थ्य सामग्री र उपकरण खरिदमा सरकारलाई सहयोग हुनेछ,’ उनले भने ।

स्थापनाकालदेखि एनसेलले विभिन्न सामाजिक उत्तरदायित्व कार्यक्रमअन्तर्गत नेपालको सामाजिक, आर्थिक विकासमा सहयोग पुर्‍याउँदै रु ८० करोड रुपैयाँभन्दा बढी योगदान गरिसकेको कम्पनीद्धारा जारी विज्ञप्तीमा भनिएको छ ।