टेलिकमको फोरजी थ्रीजीकै भाउमा, चार दिन सित्तै चलाउन दिइने- विज्ञान र प्रविधि - कान्तिपुर समाचार

टेलिकमको फोरजी थ्रीजीकै भाउमा, चार दिन सित्तै चलाउन दिइने

दर पुरानै गति भने तीव्र
विष्णु पोखरेल

काठमाडौं — नेपाल टेलिकमले हाल चलिरेका सेवाको महसुल दरमा नै चौथो पुस्ताको मोबाइल सेवा (फोरजी) समेत चलाउने भएको छ । आगामी आइतबारदेखि काठमाडौं र पोखराबाट यो सेवा सुरु गर्न लागेको टेलिकमले तत्कालका लागि पुरानै दरमा फोरजी चलाउन दिने भएको हो । आइतबारदेखि टेलिकमले नेपालमै पहिलोपटक फोरजी सेवा सुरु गर्न लागेको छ ।

‘आइतबार फोरजीको ‘सफ्ट लन्च’ हुन लागेको हो,’ टेलिकमका एक उच्च अधिकारीले भने, ‘त्यसैले गर्दा अहिले व्यावसायिक प्याकेज ल्याइएको छैन, प्रवर्द्धनका लागि पुरानै दरमा चलाउन दिने निर्णय भएको हो ।’ ती अधिकारीका अनुसार हाल दोस्रो पुस्ताको मोबाइल सेवा (टुजी) र तेस्रो पुस्ताको मोबाइल सेवा (थ्रीजी) मा लागू भएकै महसुल दर फोरजीका लागि कायम गरिएको हो ।

टेलिकमले हालसम्म नेपाल दूरसञ्चार प्राधिकरणमा फोरजीको महसुल दर स्वीकृतीका लागि पठाएको छैन । पुरानै दरमा फोरजी लागू गरिएकाले टेलिकमले प्राधिकरणमा नयाँ महसुल प्रस्ताव नगरेको टेलिकमका अधिकारीहरू बताउँछन् । प्राधिकरणका अध्यक्ष दिगम्बर झाले समेत त्यसलाई पुष्टि गरे । ‘टेलिकमले फोरजीका लागि भनेर महसुल दर प्रस्ताव गरेको छैन,’ उनले भने, ‘उनीहरूले प्रवर्द्धनका लागि पुरानै दरमा सेवा दिन सक्छन्, त्यसैले पेस नगरेको हुन सक्छ ।’

शुक्रबार र शनिबार सार्वजनिक बिदा भएकाले टेलिकमले फोरजी औपचारिक रूपमा सुरु गर्नुभन्दा अगाडि नयाँ महसुल दर स्वीकृत गराउने अवस्था छैन । टेलिकमकी प्रवक्ता प्रतिभा वैद्यले भने फोरजीको महसुल दर र प्याकेजबारे आइतबार नै जानकारी दिने बताइन् । ‘हामी सफ्ट लन्चकै बेलामा सबै जानकारी दिनेछौं,’ उनले भनिन् ।

हाल कुनै पनि ग्राहक योजना (प्याकेज) बिना थ्रीजी र टुजी चलाउने ग्राहकले इन्टरनेटका लागि प्रतिमेगाबाइट करबाहेक १ रुपैयाँ तिर्दै आएका छन् । तर, ‘प्याकेज’ मा सहभागी भई ग्राहकले कम दरमा समेत इन्टरनेट चलाउन पाउँछन् । यसैगरी जीएसमए र सीडीएमए मोबाइल सेवाअनुसार फरक दरसमेत छ ।

टेलिकमले परीक्षणका क्रममा काठमाडौं र पोखरामा रहेका आफ्ना कर्मचारीलाई भने फोरजी चलाउन अनुरोध गर्दै एसएमएस गरेको थियो । उसले आगामी शनिबारसम्ममा कर्मचारीहरूलाई फोरजीबारे सुझाव दिनसमेत अनुरोध गरेको छ । टेलिकमले आफ्नै कर्मचारीलाई पठाएको एसएमएसमा भने प्रतिमेगाबाइट ४ पैसा महसुल लाग्ने जानकारी दिएको छ । तर, परीक्षणकालको महसुल ग्राहकलाई लागू नहुने टेलिकमका अधिकारीहरूले बताए ।

भ्वाइसका लागि भने टुजी र थ्रीजी पोस्टपेड ग्राहकले बिहान ६ बजेदेखि बेलुका १० बजेसम्म (पिक आवर) का लागि प्रतिमिनेट १ रुपैयाँ र प्रिपेड ग्राहकले १ रुपैयाँ तिर्दै आएका छन् । यो टेलिकमको नेटवर्कबाट टेलिकममै कल गर्दाको दर हो । यसैगरी बेलुका १० देखि बिहान ६ बजेसम्म भने पोस्टपेड मोबाइलमा ५५ पैसा प्रतिमिनेट तिर्नुपर्छ । थ्रीजी पोस्टपेड र प्रिपेडबाट भिडियो कल गर्दा भने प्रतिमिनेट २ रुपैयाँ र एमएमएस पठाउँदा प्रतिमिनेट १ रुपैयाँ ५० पैसा तिर्नुपर्छ ।

फोरजी सेवाका लागि ग्राहकले पुरानै दरमा सेवा लिन पाए पनि त्यसको गति भने तीव्र हुनेछ । यसको गति ३० देखि ४० मेगाबाइट प्रतिसेकेन्ड (एमबीपीएस) बीच हुने टेलिकमका अधिकारीहरूले बताएका छन् । अन्तर्राष्ट्रिय दूरसञ्चार संघ (आईटीयू) ले फोरजीका लागि १ सय एमबीपीएस गति तोकेको भए पनि धेरै मुलुकमा ४० एमबीपीएस गतिको इन्टरनेटलाई फोरजीका रूपमा लिने गरिएको छ । भारतमा समेत सेवा प्रदायकले यही गतिमा फोरजी सुरु गरेका छन् ।

टेलिकमले यसअघि सिमकार्ड बिक्री गर्दै आएका राजधानीका सबै आफ्ना काउन्टरबाट फोरजीको सिमकार्ड बिक्री गर्ने योजना बनाएको छ । पोखराका ग्राहकले भने महेन्द्रपुल शाखाबाट सिमाकार्ड पाउनेछन् । पुरानो सिमकार्डमा फोरजी नचल्ने भएकाले ग्राहकले आइतबारपछि नयाँ सिमकार्ड लिन सक्नेछन् । यसका लागि युनिर्भसल सिमकार्ड (युसिम) लिनुपर्नेछ । टेलिकमका अधिकारीहरूका अनुसार ग्राहकले पहिलेकै जसरी फोरजीको सिमकार्ड साट्न सक्नेछन् । फोरजी चल्ने मोबाइल सेट बोक्ने ग्राहकले युसिम प्रयोग गरी यो सेवा लिन सक्नेछन् ।

सरकारी स्वामित्वको टेलिकमले नेपालमा पहिलोपटक फोरजी सेवा सुरु गर्न लागेको हो । उच्च गतिको इन्टरनेट हुने यो सेवा विकसित मुलुकमा भने करिब ६ वर्षदेखि सुरु भइसकेको छ । केही मुलुकले पाँचौं पुस्ताको मोबाइल सेवा (फाइभजी) को समेत परीक्षण थाल्ने घोषणा गरिसकेका छन् ।

सरकारले गत कात्तिक ५ गते टेलिकमलाई फोरजी सेवा सञ्चालनको अनुमति दिएको थियो । सरकारले टेलिकमले पाएको पुरानै फ्रिक्वेन्सीमा फोरजी चलाउने अनुमति दिएको हो । टेलिकमले पाएको १ हजार ८ सय मेगाहर्ज ब्यान्डको फ्रिक्वेन्सीमा यो सेवा चलाउनेछ । त्यसका लागि टेलिकमले यो ब्यान्डमा पाएको १५ मध्ये ५ मेगाहर्ज फ्रिक्वेन्सी प्रयोग गर्ने जनाएको छ ।

चार दिन सित्तैमा फोरजी
हाललाई पुरानै दरमा फोरजी चलाउन दिने तयारी गरेको टेलिकमले ग्राहकलाई सुरुका चार दिन भने सित्तैमा फोरजी चलाउन दिने प्याकेज तय गरेको छ । ‘ग्राहकलाई नयाँ सेवाबारे जानकारी दिन पनि यस्तो प्याकेज बनाइएको हो,’ टेलिकमका एक अधिकारीले भने, ‘हामीले ४ दिनका लागि हरेक दिन एक/एक जीबी (गिगाबाइट) डाटा सित्तैमा चलाउन दिँदै छौं ।’

जीएसएम मोबाइलका ग्राहकले एसएमएस पठाएरै यो सेवा लिन सक्ने उनले बताए । जनवरी महिनाभर यो प्रवर्द्धनात्मक योजना लागू भए पनि एकपटक सेवा लिएर चार दिन चलाएका ग्राहकले भने फेरि सित्तैमा चलाउन पाउने छैनन् ।

प्रकाशित : पुस १५, २०७३ २२:००
प्रतिक्रिया
पठाउनुहोस्

एक्कासी किन भयो मधेसी मोर्चा लचिलो ?

अहिलेकै संशोधन प्रस्ताव अघि बढाइए पनि स्विकार्ने
बसन्त बस्नेत

काठमाडौं — सत्ता घटक कांग्रेस र माओवादी केन्द्र संविधान संशोधनबिनै स्थानीय चुनावतर्फ जाने बुझेपछि अप्ठ्यारामा परेको मधेसी मोर्चाले अहिलेकै संशोधन प्रस्ताव अघि बढाइए पनि स्विकार्ने निर्णय गरेको छ ।

शुक्रबार राजधानीमा सकिएको मोर्चाको दुईदिने बैठकले यसअघिका बैठकमा संशोधन प्रस्ताव पहिले परिमार्जन हुनुपर्ने अनि मात्रै स्विकार्न सकिने अडान राख्दै आएको थियो । मोर्चाले संशोधन विधेयक पारित गर्नका लागि सोमबार सबै जिल्ला सदरमुकाममा खबरदारी प्रदर्शन गर्ने निर्णय लिए पनि अर्को लचिलो नीति लिँदै सत्तारूढ पक्षलाई संशोधन प्रस्ताव अघि बढाउन बाटो खोलिदिने निर्णय लिएको छ ।

तमलोपाका वरिष्ठ उपाध्यक्ष हृदयेश त्रिपाठीले संविधान संशोधन प्रस्ताव परिमार्जन हुनुपर्ने माग यथावत् रहे पनि संसदीय प्रक्रिया अघि बढाउने क्रममा आएका रायका आधारमा प्रस्ताव परिमार्जन गरे मोर्चालाई फरक नपर्ने बताए । 

‘प्रस्ताव परिमार्जन गर्ने विधि भनेको आखिर संसदीय छलफलकै क्रममा हुने हो, पहिले सरकारले प्रस्ताव अघि बढाओस्, त्यसपछि अरूले जस्तै हामी पनि हाम्रो परिमार्जन राखौंला,’ त्रिपाठीले बैठकपछि कान्तिपुरसँग भने, ‘हामीले भनेजस्तो भयो भने ठिकै छ, नत्र फरक मत राखेर भए पनि प्रस्ताव पारित गर्न सघाउँछौं । हाम्रो राजनीतिक मागलाई जनताबीच लगिरहन्छौं ।’ फोरम गणतान्त्रिक अध्यक्ष राजकिशोर यादव र सद्भावना पार्टी महासचिव मनिषकुमार सुमनले पनि बैठकमा उक्त निर्णय भएको खुलाए । बैठकपछि जारी वक्तव्यमा भने उक्त निर्णय उल्लेख छैन ।

मोर्चाको यो निर्णयबाट सत्तापक्षलाई संशोधन अघि बढाउन सहज भएको छ । प्रतिपक्षी एमालेको अवरोध चिर्नुपर्ने बाध्यता भने कांग्रेस, माओवादी केन्द्रलाई अझै छ । यसअघि मोर्चाले अहिलेको प्रस्ताव मान्य नभएको भन्दै परिमार्जन गरेर मात्रै अघि बढाउनुपर्ने, नत्र त्यसको स्वामित्व मोर्चाले नलिने जिकिर गर्दै आएको थियो । शुक्रबारको बैठकपछि मोर्चाले पछि हट्ने प्रस्टै संकेत दिएको छ ।

संविधानको हालसम्म स्वामित्व नलिएको मोर्चाले गत वर्ष माघमा भएको पहिलो संशोधन पनि स्विकारेको थिएन । सत्तारूढ घटककै केही नेतासहित प्रतिपक्षी एमालेले समेत मोर्चाबाट स्वामित्व नलिइएको प्रस्ताव किन अघि बढाउने भनी तर्क गरिरहेका बेला मोर्चा लचिलो भएको हो । अब मोर्चा निर्णयको दबाब प्रतिपक्षी एमालेलाई पर्ने देखिन्छ । एमालेले प्रस्ताव असंवैधानिक भएको भन्दै संसद् अवरोध गर्दै आएको छ ।

फोरम दोस्रो दिन अनुपस्थित
त्यसो त मोर्चाले शुक्रबारै पत्रकार सम्मेलन गर्दै संविधान संशोधन नगरी निर्वाचन गरिए द्वन्द्व बढ्ने चेतावनी दिएको छ । तमलोपा अध्यक्ष महन्थ ठाकुरले अहिलेको संविधान अस्पष्ट र अधुरो रहेकाले आफूहरू आन्दोलनमा जान बाध्य भएको बताए । उनले सरकारलाई दिँदै आएको समर्थन फिर्ता अहिले नलिने, आन्दोलनमा जानुपरे त्यसबेला जे हुन्छ, स्वत: हुने पनि तर्क गरे । तर कतिपयले मोर्चा अडान अकस्मात् फेरिनुलाई आश्चर्यजनक ढंगले लिएका छन् ।

मोर्चाको मुख्य घटकमध्ये एक संघीय समाजवादी फोरमका नेताहरू बिहीबारको बैठकमा सहभागी भए पनि दोस्रो दिन कोही उपस्थित भएनन् । बिहीबार बैठकमा सहभागी अध्यक्ष उपेन्द्र यादव बैठक चल्दाचल्दै जनकपुर गएका थिए । अरू बेला बैठक भ्याउने गरेका सहअध्यक्ष राजेन्द्र श्रेष्ठ पनि ‘व्यस्त रहेको’ भन्दै नआएको मोर्चाका एक नेताले भने । बिहीबार बैठकमा आएका महासचिव रामसहाय यादव पनि आफू अर्कै कार्यक्रममा सहभागी रहेको बताउँदै आएनन् ।

मोर्चाले शुक्रबार बिहान ११ बजे बैठक र एक बजे पत्रकार सम्मेलनको कार्यसूची बिहीबारै तय गरेको थियो । यसअघिका वक्तव्यमा मोर्चा आबद्ध आठै मधेस केन्द्रित दलका नेताहरूको हस्ताक्षर हुने भए पनि शुक्रबार जारी वक्तव्यमा भने तमलोपा अध्यक्ष महन्थ ठाकुरको मात्रै हस्ताक्षर छ । फोरम अध्यक्ष उपेन्द्र यादवले टेलिफोनमा कुरा गर्दै ल्होछार मनाउन नेताहरू व्यस्त भएकाले बैठकमा नआएको बताए । उनले संशोधन प्रस्ताव अघि बढ्न दिने निर्णय ‘रणनीतिक’ भएको पनि खुलाए ।

फोरम गणतान्त्रिकका अध्यक्ष राजकिशोर यादवले भने मोर्चामा कुनै आन्तरिक खटपट नभएको, वक्तव्यमा सहजताका लागि एक उच्च नेताको हस्ताक्षर गरिएको प्रस्टीकरण दिए । ‘फोरमका साथीहरू व्यस्त हुनुभएकाले हो, तर निर्णयमा उहाँहरूको सहमति नै छ,’ उनले भने ।

मोर्चा वक्तव्यमा के छ
मोर्चाको वक्तव्यमा संघीय राज्य पुन:संरचनाको मान्य सिद्धान्तअनुरूप संघीय राज्यमा स्थानीय तहहरू प्रदेशअन्तर्गत समन्वित हुनुपर्ने माग गरिएको छ । स्थानीय तह पुन:संरचना आयोगले संविधानकै निर्दिष्ट कार्यसमेत पूरा नगरी संविधान विपरीत प्रतिवेदन तयार पारेको आरोप मोर्चाको छ । एमालेले संसद् अवरुद्ध गरेर अलोकतान्त्रिक क्रियाकलाप गरेको मोर्चाको वक्तव्यमा छ ।

वक्तव्यमा संसद् सचिवालयमा दर्ता भएको संशोधन प्रस्ताव सहमतिको आधारमा परिमार्जन नगरिएसम्म कुनै पनि तहको निर्वाचन मोर्चालाई मान्य नहुने उल्लेख छ । पत्रकार भेटघाटमा ठाकुरले तीन ठूला दल निर्वाचनमा जसरी पनि जाने योजनामा रहेकाले आफूहरूलाई त्यो मान्य नहुने बताएका थिए ।

प्रकाशित : पुस १५, २०७३ २१:३०
पूरा पढ्नुहोस्
प्रतिक्रिया
पठाउनुहोस्
×