‘हाम्रा कुरा एन्फाले सुन्दैन’

नेपाली माथिल्लो डिभिजन खेलिरहेका १४ मध्ये १० क्लबले शुक्रबार पत्रकार सम्मेलन गर्दै एन्फाले आफ्ना समस्यालाई बेवास्ता गरेको आरोप लगाएका छन् । पूर्वअध्यक्ष शेर्पा हिमालयन शेर्पाका अध्यक्ष पनि हुन् । उनले अझ अहिलेको एन्फा नेतृत्वका लागि फुटबल प्राथमिकतामै नपरेको समेत दाबी गरे । क्लबको मुख्य गुनासो भने प्रतियोगिता खेलवापत आफूहरूले पाउनुपर्ने तयारी रकम समेत नपाएको थियो । क्लबले तीन चरणमा पाउनुपर्ने रकममध्ये प्रतियोगिता सकिँदै लाग्दा एकै किस्तामात्र पाएको छ ।

संकटाका अध्यक्ष रहेका एन्फाका पूर्वमहासचिव इन्द्रमान तुलाधरले भने, ‘एन्फाले सहभागी क्लबलाई लिग सुरु हुनु अगाडि १५ लाख, १३ औं चरण सकिँदा १० लाख र लिग सकिएपछि साढे ७ लाख रुपैयाँ दिनुपर्ने हो । हामीले तीन किस्तामा पाउनुपर्ने ३२ लाख ५० हजार रुपैयाँमध्ये एकै किस्ता मात्र पाएका छौं । त्यसपछि केही भएको छैन ।’ उनले अझ दाबी थियो, एन्फाले लिगको खेलतालिकामा हेलचेक्र्याँइ मात्र गरेको छैन, खेल समय पनि मिलाउन सकेको छैन ।

‘हामीले पटक–पटक ज्ञापनपत्र बुझाएका छौं, तर एन्फाले हामीलाई वेवास्ता गरिरहेको छ,’ तुलाधरले थपे, ‘बजारमा क्लबले फिफा र एएफसीबाट आउने पैसा मागेको हल्ला छ, तर हामीले लिगवापत पाउने रकममात्र मागेका हौं । हामीले प्रायोजन, गेट टिकट कलेक्सन, टीभी प्रायोजनवापत आउने रकम मागेका हौं, किनभने यो हामीले खेलेर आउने रकम हो । हामीले म्याच–मनी पनि पाएका छैनौं । खेलाडीले प्लेयर अफ द म्याचको पैसा पनि पाएका छैनन् ।’

पत्रकार सम्मेलनमा उपस्थित पदाधिकारी दुईपल्टको डिफेन्डिङ च्याम्पियन मछिन्द्रसँगै चर्च ब्वाइज, खुमलटार, मनाङ मर्स्याङ्दी, संकटा, हिमालन शेर्पा, एनआरटी, फ्रेन्ड्स, सातदोबाटो र थ्रीस्टार रहेका छन् । जावलाखेलसँगै तीन विभागीय टिमका प्रतिनिधि भने पत्रकार सम्मेलनमा आएनन् । पूर्वमहासचिव तुलाधरले नेपालले एएफसी यू–२३ छनोटमा नखेल्नु पछाडि एन्फाले टिमको नाम नै दर्ता गराउन बिर्सेको हुनसक्ने आरोप समेत लगाए ।

पूर्वअध्यक्ष शेर्पाले एन्फा फिफा र एएफसीको सहयोगले मात्र चल्न नसक्ने बताए । उनको भनाइ थियो, ‘फिफा र एएफसीबाट आउने बजेट सीमितमात्र हुन्छ । थप बजेटका लागि एन्फाले मिहिनेत गर्नुपर्छ । एन्फाको उचित योजना र सही तरिका नहुँदा व्यवस्थापनमा नेपाली फुटबल ओरालो लागेको छ ।’ पत्रकार सम्मेलनमा उपस्थित क्लबले एन्फाले दिनुपर्ने सबै रकम प्राप्त नभए पनि प्रतियोगिता नै बहिष्कार भने नगर्ने जनाएका छन् ।